លោក Agnelli ជាស្ថាបនិកម្នាក់ក្នុងការបង្កើតគម្រោងពានរង្វាន់ថ្មី ESL ដែលដំបូងឡើយទទួលបានការគាំទ្រពីសំណាក់ក្លិបយក្សចំនួន១២ មកពីអង់គ្លេស អេស្ប៉ាញ និងអ៊ីតាលី។ ប៉ុន្តែនៅពេលនេះ មានក្លិប៩ហើយបានដកខ្លួនចេញវិញ ក្រោយមានការរិះគន់ និងថ្កោលទោសយ៉ាងខ្លាំងជុំវិញការបង្កើតពាននេះ។ បច្ចុប្បន្ននៅសល់តែក្រុម Barcelona, Real Madrid និង Juventus ប៉ុណ្ណោះដែលនៅរក្សាជំហររបស់ខ្លួននៅឡើយ។
 

យ៉ាងណាក៏ដោយ បើទោះ Juventus មិនទាន់ប្រកាសចាកចេញ ប៉ុន្តែលោក Agnelli ដែលជាប្រធានក្លិបយក្សអ៊ីតាលីមួយនេះនិយាយថា ESL មិនអាចកើតឡើងបានទេ ក្រោយ៩ក្លិបបានបដិសេធមិនចូលរួមវិញ។
 

«ខ្ញុំនៅតែជឿជាក់លើភាពល្អឥតខ្ចោះនៃគម្រោង ESL ដែលអាចជួយអភិវឌ្ឍនការប្រកួតប្រជែងល្អបំផុតក្នុងវិស័យបាល់ទាត់លើពិភពលោក ប៉ុន្តែជាក់ស្តែងពេលនេះគឺមិនអាចទេ»។ ខ្ញុំគិតថាគម្រោងនេះ មិនអាចដំណើរការបានទេ»។ ប្រធានក្លិបសេះបង្កង់សញ្ជាតិអ៊ីតាលីបន្ថែមដូច្នេះ។ 
 

លោក Agnelli បានលាលែងពីតំណែងប្រធានសមាគមក្លិបអឺរ៉ុប (ECA) កាលសប្តាហ៍មុនជុំវិញរឿងរ៉ាវ ESL នេះ ពោលក្រោយលោកត្រូវបានប្រធានសហព័ន្ធកីឡាបាល់ទាត់អឺរ៉ុប (UEFA) លោក Aleksander Ceferin រិះគន់ថាជាពស់ និងជាមនុស្សកុហក់។ លោក Nasser Al-Khelaifi ប្រធានក្លិប Paris St-Germain ដែលជាអ្នកប្រឆាំងគម្រោង ESL ឡើងកាន់តំណែង ECA វិញ។
 

សម្រាប់លោក Perez ជាប្រធាន និងជាអ្នកសកម្មជាងគេសម្រាប់គម្រោង ESL នៅតែជឿជាក់ថាពានរង្វាន់អឺរ៉ុបថ្មីនេះមិនស្លាប់នោះទេ បើទោះមានក្លិប៣បន្ថែមទៀតបន្តចាកចេញក៏ដោយ។
 

ប្រធានក្លិបស្តេចសរ និងជាមហាសេដ្ឋីសញ្ជាតិអេស្ប៉ាញ បានប្រាប់កម្មវិធីវិទ្យុអេស៉្បាញ El Larguero ថា៖ «គម្រោងនេះគឺកំពុងដំណើរការ យើងនឹងបន្តធ្វើការលើរឿងនេះទៀត។ ខ្ញុំជឿជាក់ថាប្រសិនបើគម្រោងនេះមិនដំណើរការ គម្រោងស្រដៀងគ្នានេះនឹងកើតឡើងមួយទៀត»៕