លោក វ៉ាន់ ​សុជា ប្រធានផ្នែកអប់រំនៃមជ្ឈមណ្ឌលអង្គរសម្រាប់ការអភិរក្សជីវៈចម្រុះរបស់អង្គការ ACCB បានប្រាប់សារព័ត៌ថ្មីៗថា ជំហានដំបូងក្រុមការងារលោក បានដាក់ស្លាកលើសត្វត្រដក់តូច ១ក្បាលសិន ដើម្បីសិក្សាមើល។ ជាផែនការបន្ទាប់មក ក្រុមការងារលោក នឹងបិតស្លាកសម្គាល់លើត្រដក់៤ក្បាលទៀត ដែលត្រូវលែងចូលព្រៃនៅចុងឆ្នាំនេះ។

 

« ក្នុងឆ្នាំនេះមុនពាក់កណ្ដាលខែសីហា ពួកយើងបានលែងត្រដក់ចូលព្រៃធម្មជាតិបានចំនួន៧ក្បាល តែមានតែមួយក្បាលទេ ដែលបានពាក់ស្លាកឱ្យ ហើយនៅបន្ទាប់ពីខែនេះ ទៅដល់ចុងឆ្នាំ២០២១ ក្រុមការងារនឹងលែងត្រដក់ចំនួន៦ក្បាលទៀត ក្នុងនោះនឹងបំពាក់ស្លាកចំណាំចំនួន៤ក្បាល បន្ថែមមុនលែងចូលព្រៃ»។ នេះជាការបញ្ជាក់របស់លោក សុជា។ 

 

ប្រធានផ្នែកអប់រំនៃអង្គការ ACCBរូបនេះ បានបន្ថែមថា ការពាក់ស្លាកសម្រាប់សត្វ មុនពេលលែងចូលព្រៃនេះ មានសារៈសំខាន់២យ៉ាង គឺទុក​កំណត់ចំណាំបានថា សត្វទាំងនោះត្រូវបានលែងដោយអង្គការ និងធ្លាប់បានស្ដានីតិសម្បទា និងម្យ៉ាងទៀតវាងាយស្រួលដល់ការឃ្លាំមើលពីការរស់នៅរបស់វា ដើម្បីដឹងពីស្ថានភាពនៃការសម្របខ្លួន នៅក្នុងធម្មជាតិ។ ជាពិសេសបង្ហាញថា សត្វទាំងនេះ ត្រូវបានការពារអភិរក្សដោយអង្គការនិងច្បាប់។ 

 

« ការដាក់ស្លាកនេះ ក្រុមការងារដាក់ទៅលើសត្វស្លាបធំៗតែប៉ុណ្ណោះ ហើយនៅក្នុមជ្ឈមណ្ឌលACCBសព្វថ្ងៃ មានតែត្រដក់ទេជាសត្វធំជាងគេ ដូចយើងក៏សម្រេចដាក់លើវា។ បន្ទាប់ពីនេះ បើមានសត្វធំៗផ្សេងទៀត​ក៏អាចនឹងដាក់ដូចគ្នា»។ នេះជាការពន្យល់របស់លោក សុជា។

 

បច្ចុប្បន្នមជ្ឈមណ្ឌលអង្គរសម្រាប់ការអភិរក្សជីវៈចម្រុះរបស់អង្គការ ACCB មានសត្វដែលកំពុងស្ដារនិតិសម្បទា ជាង១ពាន់ក្បាល ដែលស្មើ៥០ប្រភេទ ក្នុងនោះមានទាំងសត្វស្លាប ល្មូន និងសត្វផ្សេងទៀត៕