ស្ថិតនៅភូមិត្រពាំងអញ្ចាញ ឃុំស្វាយជ្រុំ លោក សុខ ហៃ ចាប់ផ្ដើមចិញ្ចឹមត្រី បានរយៈពេល៣ឆ្នាំហើយ។ មកដល់ពេលបច្ចុប្បន្ន កសិករខេត្តកំពង់ឆ្នាំងរូបនេះ ពង្រីកបានស្រះចិញ្ចឹមត្រីធំៗចំនួន២ ដោយក្នុងមួយស្រះមានត្រីប្រមាណ១៣ម៉ឺនក្បាល។
 

«ក្នុងមួយរដូវកាលនៃការដាក់កូនត្រីចិញ្ចឹម អាចប្រមូលផលបានចន្លោះពី៥០តោន ទៅ៨០តោន ក្នុងមួយស្រះ»។ នេះបើតាមការលើកឡើងរបស់លោក សុខ ហៃ ដោយបន្តថា ក្នុងការដាក់កូនត្រីពូជចិញ្ចឹម លោក បានគម្លាតពេលវេលាដាក់ខុសៗគ្នា រវាងស្រះនីមួយៗ ដើម្បីឲ្យត្រីទាំងនោះ ធំធាត់បណ្ដាស់គ្នា ងាយស្រួលប្រមូលផលលក់បន្តបន្ទាប់។
 

ទោះបីជាកសិកររូបនេះ ចិញ្ចឹមត្រីក្នុងរយៈពេលខ្លី ប៉ុន្តែលោក សុខ ហៃ បានទទួលការបណ្ដុះបណ្ដាលពីមន្រ្តីជំនាញ ពាក់ព័ន្ធនឹងបច្ចេកទេសចិញ្ចឹម ការថែទាំ និងផ្ដល់ចំណីជាដើម។ ផ្អែកលើបច្ចេកទេសទាំងនេះ លោក រំពឹងថានឹងទទួលបានទិន្នផលបានច្រើនជាបន្តបន្ទាប់។ នេះបើតាមហ្វេសប៊ុកលោក វេង សាខុន ដដែល។
 

សូមបញ្ជាក់ថា រយៈពេល៦ខែ ឆ្នាំ២០២១ ខេត្តកំពង់ឆ្នាំងទទួលបានទិន្នផលវារីវប្បកម្មសរុបចំនួន១០៥០០តោន មានស្រះចិញ្ចឹមចំនួន៦៣១ស្រះ ស្មើ៧៣០០តោន។ នេះបើតាមរបាយការណ៍របស់រដ្ឋបាលជនផលខេត្តកំពង់ឆ្នាំង៕