ទារក និងកុមារ អាយុចន្លោះ៣ខែ ដល់១៥ឆ្នាំ ចំនួន ៣១នាក់ ស្ថិតក្នុងចំណោមអ្នកវិជ្ជមានកូវីដ-១៩ ចំនួន ២៧៩នាក់ ដែលត្រូវបានរកឃើញនៅរាជធានីភ្នំពេញ នៅថ្ងៃទី ១១ ខែឧសភា។ តាមរបាយការណ៍របស់រដ្ឋបាលរាជធានីភ្នំពេញ ក្នុងចំណោមអ្នកឆ្លងជំងឺកូវីដ-១៩ទាំងនោះ គឺមានមន្ត្រីនគរបាល, កម្មកររោងចក្រ,ជាងសំណង់, អ្នកលក់ដូរ,បុគ្គលិកតាមក្រុមហ៊ុនឯកជន, ចុងភៅ, បុគ្គលិកអង្គការ, គ្រូបង្រៀន,សិស្ស អ្នករត់ម៉ូតូកង់បី,អ្នកបើកឡានដឹកដី,អ្នកដឹកជញ្ជូន,ជាងជួសជុលទូរសព្ទ និងឡាន,ជាងភ្លើង,អ្នកលក់អនឡាញ,សន្តិសុខផ្សារ, និងបុគ្គលិករថយន្តក្រុង។ 
 

បើតាមរបាយការណ៍ដដែល ខណ្ឌដែលមានអ្នកឆ្លងជំងឺកូវីដ-១៩ច្រើនជាងគេ ក្នុងរបាយការណ៍នាថ្ងៃនេះ គឺមានខណ្ឌឫស្សីកែវ ខណ្ឌពោធិ៍សែនជ័យ និងខណ្ឌមានជ័យ។ ខណ្ឌដង្កោ ខណ្ឌដូនពេញ ខណ្ឌជ្រោយចង្វារ ខណ្ឌច្បារអំពៅ ខណ្ឌ៧មករា ខណ្ឌសែនសុខ ខណ្ឌទួលគោក ខណ្ឌកំបូល និងខណ្ឌបឹងកេងកង ក៏ជាខណ្ឌដែលរកឃើញអ្នកជំងឺកូវីដ-១៩នៅថ្ងៃនេះផងដែរ។ 

បច្ចុប្បន្នកម្ពុជាមានអ្នកឆ្លងកូវីដ-១៩ សរុប ២០៦៩៥នាក់ហើយ ដោយករណីនាំចូលមាន៥៩១ករណី។ ចំណែកអ្នកជាសះស្បើយ៨៥៣៩នាក់ ខណៈអ្នកស្លាប់កើនដល់ ១៣៦នាក់៕