ជាតិ
សង្គមជាតិ
គោបុរៈផ្នែកទី១ប្រាសាទបុរាណនគរបាជ័យដួលរលំដោយសារភ្លៀងខ្យល់ពីរថ្ងៃជាប់គ្នា ក្រុមការងារមន្ទីរវប្បធម៌និងវិចិត្រសិល្បៈខេត្តកំពង់ចាម ចុះត្រួតពិនិត្យ គោបុរៈទី១ផ្នែក ខាងជើងប្រាសាទនគរបាជ័យ។ រូបភាពពីប្រធានការិយាល័យបេតិភណ្ឌខេត្តកំពង់ចាម។
× គោបុរៈ (ខ្លោងទ្វារ) ផ្នែកទី១ខាងជើង នៃប្រាសាទនគរបាជ័យ បានដួលរលំកាលពីល្ងាចថ្ងៃទី២៤ ខែសីហា ដោយសារខ្យល់ និងភ្លៀងខ្លាំងពីរថ្ងៃជាប់។ បច្ចុប្បន្នក្រុមការងារមន្ទីរវប្បធម៌ និងវិចិត្រសិល្បៈខេត្តកំពង់ចាម កំពុងសម្អាត និងប្រមូលថ្មដែលបាក់ដួលរលំនេះទុក ដើម្បីរៀបគម្រោងជួសជុលឡើងវិញ។
លោក សឹង ភារម្យ ប្រធានមន្ទីរវប្បធម៌ និងវិចិត្រសិល្បៈខេត្តកំពង់ចាម បានឱ្យដឹងថា គោបុរៈផ្នែកទី១ខាងជើង នៃប្រាសាទនគរបាជ័យ ក្នុងស្រុកកំពង់សៀម ដែលមានសភាពចាស់ទ្រុឌទ្រោម ត្រូវបានដួលរលំ ដោយសារភ្លៀងធ្លាក់ និងខ្យល់ខ្លាំង នៅថ្ងៃទី ២៣-២៤ សីហា។
«គោបុរៈផ្នែកទី១ខាងជើងនេះ មានសភាពទ្រុឌទ្រោមខ្លាំង ដោយសារធម្មជាតិ ភ្លៀងនិងខ្យល់ វាប្រះ ហើយមានកូនឈើតូចៗដុះក្នុងកំផែងនេះផង ទើបវាដួលរលំ »។ នេះជាការបញ្ជាក់របស់ លោក សឹង ភារម្យ ដោយបន្តថា ការដួលរលំគោបុរៈនេះមិនបានធ្វើឱ្យមាន គ្រោះថ្នាក់ដល់ប្រជាជននៅក្នុងតំបន់នោះទេ។
បច្ចុប្បន្នក្រុមការងារមន្ទីរវប្បធម៌ និងវិចិត្រសិល្បៈខេត្តកំពង់ចាម កំពុងសម្អាតទីធ្លានោះ និងប្រមូលថ្ម ដែលដួលរលំប្រមាណ ១៥ដុំយកទៅដាក់នៅក្នុងវត្ត ដែលនៅប្រាសាទនគរបាជ័យនោះ។ យ៉ាងណាមិញ លោក សឹង ភារម្យ មិនទាន់អាចប្រាប់សារព័ត៌មានThmeyThmey25 បានទេថា ការជួសជុលគោបុរៈនេះអាចធ្វើឡើងនៅពេលណា ដោយលោកកំពុងធ្វើរបាយការណ៍ ទៅរដ្ឋបាលខេត្តកំពង់ចាម។
ក្រៅពីការដួលរលំ គោបុរៈទី១ផ្នែកខាងជើងនេះ ផ្នែកមួយចំនួនទៀតនៃប្រាសាទនគរបាជ័យ ក៏កំពុងមានសភាពទ្រុឌទ្រោម ដែលប្រឈមនឹងការដួលរលំផងដែរ។ សូមជម្រាបដែរថា ប្រាសាទនគរបាជ័យ ត្រូវបានសាងសង់ឡើងកាលពីដើមសតវត្សទី១៣ នារាជព្រះបាទជ័យវរ្ម័នទី៧ ក្នុងរចនាប័ទ្មបាយ័ន បែរទៅទិសខាងកើតរាងជាចតុកោណកែង និងមានកំពែងបីជាន់ ព្រមទាំងមានគោបុរៈ(ខ្លោងទ្វារ)គ្រប់ទិសធំទាំងបួន។
នៅកំពែងទី១ នៃប្រាសាទនេះ ត្រូវបានបាក់បែក និងស្រុតអស់ជាច្រើនកន្លែង ឯកំពែងជាន់ទី២និងកំពែងជាន់ទី៣នៅរក្សារូបរាងគួរសម។ កាលពីឆ្នាំ ២០១៨-២០១៩ មន្ទីរវប្បធម៌ខេត្តកំពង់ចាម ក៏បានជួសជុលផ្នែកមួយចំនួន នៃប្រាសាទនេះ ដែលប្រឈមនឹងការដួលរំមួយចំនួនផងដែរ ៕ © រក្សាសិទ្ធិដោយ thmeythmey.com