ភ្នំពេញ លោកស្រី អ៊ី ដារី ប្រធាននាយកដ្ឋានបណ្ណសារដ្ឋានជាតិនៃកម្ពុជា បានទទួលមរណភាព នៅម៉ោង៥កន្លះព្រឹក ថ្ងៃទី៦ ខែមិថុនា ឆ្នាំ២០២១នេះ ដោយរោគាពាធ ក្នុងអាយុ៥៦ឆ្នាំ។ សពនឹងត្រូវបូជា នៅវេលាម៉ោង៥ល្ងាច ថ្ងៃដដែលនេះ នៅវត្តទួលសង្កែ។
បើតាមលោក ហង់ អង្គារ៍សិរីបុត្រា ត្រូវជាកូនប្រុស បានប្រាប់សារព័ត៌មានថ្មីៗថា លោកស្រី អ៊ី ដារី ទើបតែធ្លាក់ខ្លួនឈឺរយៈពេល៣ថ្ងៃមុនប៉ុណ្ណោះ។ លោក អង្គារ៍សិរីបុត្រា បញ្ជាក់បន្ថែមដូច្នេះ៖«គាត់គាំងបេះដូង ហើយនឹងមានជំងឺទឹកនោមផ្អែម»។
លោកស្រី អ៊ី ដារី បានចូលរួមចំណែក ក្នុងការថែរក្សាបណ្ណសារសាធារណរបស់រដ្ឋ ដែលបានបន្សល់ទុកតាំងពីសម័យអាណានិគមនិយមបារាំង រហូតដល់បច្ចុប្បន្ន។ ពិសេសបណ្ណសារដែលពុកផុយ ត្រូវបានជួសជុលឡើយវិញ សម្រាប់ការសិក្សាស្រាវជ្រាវ។
ខាងក្រោមនេះគឺជាជីវប្រវត្តិរបស់លោកស្រី អ៊ី ដារី ដែលត្រូវបានផ្ដល់ឱ្យដោយគ្រួសារនៃសព៖
លោកស្រី អ៊ី ដារី កើតនៅថ្ងៃទី១៨ ខែមិថុនា ឆ្នាំ១៩៦៥ នៅសង្កាត់លេខ២ ក្រុងភ្នំពេញ ដែលមានលោកឪពុកឈ្មោះ អ៊ី ឌីម និងអ្នកម្ដាយ កុល ឌឹមយាន ក្នុងគ្រួសារដែលមានជីវភាពសមរម្យ។ លោកស្រី អ៊ី ដារី មានបងប្អូនបង្កើតចំនួន៦នាក់ ដោយក្នុងនោះស្រី២។ លោកស្រីជាកូនទី៤ក្នុងគ្រួសារ។
ពីកុមារភាព កុមារី អ៊ី ដារី មានអត្តចរិតសុភាពរាបសារ ស្លូតបូត ចេះគោរពចាស់ទុំ និងជាបងស្រីដែលចេះមើលថែរក្សារប្អូនៗបានយ៉ាងល្អ។ ឆ្នាំ១៩៧២ កុមារី អ៊ី ដារី បានចូលរៀននៅសាលាមធ្យមសិក្សាសុធារស។ ក្នុងឆ្នាំ១៩៨៦ លោកស្រី បានបញ្ចប់មធ្យមសិក្សាទុតិយភូមិនៅវិទ្យាល័យបាក់ទូក។ លោកស្រី បានបញ្ចប់បរិញ្ញាបត្រផ្នែកសេដ្ឋកិច្ចបណ្ណាល័យ នៅសហភាពសូវៀតឆ្នាំ១៩៩២ ក្រោយមកបន្តថ្នាក់ជំនាញបច្ចេកទេស ផ្នែកគ្រប់គ្រងឯកសារ នៅប្រទេសម៉ាឡេស៊ី ក្នុងឆ្នាំ១៩៩៦។
អ្នកស្រី អ៊ី ដារី ក៏បានសិក្សាវគ្គជំនាញថែរក្សាឯកសារបេតិកភ័ណ្ឌនៅប្រទេសសិង្ហបុរី ឆ្នាំ២០១០ និងវគ្គជំនាញបច្ចេកទេសគ្រប់គ្រង និងថែរក្សាឯកសារនៅប្រទេសកូរ៉េ ឆ្នាំ២០១២ ផងដែរ។
ក្នុងឆ្នាំ១៩៩៤ លោកស្រី អ៊ី ដារី បានចូលបម្រើការងារជាបុគ្គលិក នៃនាយកដ្ឋានតម្កល់ឯកសារជាតិ នៃទីស្ដីការគណៈរដ្ឋមន្ត្រី។ ឆ្នាំ១៩៩៧ លោកស្រី ត្រូវបានតែងតាំងជាប្រធានការិយាល័យ។ ឆ្នាំ២០១២ លោកស្រី ត្រូវបានតែងតាំងជាអនុប្រធាននាយកដ្ឋាន និងចុងក្រោយនៅឆ្នាំ២០១៤ លោកស្រី ត្រូវបានតែងតាំងជាប្រធាននាយកដ្ឋានតម្កល់ឯកសារជាតិ នៃអគ្គនាយកដ្ឋានរាជកិច្ច និងតម្កល់ឯកសារជាតិ នៃទីស្ដីការគណៈរដ្ឋមន្ត្រី។ ក្នុងឆ្នាំ២០១៩ លោកស្រី ត្រូវបានតែងតាំងជាអនុប្រធានលេខាធិការដ្ឋាននៃក្រុមប្រឹក្សាបណ្ណសារនៃទីស្ដីការគណៈរដ្ឋមន្ត្រី។
ឈានដល់វ័យ៥០ឆ្នាំ លោកស្រីបានរៀបអាពាហ៍ពិពាហ៍ជាមួយនឹងលោក គង់ តារី ក្នុងឆ្នាំ២០១៥។ លោកស្រី អ៊ី ដារី ក៏ជាពុទ្ធសាសនោបត្ថម្ភមួយរូប ដែលមានចិត្តសទ្ធាជ្រះថ្លា ដោយតែងតែចូលរួមចំណែកក្នុងព្រះពុទ្ធសាសនា គ្រប់ទីវត្តអារាម៕