នាជំនួបត្រីភាគីតាមអនឡាញជាមួយមេដឹកនាំបារាំង និងអាល្លឺម៉ង់ លោក ស៊ី ជិនភីង ប្រធានាធិបតីចិន បញ្ជាក់ថា ចិន និងអឺរ៉ុប អាចបង្កើនកិច្ចសហការរវាងគ្នាដើម្បីឆ្លើយតបបញ្ហាប្រឈមសាកលឱ្យល្អប្រសើរ ហើយលោកក៏សង្ឃឹមថា អឺរ៉ុបអាចដើរតួកាន់តែសកម្មក្នុងកិច្ចការអន្តរជាតិ មានឯករាជ្យផ្ទាល់ខ្លួន និងផ្ដល់បរិយាកាសសមស្រប មិនលម្អៀង និងតម្លាភាពសម្រាប់ការវិនិយោគរបស់ក្រុមហ៊ុនចិនផងដែរ។

 

បើតាមទីភ្នាក់ងារព័ត៌មានរដ្ឋចិន Xinhua មេដឹកនាំចិន ក៏លើកជាយោបល់ទៅកាន់ប្រធានាធិបតីបារាំង និងអធិការបតីអាល្លឺម៉ង់ពីការបង្កើតទំនាក់ទំនងប្រទេសមហាអំណាចដែលផ្ដោតលើស្ថិរភាព និងតុល្យភាព។ ត្រង់នេះ លោក ស៊ី ក៏ឆ្លៀតរំឭកពីជំហររបស់ចិនដែលដើរលើផ្លូវអភិវឌ្ឍខ្លួនឯងឱ្យរីកចម្រើន និងមិនប្រកួតប្រជែងជាមួយប្រទេសណាឡើយ។

 

«អ្វីដែលចិនស្រេកឃ្លានបំផុត គឺអភិវឌ្ឍខ្លួនឯងជាជាងជំនួសតំណែងអ្នកណា។» ប្រមុខរដ្ឋចិនបញ្ជាក់បែបនេះចំពោះមុខលោក អេម៉ានុយអែល ម៉ាក្រុង និងលោកស្រី អែនជែឡា មឺហ្គែល មុនបន្តថា ចិនត្រៀមខ្លួនសម្រាប់កិច្ចសហប្រតិបត្តិការ និងកិច្ចសន្ទនាជាមួយភាគីផ្សេង តែក៏មិនភ្លេចការពារផលប្រយោជន៍របស់ខ្លួនដែរ។ ទោះមិននិយាយឱ្យច្បាស់ លោក ស៊ី ទំនងចង់និយាយការពារការងើបឡើងរបស់ចិនដែលត្រូវគេមើលឃើញថា ប្រជែងតំណែងមហាអំណាចទីមួយរបស់អាមេរិក។ 

 

នាជំនួបតាមអនឡាញដដែល មេដឹកនាំទាំងបីក៏ជជែកពីបម្រែបម្រួលអាកាសធាតុ ជំងឺកូវីដ-១៩ ពាណិជ្ជកម្មអន្តរជាតិ និងបញ្ហាអន្តជាតិនានា។ ក្នុងសេចក្ដីថ្លែងការណ៍របស់វិមានប្រធានាធិបតីបារាំង លោក ម៉ាក្រុង និងលោកស្រី មឺហ្គែល បានលើកឡើងពីសារសំខាន់ដែលចិនបើកទីផ្សាររបស់ខ្លួន និងបង្កើតបរិយាកាសប្រកួតប្រជែងឱ្យមានយុត្តិធម៌។ មេដឹកនាំរដ្ឋអឺរ៉ុបក៏សង្កត់ធ្ងន់ពីភាពចាំបាច់ដែលចិនត្រូវផ្អាកកម្ចីសម្រាប់គម្រោងរោងចក្រថាមពលធ្យូងថ្មផងដែរ។

 

លោក ម៉ាក្រុង និងលោកស្រី មឺហ្គែល ក៏ឆ្លៀតនិយាយរឿងសិទ្ធិមនុស្សនៅចិន និងការបង្ខំឱ្យធ្វើពលកម្មផងដែរ។ មេដឹកនាំទាំងពីរមិននិយាយចំឈ្មោះស៊ីនជាំងទីដែលអង្គការអន្តរជាតិនានាចោទចិនថា ឃុំឃាំងជនភាគតិចជាងមួយលាននាក់ឡើយ៕ ​