ជាតិ
សង្គមជាតិ
អតីតព្រះរាជអាជ្ញា លោក តុប ច័ន្ទសិរីវុធ ត្រូវបានដោះលែង ក្រោយជាប់ពន្ធនាគារ១១ឆ្នាំ លោក តុប ច័ន្ទសិរីវុធ អតីតព្រះរាជអាជ្ញាខេត្តពោធិ៍សាត់
× ភ្នំពេញ៖ អតីតព្រះរាជអាជ្ញាខេត្តពោធិ៍សាត់ លោក តុប ច័ន្ទសិរីវុធ ត្រូវប្រមុខរដ្ឋស្ដីទីលោក សាយ ឈុំ បានត្រាស់បង្គាប់លើកលែងទោស ក្រោយបុគ្គលនេះបានជាប់ពន្ធនាគារប្រមាណ១១ឆ្នាំ។ នេះបើតាមព្រះរាជក្រឹត្យ ដែលចុះហត្ថលេខាដោយប្រមុខរដ្ឋស្ដីទីនៅថ្ងៃទី៣មីនា ឆ្នាំ២០២១។
អតីតព្រះរាជអាជ្ញាអមសាលាដំបូងខេត្តពោធិ៍សាត់រូបនេះ ត្រូវបានតុលាការសម្រេចផ្ដន្ទាទោសដាក់ពន្ធនាគារ១៩ឆ្នាំ តាមសាលដីកាព្រហ្មទណ្ឌស្ថាពថ្ងៃទី៦មីនា ២០១៣ របស់តុលាការកំពូល។ លោក តុប ច័ន្ទសិរីវុធ ត្រូវបានឃាត់ខ្លួនដោយអង្គភាពប្រឆាំងអំពើពុករលួយកាលពីខែវិច្ឆិកា ឆ្នាំ២០១០ ក្នុងសំណុំរឿងពុករលួយ។ អំពើពុករលួយទាំងនោះរួមមាន បទបង្ខាំងមនុស្សខុសច្បាប់ និងបទជំរិតទារប្រាក់ នេះបើយោងតាមក្រុមមន្ដ្រីតុលាការ និងមន្ដ្រីឃ្លាំមើលសិទ្ធិមនុស្ស។
ក្រៅពីលោក ច័ន្តសិរីវុធ កាលនោះមាន បក្ខពួកពីរនាក់ទៀត គឺលោក ឈិត វុទ្ធី អាយុ ៤០ ឆ្នាំ ត្រូវជាប់ពន្ធនាគារ ១៦ ឆ្នាំ និង រស់ សំណាង អាយុ ៤០ ឆ្នាំ ត្រូវជាប់ជាប់ពន្ធនាគារ ១៥ ឆ្នាំ។
សូមបញ្ជាក់ថា លោក ច័ន្ទសិរីវុធ ត្រូវបានតែងតាំងជាចៅក្រមសាលាដំបូងខេត្តបន្ទាយមានជ័យ កាលពីខែមិថុនា ឆ្នាំ២០០១ ហើយក៏ត្រូវបានតែងតាំងជាព្រះរាជអាជ្ញានៃអយ្យការអមសាលាដំបូងខេត្តពោធិ៍សាត់ ក្នុងខែកុម្ភៈឆ្នាំ២០០៧។ ចុះដល់ខែមករា ឆ្នាំ២០១៥ លោកត្រូវបានលុបឈ្មោះចេញពីក្របខ័ណ្ឌនៃអង្គចៅក្រម៕
© រក្សាសិទ្ធិដោយ thmeythmey.com