តាមរយៈបណ្តាញទំនាក់ទំនងសង្គម លោក វេង សាខុន បានបញ្ជាក់នៅលើគណនីហ្វេសប៊ុករបស់ខ្លួន នាព្រឹកថ្ងៃទី១១មិថុនាថា «គម្រោងប្រកួតប្រជែងខ្សែច្រវាក់តម្លៃ និងលើកកម្ពស់សុវត្ថិភាពកសិកម្ម» នេះជាគម្រោងទី៦ ដែលត្រូវបានបង្កើតឡើងដើម្បីគាំទ្រដល់ ការអនុវត្តគោលនយោបាយរបស់រាជរដ្ឋាភិបាល និងផែនការយុទ្ធសាស្រ្តរបស់ក្រសួងកសិកម្ម។ គម្រោងនេះ ផ្ដោតការយកចិត្តទុកដាក់ជាសំខាន់លើ ការពង្រឹងខ្សែច្រវាក់តម្លៃផលិតផលកសិកម្មប្រកបដោយភាពប្រកួតប្រជែង។ 

 

បើតាមលោក វេង  សាខុន  គម្រោងប្រកួតប្រជែងខ្សែច្រវាក់តម្លៃផលិតផលកសិកម្ម ដែលក្រសួងកសិកម្មកំពុងអនុវត្តរហូតដល់ឆ្នាំ២០២៧ ក្រោមទំហំថវិកាជាង១០០លានដុល្លារនេះ ដោយក្នុងនោះមានថវិកាចំនួន៧០លានដុល្លារ គឺជាកម្ចីដែលកម្ពុជា បានពីធនាគារអភិវឌ្ឍន៍អាស៊ី(ADB)។ ក្រៅពីប្រាក់កម្ចីរបស់ADB កម្ពុជាក៏ទទួលបានថវិកា ៥លានទៀត បានពីកម្ចីមូលនិធិអាស៊ានសម្រាប់ហេដ្ឋារចនាសម្ព័ន្ធ(AIF) និង២៥លានដុល្លារ ពីទីភ្នាក់ងារបារាំងសម្រាប់ការអភិវឌ្ឍន៍(AFD)។

 

ចំពោះថវិកាជាង១០លានដុល្លារទៀត ដែលសម្រាប់អនុវត្តគម្រោងប្រកួតប្រជែងខ្សែច្រវាក់តម្លៃផលិតផលកសិកម្មនេះ លោកវេង សាខុន បានបញ្ជាក់ថា ក្នុងចំណោមថវិកានេះ មាន៣លានដុល្លារ បានពីជំនួយឥតសំណងរបស់មូនិធិជប៉ុន សម្រាប់កាត់បន្ថយភាពក្រីក្រ (JFPR) និង ៧,៦លានដុល្លារទៀត  គឺជាថវិកាបដិភាគរបស់រាជរដ្ឋាភិបាល។ 

 

«ការអនុវត្តអនុវត្តគម្រោងប្រកួតប្រជែងខ្សែច្រវាក់តម្លៃផលិតផលកសិកម្មនេះ នឹងផ្ដល់ផលដល់សហគមន៍កសិកម្មចំនួនប្រមាណ២៣០ដែលមានគ្រួសារប្រមាណ ២៧,០០០ និង សហគ្រាសកសិកម្មចំនួនប្រមាណ៥០ នៅក្នុងខេត្តគោលដៅគម្រោងចំនួន៦»។ នេះជាការអះអាងបន្ថែមរបស់លោករដ្ឋមន្ត្រីកសិកម្ម ដោយបានបន្តរៀបរាប់ថា ខេត្តគោលដៅទាំង៦ សម្រាប់អនុវត្តគម្រោងប្រកួតប្រជែងខ្សែច្រវាក់តម្លៃផលិតផលកសិកម្ម មានខេត្តត្បូងឃ្មុំ កំពង់ចាម កំពង់ធំ សៀមរាប ឧត្ដរមានជ័យ និងខេត្តព្រះវិហារ។

 

តាមរយៈគម្រោងប្រកួតប្រជែងខ្សែច្រវាក់តម្លៃផលិតផលកសិកម្ម ដែលកំពុងអនុវត្តនេះ លោក វេង សាខុន រំពឹងថា  ភាពតភ្ជាប់ទំនាក់ទំនងក្នុងខ្សែច្រវាក់តម្លៃកសិកម្ម ត្រូវបានកែលម្អ ដោយនៅក្នុងនោះផ្លូវតភ្ជាប់ពីកសិដ្ឋានផលិតទៅកាន់ទីផ្សារ នៅក្នុងតំបន់គោលដៅគម្រោងប្រវែងង ១១០គីឡូម៉ែត្រ នឹងត្រូវកែលម្អឱ្យប្រសើរឡើង ដែលអាចជួយកាត់បន្ថយពេលវេលា និងតម្លៃដឹកជញ្ជូន បង្កើនបរិមាណនៃការដឹកជញ្ជូន និងកាត់បន្ថយតម្លៃថែទាំផ្លូវ ៕