របាយការណ៍ពីក្រសួងសុខាភិបាលនាថ្ងៃទី៣០ឧសភា បានបង្ហាញថា ពលរដ្ឋទូទាំងប្រទេសជាង២,៥៦លាននាក់ ដែលបានចាក់វ៉ាក់សាំងកូវីដ-១៩នេះ មានពលរដ្ឋ១,៥៨១,៦១៥នាក់ បានចាក់វ៉ាក់សាំងរបស់ក្រុមហ៊ុនSinovac, ពលរដ្ឋ៨២៩,២២២នាក់ បានចាក់វ៉ាក់សាំងរបស់Sinopharm និង១៥៦,៦៥៦នាក់ទៀត បានចាក់វ៉ាក់សាំងCovishield(Astra Zeneca)។ កម្ពុជាផ្តើមចាក់វ៉ាក់សាំងបង្ការជំងឺកូវីដ-១៩ ជូនពលរដ្ឋ និងកងកម្លាំងយោធា តាំងពីថ្ងៃទី១០កុម្ភៈ ឆ្នាំ២០២១មក។

 

ដោយឡែក ក្នុងចំណោមមនុស្សជាង២,៤លាននាក់ ដែលបានចាក់វ៉ាក់សាំងកូវីដ-១៩នេះ គឺមាន៨៩៦,៤៣២នាក់ ជាពលរដ្ឋរស់នៅក្នុងហានិភ័យខ្ពស់ក្នុងការឆ្លងជំងឺកូវីដ-១៩នៃភូមិសាស្រ្តរាជធានីភ្នំពេញ មានខណ្ឌមានជ័យ ខណ្ឌដង្កោ ខណ្ឌកំបូល ខណ្ឌពោធិ៍សែនជ័យ ខណ្ឌទួលគោក និងខណ្ឌឫស្សីកែវ។ ពលរដ្ឋទាំងនេះបានចាក់វ៉ាក់សាំងកូវីដ-១៩ ដោយក្រុមគ្រូពេទ្យរបស់ក្រសួងការពារជាតិ ចាប់ពីថ្ងៃទី១ឧសភា ឆ្នាំ២០២១មក។ 

 

ក្រៅពីខណ្ឌទាំងលើនេះ មន្តី្រជំនាញរបស់ក្រសួងសុខាភិបាលក៏កំពុងចាក់វ៉ាក់សាំងបង្ការជំងឺកូវីដ-១៩ ឱ្យពលរដ្ឋក្នុងខណ្ឌចំការមន ខណ្ឌ៧មករា និងខណ្ឌច្បារអំពៅ ផងដែរ។ ការចាក់វ៉ាក់សាំងក្នុងខណ្ឌទាំង៣នេះ ចាប់ផ្តើមសម្រាប់ដូសទី១ នៅថ្ងៃទី២៥ឧសភា រហូតដល់ ថ្ងៃទី៧មិថុនា។ សម្រាប់ការចាក់ដូសលើកទី២ នឹងចាប់ផ្តើមអនុវត្តពីថ្ងៃទី៣មិថុនា រហូតដល់ថ្ងៃទី២១មិថុនា ឆ្នាំ២០២១។ ពលរដ្ឋទាំងអស់ក្នុងរាជធានីភ្នំពេញ នឹងទទួលបានការចាក់វ៉ាក់សាំងគ្រប់គ្នាៗ ទៅតាមជំហានកម្មវិធីការងារ យ៉ាងយូរបំផុតក្នុងអំឡុងខែមិថុនា ឆ្នាំ២០២១។

 

គិតត្រឹមពេលនេះ កម្ពុជាមានវ៉ាក់សាំងបង្ការជំងឺកូវីដ-១៩ ចំនួន៦,០២៤,០០០ដូស សម្រាប់ចាក់ជូនប្រជាពលរដ្ឋ។ ក្នុងនោះ មានវ៉ាក់សាំងCovishield ចំនួន៣២៤,០០០ដូស, វ៉ាក់សាំងរបស់ក្រុមហ៊ុនSinopharm ចំនួន១,៧លានដូស និងវ៉ាក់សាំងរបស់Sinovac ចំនួន៤លានដូស។ កាលពីថ្ងៃទី២៩ឧសភា សម្តេច ហ៊ុន សែន បានបញ្ជាក់ថា កម្ពុជា នឹងទទួលបានវ៉ាក់សាំងបង្ការជំងឺកូវីដ-១៩ ចំនួន៤,៥លានដូសទៀត នៅក្នុងខែមិថុនា ឆ្នាំ២០២១៕