ទំពាំងផ្អែម ជាដំណាំឆាប់ទទួលផល ងាយដាំ ស្រួលថែទាំ និងមានរយៈពេលវែង។ នៅរដូវវស្សាទំពាំងផ្អែមមានតម្លៃពី ២ទៅ៣ពាន់រៀល ក្នុងមួយគីឡូក្រាមប៉ុណ្ណោះ ខណៈរដូវប្រាំងទំពាំងផ្អែម មានតម្លៃរហូតដល់ ៧ទៅ៨ពាន់រៀលក្នុងមួយគីឡូក្រាម។
ទំពាំងផ្អែម ជាដំណាំងាយដាំ មិនពិបាកថែទាំ និងឆាប់ទទួលបានទិន្នផល។ ក្នុងរយៈពេល ៣ខែ ប៉ុណ្ណោះបន្ទាប់ពីទំពាំងផ្អែមចាប់ផ្ដើមដុះ គឺអាចកាត់លក់បាន។ នេះជាការលើកឡើងរបស់លោក អ៊ឹង ទ្រី ជាអ្នកដាំទំពាំងផ្អែម ដោយបន្ថែមថា ទោះជានៅរដូវណាទីផ្សារទំពាំងផ្អែមនៅតែមាន គ្រាន់តែតម្លៃខុសគ្នានៅតាមរដូវ។
ម្ចាស់ចម្ការវ័យ៥៥ឆ្នាំ ដែលស្ថិតនៅភូមិទន្លេបិទក្រោម ឃុំទន្លេបិទ បន្តថា នៅរដូវប្រាំងទំពាំងផ្អែម លក់បានថ្លៃជាងរដូវវស្សា។ លោក អ៊ឹង ទ្រី ប្រាប់សារព័ត៌មាន ThmeyThmey25 តាមទូរសព្ទដូច្នេះ៖ «នៅរដូវប្រាំង ទំពាំងស្រុកមិនសូវសម្បូរ ដូច្នេះទំពាំងផ្អែមមានតម្លៃ ៧ទៅ៨ពាន់រៀល ក្នុងមួយគីឡូក្រាម។ តែនៅរដូវវស្សាទំពាំងផ្អែម លក់បានតែ ២ទៅ៣ពាន់រៀលក្នុងមួយគីឡូក្រាម»។
ថ្វីបើរដូវវស្សាទំពាំងផ្អែមធ្លាក់ថ្លៃ តែអ្នកស្រុកត្បូងឃ្មុំរូបនេះ តែងតែបានផលពីទំពាំងផ្អែម ដែលផ្ដល់ចំណូលជាប្រចាំ។ ដំណាំទំពាំងផ្អែមដែលដាំលើផ្ទៃដី ៣ហិកតា លោក ទ្រី អាចប្រមូលផលបាន ៣០០គីឡូក្រាម ក្នុងមួយថ្ងៃ ទៅឲ្យឈ្មួញនៅភ្នំពេញ និងខេត្តដទៃ។ បន្ថែមលើនោះ លោក ទ្រី ក៏អាចលក់កូនឫស្សីផ្អែមតម្លៃ ៥០០០រៀល ក្នុងមួយដើមផងដែរ។
របរដាំទំពាំងផ្អែមធ្វើឲ្យសេដ្ឋកិច្ចគ្រួសារលោក អ៊ឹង ទ្រី ប្រសើរឡើង។ លោក ទ្រី គ្រោងបន្ថែមផ្ទៃដី១ហិកតាទៀត ដើម្បីដាំទំពាំងផ្អែម ក្រោយមានតម្រូវការទីផ្សារច្រើន។ ក្នុងមួយឆ្នាំលោក ទ្រី អាចទទួលបានប្រាក់ចំណេញប្រមាណ ១,៥ម៉ឺនដុល្លារ ពីការលក់ទំពាំងផ្អែម និងពី ២ ទៅ ៣ម៉ឺនដុល្លារ ក្នុងការលក់កូនឫស្សីផ្អែម។
ទំពាំងផ្អែម ជាដំណាំមិនរើសប្រភេទដីនោះទេ ពោលឲ្យតែមានទឹកគ្រប់គ្រាន់ និងជីធម្មជាតិ ជំនួយប៉ុណ្ណោះ។ បើតាមលោក ទ្រី លើផ្ទៃដី ១ហិកតា ត្រូវដាំឫស្សី ៣ ទៅ ៤ពាន់គុម្ព។ ចំពោះការដាំឫស្សីផ្អែម មាន ៣ប្រភេទគឺ វិធីផ្សាំកូន, វិធីបំបៅ និងគាស់គល់យកមកដាំតែម្ដង។ បើតាមលោក អ៊ឹង ទ្រី ជាមធ្យមរយៈពេលប្រមាណ ៨ខែ ទំពាំងផ្អែម នឹងអាចប្រមូលផល ហើយបើការថែទាំល្អត្រឹមរយៈពេល ៣ខែ ទំពាំងនឹងចាប់ផ្ដើមដុះ និងអាចប្រមូលផលជាបន្តបន្ទាប់។
កត្តាប្រឈមសម្រាប់ដំណាំប្រភេទនេះ អាចមានផលលំបាកនៅរដូវប្រាំងបន្តិចប៉ុណ្ណោះ ព្រោះត្រូវការទឹកសម្រាប់ផ្គត់ផ្គង់។ ដំណាំឫស្សី ទំពាំងផ្អែមនេះ មិនមានក្ដីបារម្ភទៅលើបញ្ហា សត្វល្អិត មកបំផ្លាញឡើយ តែត្រូវការមើលថែ បោចស្មៅ និងដាក់ជីបំប៉ន នៅរយៈពេលដាំ ៣ខែ ដំបូងប៉ុណ្ណោះ៕