ស្ថានទូតអាមេរិក បានបញ្ជាក់ថា លោក Marcus M. Ferrara បានធ្វើដំណើរទៅសមុទ្រមូលដ្ឋានសមុទ្ររាម នៅថ្ងៃទី១១ មិថុនានេះ តាមរយៈការសម្របសម្រួលជាមួយអាជ្ញាធរកម្ពុជា ។ 

ប៉ុន្តែនៅក្នុងដំណើរទស្សនកិច្ចដ៏ខ្លីនោះ មន្រ្តីយោធាកម្ពុជាមិនបានអនុញ្ញាតឲ្យលោកអនុព័ន្ធយោធាទៅមើលគ្រប់កន្លែង នៅក្នុងមូលដ្ឋានកងទ័ពជើងទឹកនោះទេ។ នេះជាការបញ្ជាក់របស់ស្ថានទូតអាមេរិក។
 

ស្ថានទូតអាមេរិក បានសរសេរលើហ្វេសប៊ុកខ្លួន ទាំងភាសាខ្មែរ និងអង់គ្លេសយ៉ាងដូច្នេះថា៖«នៅពេលដឹងច្បាស់ថា លោកមិនត្រូវបានអនុញ្ញាតឲ្យចូលមើលបានអស់ លោកវរសេនីយឯក Ferrara បានបញ្ចប់ការដើរមើល ហើយបានស្នើសុំឲ្យមន្រ្តីយោធាកម្ពុជាកំណត់ពេលទស្សនកិច្ចឡើងវិញ ដោយអនុញ្ញាតឲ្យមានការដើរមើលគ្រប់កន្លែង នៅក្នុងពេលខាងមុខឲ្យបានឆាប់បំផុត»។
 

ជាមួយគ្នានេះស្ថានទូតអាមេរិក បានបញ្ជាក់ទៀតថា ទស្សនកិច្ចរបស់អនុព័ន្ធយោធាអាមេរិក និងអនុព័ន្ធយោធាបរទេសដទៃទៀត នៅមូលដ្ឋានកងទ័ពជើងទឹករាម អាចជាជំហានមួយយ៉ាងសំខាន់ ឆ្ពោះទៅរកតម្លាភាព និងការទុកចិត្តគ្នាទៅវិញទៅមក។
 

ជុំវិញបញ្ហានេះ សារព័ត៌មានថ្មីៗ មិនអាចទាក់ទងលោក ឈុំ សុជាតិ អ្នកនាំពាក្យក្រសួងការពារជាតិ ដើម្បីសុំការអត្ថាធិប្បាយតបការលើកឡើងរបស់អនុព័ន្ធយោធាអាមេរិក លោកវរសេនីយឯក Marcus M. Ferrara តាមរយៈស្ថានទូតអាមេរិកប្រចាំកម្ពុជាបានឡើយ។
 

ចំណែកលោក អ៊ុក សីហា មេបញ្ជាការរងកងទ័ពជើងទឹក មេបញ្ជាការមូលដ្ឋានសមុទ្រ សុំមិនអត្ថាធិប្បាយឡើយ ដោយលោកអះអាងថា ខ្លួនកំពុងជាប់រវល់។

 ក្នុងដំណើរទស្សនកិច្ចរយៈពេលខ្លី កាលពីថ្ងៃទី១ មិថុនា អនុរដ្ឋមន្រ្តីការបរទេសសហរដ្ឋអាមេរិកលោកស្រី Wendy Sherman បានជួបពិភាក្សាជាមួយសម្ដេចនាយករដ្ឋមន្រ្តី ហ៊ុន សែន ដោយបង្ហាញក្តីព្រួយថា កម្ពុជា អាចផ្ដល់ទីតាំងមូលដ្ឋានទ័ពរាម ឱ្យកងទ័ពចិនឈរជើងនោះទីនោះ។ ដោយសារក្តីព្រួយបារម្ភនេះ ទើបសម្ដេច ហ៊ុន សែន បានសម្រេចឱ្យអនុព័ន្ធយោធានៃស្ថានទូតអាមេរិកប្រចាំកម្ពុជា ចុះទៅពិនិត្យមើល នៅមូលដ្ឋានកងទ័ពជើងទឹករាម ដើម្បីបញ្ឈប់ការសង្ស័យនេះ៕