កូនខ្លាឃ្មុំប្រភេទ  Asiatic black bear (Ursus thibetanus) ត្រូវបានមន្ត្រីឧទ្យានុរក្ស យករក្សាទុកបណ្តោះអាសន្ននៅស្នាក់ការដែនជម្រកសត្វព្រៃភ្នំឱរ៉ាល់ ដើម្បីមើលថែ​សុខភាព រហូតខ្លាឃ្មុំនេះមានសុខភាពរឹងមាំ មន្ត្រីឧទ្យានុរក្សនឹងប្រលែងចូលព្រៃធម្មជាតិវិញ។
 

លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថាន បានប្រាប់សារព័ត៌មានThmeyThmey តាមបណ្ដាញសង្គមតេឡេក្រាមថា កូនសត្វខ្លាឃ្មុំនេះ ជាប្រភេទសត្វជិតផុតពូជ។​ ប្រភេទខ្លាឃ្មុំនេះ ក៏ត្រូវបានចុះក្នុងបញ្ជី ក្រហម IUCN ជាប្រភេទងាយរងគ្រោះថ្នាក់ ក្នុងពិភពលោក។ 
 

បើតាមលោក​ នេត្រ ភក្តា្រ ខ្លាឃ្មុំនេះមានរស់នៅក្នុងប្រទេសកម្ពុជានៅតំបន់ ជម្រកសមស្របប្រភេទព្រៃស្រោង និងពាក់កណ្តាលស្រោង។ ខ្លាឃ្មុំប្រភេទនេះ បានថយចុះក្នុងប្រទេសកម្ពុជា ដោយសារតែការបាត់បង់ទីជម្រក ការខ្វះខាតទីតាំងរកចំណី និងការបរបាញ់ដើម្បីយកសំណាកធ្វើអាជីវកម្ម។ 
 

« ខ្ញុំអំពាវនាវដល់ពលរដ្ឋនិយមហូបសាច់សត្វព្រៃ និងមានជំនឿថាហូបសាច់សត្វព្រៃ ឬសំណាកសត្វព្រៃជួយសុខភាពខ្លួនល្អ គួរបោះចោលជំនឿនេះ ព្រោះវាមិនត្រឹមតែមិនជួយសុខភាព តែធ្វើឱ្យប៉ះពាល់សុខភាពដោយសារតែសត្វព្រៃសម្បូរដោយមេរោគ ហើយដើម្បីបញ្ឈប់ការបរបាញ់ និងដាក់អន្ទាក់ខុសច្បាប់ »។ នេះជាការអំពាវនាវរបស់រដ្ឋលេខាធិការក្រសួងបរិស្ថានរូបនេះ។​
 

ប្រភេទសត្វខ្លាំឃ្មុំនេះក៏មានវត្តមានផងដែរនៅក្នុងប្រទេសប៉ាគីស្ថាន ភូមា ថៃភាគខាងជើង ឡាវនិងប្រទេសវៀតណាម។ រយៈពេល ៨ ខែមកនេះ មន្រ្តីក្រសួងបរិស្ថានចាប់បាន អន្ទាក់ជាង ២ ម៉ឺន ក្នុងតំបន់ការពារធម្មជាតិ ជួយសង្គ្រោះសត្វព្រៃជាច្រើនក្បាលផងដែរ៕