យីហោ «លូ ចាន់ នំគូឆាយ វាលមែន» ស្ថិតនៅខាងមុខវាលព្រះមេរុ ។។ យីហោនេះ មានអាយុ ៣៧ឆ្នាំមកហើយ។ ដំបូងឡើយ ជីដូនរបស់អ្នកស្រី ចាន់ រុញរទេះលក់តាមដងផ្លូវនៅក្នុងតំបន់វាលមេរុ។ រហូតដល់ឆ្នាំ ១៩៩៧ របរលក្ខណគ្រួសារមួយនេះ មានហាងលក់មួយកន្លែងក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ។
 

នំគូឆាយនេះ កាន់តែទទួលបានការគាំទ្រច្រើនដែលមកទិញផ្ទាល់នៅហាង។ រហូតដល់ឆ្នាំ២០១៦ ហាងនេះក៏បានចាប់ផ្តើមលក់តាមប្រព័ន្ធអនឡាញ និងមានអតិថិជនតាមបណ្ដាញសង្គមច្រើន។ ម្ចាស់ហាង អ្នកស្រី ចាន់ ប្រាប់ពីលក្ខណពិសេសនំដូច្នេះថា៖«ហាងខ្ញុំធ្វើមិនរិះស្នូលនំ និងធ្វើសំបកនំស្ដើង។ ភ្ញៀវគាត់ចូលចិត្តសំបកស្តើង ពេលចៀនទៅស្រួយឆ្ងាញ់។ នំចំហ៊ុយ ក៏ឆ្ងាញ់មួយបែបដែរ»។


 រូបភាពពី៖ លូ ចាន់ នំគូឆាយ វាលមែន 

ក្នុងវិបត្តិកូវីដ-១៩ ហាងនំ បានផ្អាកមួយរយៈ។ ម្ចាស់ហាងរូបនេះ បញ្ជាក់ថា៖ អំឡុងកូវីដ-១៩ រាលដាលខ្លាំង យើងពិបាកក្នុងការដឹកជញ្ជូនជូនភ្ញៀវ។ ពេលបើកលក់វិញ ការបញ្ជាទិញថយចុះបន្តិច។ យើងលក់បានចន្លោះពី ៦០០ ទៅ ៦៥០នំ ក្នុងមួយថ្ងៃ»។
 

អ្នកស្រី ចាន់ លក់នំគូឆាយក្នុងតម្លៃនំមួយតម្លៃ ២ពាន់រៀល។ ក្នុងចំណោមនំទាំង ៤រសជាតិ នំស្នូលគូឆាយ គឺជានំលក់ដាច់ជាងគេ។ ម្ចាស់ហាងរូបនេះ តែងធ្វើនំស្នូលគូឆាយច្រើនជាងនំស្នូលត្រាវ ប៉ិកគក់ និងគូឆាយជ្រុង៕