ជាតិ
សុខភាព
វីតាមីន K ជួយកាត់បន្ថយហានិភ័យជំងឺត្បៀតសរសៃឈាមបេះដូង រូបថត Pixabay
× ការស្រាវជ្រាវថ្មីមួយ បានរកឃើញថា អ្នកដែលបានទទួលទានអាហារមានវីតាមីន K ច្រើន អាចកាត់បន្ថយហានិភ័យនៃការកើតជំងឺត្បៀតសរសៃឈាមបេះដូង បានប្រមាណ៣៤ភាគរយ។ វីតាមីន K ត្រូវបានបែងចែកជា២ K1 និង K2 ដែលមានក្នុងប្រភេទអាហារផ្សេងគ្នា តែមានប្រយោជន៍ ចំពោះសុខភាពបេះដូងដូចគ្នា។
ការស្រាវជ្រាវថ្មីនៅសាកលវិទ្យាល័យ Edith Cowan របស់អូស្ត្រាលី បានបង្ហាញថា ការទទួលទានវីតាមីន K ច្រើន អាចការពារប្រឆាំងនឹងជំងឺបេះដូងគ្រប់ប្រភេទ ពិសេសអាចកាត់បន្ថយហានិភ័យនៃជំងឺត្បៀតសរសៃឈាមបេះដូងបាន ៣៤ភាគរយទៀតផង។ ការសិក្សាខាងលើធ្វើឡើង ដោយពិនិត្យទិន្នន័យរបស់អ្នកចូលរួម ៥ម៉ឺននាក់ ក្នុងរយៈពេល ២៣ឆ្នាំ។
«ការស្រាវជ្រាវបានអះអាងថា ការទទួលទានវីតាមីន K មានសារៈសំខាន់ណាស់ក្នុងការការពារជំងឺត្បៀតសរសៃឈាមបេះដូង»។ អ្នកកត់ត្រាការស្រាវជ្រាវ លោកស្រី Nicola Bondonno បានលើកឡើងបែបនេះ ដោយបន្ថែមថា វីតាមីន K មានប្រសិទ្ធភាពប្រឆាំង នឹងការបង្កើតជាតិកាល់ស្យូមនៅក្នុងសរសៃឈាមនៃរាងកាយដែលនាំឱ្យមានការកកស្ទះសរសៃឈាម។
វីតាមីន K មានពីរប្រភេទនៅក្នុងអាហារដែលយើងបរិភោគ ហើយវាជួយដល់សុខភាពបេះដូងបានដូចគ្នា។ វីតាមីន K1 មាននៅក្នុងបន្លែស្លឹកបៃតង ផ្កាខាត់ណា ស្ពៃក្តោប និងប្រេងបន្លែ ខណៈវីតាមីន K2 ភាគច្រើនមាននៅក្នុងសាច់សត្វ ស៊ុត ថ្លើមសត្វ និងអាហារមានជាតិមេ ដូចជាឈីសជាដើម។ ការស្រាវជ្រាវ បានរកឃើញថាអ្នកដែលទទួលទានវីតាមីន K1 អាចជួយកាត់បន្ថយហានិភ័យទាក់ទងនឹងជំងឺត្បៀតសរសៃឈាមបេះដូង ២១ភាគរយ។ ចំពោះវីតាមីន K2 អាចជួយកាត់បន្ថយហានិភ័យនៃជំងឺត្បៀតសរសៃឈាមបេះដូងបាន ១៤ ភាគរយ។
ជំងឺត្បៀតសរសៃឈាមបេះដូង នៅតែជាមូលហេតុចម្បងនៃការស្លាប់របស់ប្រជាជនអូស្ត្រាលី។ នេះដោយសារការយល់ដឹងរបស់ពួកគេនៅមានកម្រិតអំពីសារៈសំខាន់ នៃវីតាមីនផ្សេងៗដែលមាននៅក្នុងអាហារ ក្នុងការជួយទប់ស្កាត់ជំងឺគាំងបេះដូង ដាច់សរសៃឈាមខួរក្បាល និងជំងឺត្បៀតសរសៃឈាមជាដើម។ នេះបើតាមការអះអាងរបស់អ្នកកត់ត្រាដំបូងនៃការស្រាវជ្រាវ លោក Jamie Bellinge។
ការសិក្សានេះបានបង្ហាញពីអត្ថប្រយោជន៍វីតាមីន K ទៅលើជំងឺត្បៀតសរសៃឈាមបេះដូង។ ដូចនេះ គ្រប់គ្នាគួរពង្រឹងរបបអាហារដែលល្អចំពោះសុខភាព ដើម្បីការការពារជំងឺត្បៀតសរសៃឈាមបេះដូង និងជំងឺពាក់ព័ន្ធបេះដូងផ្សេងទៀត៕
© រក្សាសិទ្ធិដោយ thmeythmey.com