កាលពីថ្ងៃទី៣ ខែឧសភា ឆ្នាំ២០២១ លោកស្រី មាសសាឯម ដានី បានទៅចាក់វ៉ាក់សាំងកូវីដ-១៩ AstraZeneca (Covishield) ដូសទី២នៅមន្ទីរពេទ្យកាល់ម៉ែត។ លោកស្រីចាប់ផ្តើមមិនស្រួលក្នុងខ្លួននៅថ្ងៃទី៦-៧ ខែឧសភា ហើយឈានដល់ថ្ងៃទី១២ ខែឧសភា បានតេស្តរកកូវីដ-១៩ នៅគេហដ្ឋានខ្លួនក្នុងសង្កាត់ទន្លេបាសាក់ ខណ្ឌចំការមន ហើយលទ្ធផលគឺ វិជ្ជមាន។

 

សេចក្តីប្រកាសព័ត៌មាន បានបញ្ជាក់ថា ចាប់តាំងពីថ្ងៃទី១៤ ខែមេសា ឆ្នាំ២០២១ លោកស្រី មាសសាឯម ដានី មិនបានទៅបំពេញការងារនៅទីស្តីការគណៈរដ្ឋមន្ត្រីឡើយ។

 

លោក សយ សុខា រដ្ឋលេខាធិការដែលចុះហត្ថលេខាលើសេចក្តីប្រកាសព័ត៌មាន បានក្រើនណែនាំដល់អ្នកទាក់ទងផ្ទាល់ជាមួយលោកស្រី មាសសាឯម ដានី ទៅយកសំណាកនៅតាមទីតាំងដែលក្រសួងសុខាភិបាលបានកំណត់ រីឯអ្នកទាក់ទងដោយប្រយោល ត្រូវធ្វើចត្តាឡីស័កនៅផ្ទះ១៤ថ្ងៃ និងតាមដានសុខភាពខ្លួនឯង៕