មិនតែប៉ុណ្ណោះសម្ដេច ហ៊ុន សែន ក៏បានបញ្ចាឱ្យកងកម្លាំងដឹកជញ្ជនរបស់កងយោធពលខេមរភូមិន្ទ បន្ថែមរថយន្តសម្រាប់ដឹកពលករ ដែលត្រូវអនុញ្ញាតឱ្យចេញពីមណ្ឌល ទៅធ្វើចត្តាឡីស័កតាមផ្ទះវិញនោះ ដាក់តាមគោលដៅនីមួយៗឱ្យបានល្អត្រឹមត្រូវផង។ បើតាមសម្ដេច ហ៊ុន សែន ការរៀបចំធ្វើបែបនេះ គឺដើម្បីដោះស្រាយ និងសម្រួលដល់ពលករខ្មែរ កំពុងជាប់គាំងនៅតាមច្រកព្រំដែនកម្ពុជា-ថៃ។
 

«ដូច្នេះសុំឯកឧត្តម លោកជំទាវ នៅតាមបណ្ដាខេត្ត សូមរៀបចំបន្ថែមនូវទីកន្លែង ដែលត្រូវធ្វើចត្តាឡីស័កសម្រាប់ទទួលបងប្អូន ដែលវិលត្រឡប់មកពីព្រំដែនកម្ពុជា-ថៃ […] ចូលទៅក្នុងមណ្ឌលចត្តាឡីស័ក នៅតាមទីកន្លែងដែលបានរៀបចំ។ អ៊ីចឹងម្ខាងត្រូវរៀបចំទីកន្លែងថ្មី និងម្ខាងទៀតគឺត្រូវរៀបចំផ្ទេរអ្នកដែលកំពុងធ្វើចត្តាឡីស័ក ទៅធ្វើចត្តាឡីស័កនៅតាមផ្ទះរបស់ខ្លួនវិញ ដើម្បីត្រៀមបម្រុងទុកទីកន្លែង [ចត្តាឡីស័ក]នេះ សម្រាប់ទទួលបងប្អូនមកពីប្រទេសថៃ»។ នេះជាការបញ្ជាក់របស់ប្រមុខរដ្ឋាភិបាល។