បើតាមការចុះផ្សាយរបស់អគ្គស្នងការដ្ឋាននគរបាលជាតិ ការបញ្ជារបស់លោក នេត សាវឿន ឱ្យតាមចាប់ខ្លួនជនដែលក្លែងបន្លំជាមន្ត្រីនគរបាលនេះ គឺធ្វើឡើងបន្ទាប់ពី ទទួលបានដំណឹងថា មានក្រុមឆ្លៀតឱកាលសម្លុតទារប្រាក់ពលរដ្ឋ ធ្វើជាថ្នូរនៃការដោះលែង។

 

ជនសង្ស័យទាំង៤នាក់ ដែលក្លែងបន្លំជាមន្ត្រីនគរបាល ដើម្បីជំរិតទារប្រាក់ពីពលរដ្ឋនោះ មាន៣នាក់ ត្រូវបានចាប់ខ្លួន នាពីថ្ងៃទី១៧មិថុនា ឆ្នាំ២០២១ ដែលស្ថិតភូមិកំរៀង សង្កាត់ព្រៃវែង ខណ្ឌដង្កោ រាជធានីភ្នំពេញ ខណៈម្នាក់ទៀត ត្រូវបានប៉ូលិសចាប់បាននៅថ្ងៃទី១៨មិថុនា។ការចុះផ្សាយរបស់អគ្គស្នងការនគរបាលជាតិ បានបន្តរៀបរាប់ដូច្នេះ៖«កាលពីថ្ងៃទី១៧មិថុនា សមត្ថកិច្ចមូលដ្ឋាន បានឃើញជនទាំងនោះចេញធ្វើសកម្មភាពរួមទាំងពាក់ឯកសណ្ឋាននគរបាល»។ 
 

បន្ទាប់ពីឃាត់ខ្លួនជនសង្ស័យទាំងនោះបានហើយ សមត្ថកិច្ចបានឃាត់បាននូវវត្ថុតាងជាច្រើនទៀតផងដែរ។ រួមមាន រថយន្ត ម៉ូតូ កាំភ្លើង ឯកសណ្ឋានមន្រី្តនគរបាល និងឧបករណ៍ធ្វើតេស្តសារធាតុញៀន ជាដើម។

បច្ចុប្បន្នសមត្ថកិច្ចកំពុងរៀបចំកសាងសំណុំរឿង ដើម្បីបញ្ចូនអ្នកទាំង៤នាក់នោះទៅតុលាការ៕