ស្ថាបនិកផ្ទះចង្រិត (Cricket House) អ្នកស្រី ជូ ឡងឌី បានកែច្នៃចង្រិតជាម្សៅប្រូតេអ៊ីន និងអាហារសម្រន់ សាន់នីចង្រិតលីង ដាក់លក់លើទីផ្សារ រយៈពេលជាង១ឆ្នាំហើយ។ មុនពេលចាប់ផ្ដើមអាជីវកម្មនេះ អ្នកស្រី ឡងឌី មានពិសោធន៍កែច្នៃចំណីអាហារ និងការស្រាវជ្រាវពីបរទេស ហើយក៏សម្លឹងឃើញអត្ថប្រយោជន៍របស់សត្វចង្រិតផងដែរ។ 
 

ស្ថាបនិករូបនេះ បានពន្យល់ថា សត្វចង្រិតមានផ្ទុកសារធាតុប្រូតេអ៊ីនច្រើន ដូចសាច់គោ និងសាច់សត្វដទៃទៀត ប៉ុន្តែទីផ្សារ និងផលិតភាព មានតិចតួចប៉ុណ្ណោះ។ ម្យ៉ាងសត្វចង្រិត​ក៏ពុំទាន់មានការកែច្នៃ សម្រាប់នាំចេញឡើយ ដោយកសិករភាគច្រើន ចិញ្ចឹមសម្រាប់បំពងលក់ធម្មតាប៉ុណ្ណោះ។
 

អ្នកស្រី ឡងឌី ផលិតម្សៅប្រូតេអ៊ីនពីចង្រិត ក្នុង​បំណងបង្កើនទីផ្សារផលិតផលក្នុងស្រុក ដែលមានវត្ថុធាតុដើមស្រាប់ សម្រាប់ដាក់លក់ក្នុងស្រុក និងការនាំចេញ ហើយវាក៏អាចជួយបង្កើនប្រាក់ចំណូលដល់កសិករចិញ្ចឹមចង្រិតផងដែរ។ អ្នកស្រី ជូ ឡងឌី បានលើកឡើងថា៖«ម្សៅប្រូតេអ៊ីនហ្នឹង គេប្រើប្រាស់សម្រាប់ដាក់ញាំជាមួយភេសជ្ជៈ និងម្ហូបផ្សេងៗ ដើម្បីជួយបន្ថែមសារធាតុប្រូតេអ៊ីន ដូចយើងញាំសាច់អ៊ីចឹង។ ហើយវាក៏ជួយដល់សុខភាពយើងដែរ ព្រោះពេលញាំសាច់ច្រើនគឺមិនសូវល្អទេ»។


 

អ្នកស្រី បន្តថា​ បច្ចុប្បន្នម្សៅប្រូតេអ៊ីនចង្រិតរបស់ខ្លួន មិនទាន់មានទីផ្សារនោះទេ ដ្បិតពលរដ្ឋក្នុងស្រុកមិនសូវចាប់អារម្មណ៍។ អ្នកស្រី ជូ ឡងឌី មានបំណងនាំចេញផលិតផលនេះ ទៅទីផ្សារបរទេស ប៉ុន្តែការងារនេះរអាក់រអួលដោយសារកូវីដ-១៩។
 

​ទោះជាយ៉ាងណា អ្នកស្រី ឡងឌី គ្មានបំណងបោះបង់អាជីវកម្មនេះឡើយ ដោយសង្ឃឹមថា ក្រោយវិបត្តិកូវីដ-១៩ វានឹងអាចមានទីផ្សារ និងការនាំចេញ។ «មែនទែនទៅខ្ញុំធ្វើហ្នឹងចំពេលកូវីដ-១៩ អ៊ីចឹងហើយវាពិបាក។ ក្នុងកាលៈទេសៈនេះ ទាំងគេទាំងយើងទទួលស្គាល់ថាពិបាកដូចគ្នា មនុស្សភាគច្រើនគេគិតគូរអាហារចម្បងប្រចាំថ្ងៃ។ អ៊ីចឹងមានតែសង្ឃឹមពេលចប់កូវីដ អាចមានទីផ្សារនាំចេញ។ ប៉ុន្តែខ្ញុំក៏ចង់ឱ្យពលរដ្ឋក្នុងស្រុកគាំទ្រដែរ ព្រោះវាជួយដល់សុខភាព»។ នេះបើតាមការរៀបរាប់របស់អ្នកស្រី ជូ ឡងឌី។
 

ម្សៅប្រូតេអ៊ីនចង្រិតរបស់អ្នកស្រី ឡងឌី លក់ក្នុងតម្លៃ៣០ដុល្លារ ក្នុងមួយគីឡូក្រាម។ ក្រៅពីនេះ ក៏មានអាហារសម្រន់ចង្រិតលីង (មិនប្រើប្រេង) ៤រសជាតិ តម្លៃចន្លោះពី ២.៥​ដុល្លារដល់២.៧៥ដុល្លារ និងចង្រិតសម្ងួតសរីរាង្គ តម្លៃ៨.៩៩ដុល្លារផងដែរ៕