ជាតិ
នយោបាយជាតិ
លោក ប៉ុល ហំម និងលោក ផាន់ ច័ន្ទសាក់ អតីតមន្ត្រីជាន់ខ្ពស់CNRP សុំសិទ្ធិធ្វើនយោបាយឡើងវិញ (ឆ្វេង)លោក ផាន់ ច័ន្ទសាក់ អតីតសមាជិកគណៈកម្មាធិការនាយក និងលោក ប៉ុល ហំម អតីតសមាជិកគណៈកម្មាធិការអចិន្ត្រៃយ នៃអតីតគណបក្សសង្គ្រោះជាតិ
× ភ្នំពេញ៖ អតីតមន្ត្រីជាន់ខ្ពស់គណបក្សសង្គ្រោះជាតិ២រូបទៀត គឺលោក ប៉ុល ហំម និងលោក ផាន់ ច័ន្ទសាក់ បានស្នើសុំសិទ្ធិធ្វើនយោបាយឡើងវិញ ក្រោយជាប់បម្រាមជាង៣ឆ្នាំមកនេះ។ នេះបើតាមលិខិតដោយឡែករបស់អ្នកនយោបាយបក្សប្រឆាំងទាំងពីរ កាលពីថ្ងៃទី១៧ ឧសភា។
លោក ប៉ុល ហំម អតីតសមាជិកគណៈកម្មាធិការអចិន្ត្រៃយ និងលោក ផាន់ ច័ន្ទសាក់ អតីតសមាជិកគណៈកម្មាធិការនាយក កំពុងជាប់បម្រាមហាមធ្វើសកម្មភាពនយោបាយសម្រាប់រយៈពេល៥ឆ្នាំ តាមអំណាចសាលដីការបស់តុលាការកំពូល កាលពីថ្ងៃទី១៦ វិច្ឆិកា ២០១៧។
លិខិតដោយឡែករបស់មន្ត្រីជាន់ខ្ពស់អតីតគណបក្សសង្គ្រោះជាតិទាំងពីរ ដែលបានដាក់ស្នើទៅសម្ដេច ស ខេង រដ្ឋមន្ត្រីក្រសួងមហាផ្ទៃ បានបញ្ជាក់ដូច្នេះថា៖«ដោយផ្អែកតាមមាត្រា៤៥ថ្មី (ស្ទួនថ្មី) នៃច្បាប់ស្តីគណបក្សនយោបាយ ដែលបង្កលក្ខណៈឱ្យអ្នកដែលត្រូវបានហាមឃាត់ មិនឱ្យធ្វើសកម្មភាពនយោបាយ អាចទទួលបាននីតិសម្បទាធ្វើនយោបាយឡើងវិញ។ ដូច្នេះខ្ញុំបាទសូមស្នើសុំសម្ដេចក្រឡាហោម ឧបនាយករដ្ឋមន្ត្រី មេត្តាពិនិត្យតាមនីតិវិធី ដើម្បីផ្ដល់នីតិសម្បទានយោបាយឡើងវិញដល់រូបខ្ញុំ ដោយក្តីអនុគ្រោះ»។
សារព័ត៌មានថ្មីៗ មិនអាចទាក់ទងលោក ប៉ុល ហំម អតីតសមាជិកគណៈកម្មាធិការអចិន្ត្រៃយ ដើម្បីសុំការអត្ថាធិប្បាយជុំវិញការសុំសិទ្ធិធ្វើនយោបាយបានឡើយ។
ដោយឡែកលោក ផាន់ ច័ន្ទសាក់ អតីតសមាជិកគណៈកម្មាធិការនាយក បានបញ្ជាក់ថា ការសុំសិទ្ធិធ្វើនយោបាយវិញនេះ គឺដើម្បីត្រៀមខ្លួនប្រកួតប្រជែងសំឡេងឆ្នោតជាមួយគណបក្សកាន់អំណាចបច្ចុប្បន្ន ដោយមិនចង់ឱ្យបក្សនេះ ក្ដោបកៅអីទាំងអស់ក្នុងរដ្ឋសភា ដូចការបោះឆ្នោតឆ្នាំ២០១៨ នៅអាណត្តិទី៦នោះទេ។
បើតាមលោក ច័ន្ទសាក់ ក្រោយទទួលបានសិទ្ធិធ្វើនយោបាយវិញហើយ រូបលោកនឹងចូលរួមជាមួយ គណបក្សកែទម្រង់កម្ពុជា (Cambodian Reform Party) របស់លោក អ៊ូ ច័ន្ទរ័ត្ន ដើម្បីរួមកម្លាំងនយោបាយ ប្រជែងនឹងគណបក្សប្រជាជនកម្ពុជា។
គិតមកដល់ពេលនេះ មន្ត្រីជាន់ខ្ពស់អតីតគណបក្សសង្គ្រោះជាតិ ជិត២០រូបហើយ ដែលស្នើសុំ និងទទួលបានសិទ្ធិធ្វើនយោបាយឡើងវិញ ជាបន្តបន្ទាប់។ គួរបញ្ជាក់ថា មេដឹកនាំ និងមន្ត្រីអតីតគណបក្សសង្គ្រោះជាតិ ១១៨នាក់ ត្រូវបានតុលាការហាមធ្វើនយោបាយរយៈពេល៥ឆ្នាំ ស្របពេលគណបក្សសង្គ្រោះជាតិ ត្រូវបានរំលាយ កាលពីថ្ងៃទី១៧ វិច្ឆិកា ២០១៧៕
© រក្សាសិទ្ធិដោយ thmeythmey.com