ជាតិ
ពលរដ្ឋជិត ២ម៉ឺនគ្រួសារនៅបន្ទាយមានជ័យ រងគ្រោះដោយសារទឹកជំនន់ រូបភាពពីគណៈកម្មាធិការជាតិគ្រប់គ្រងគ្រោះមហន្តរាយ
× ភ្នំពេញ៖ គិតត្រឹមយប់ថ្ងៃទី២៨ កញ្ញា ទឹកជំនន់នៅខេត្តបន្ទាយមានជ័យ បន្តប៉ះពាល់ដល់ប្រជាពលរដ្ឋចំនួន ១៨,៧១៥គ្រួសារហើយ ដែលរស់នៅក្នុងឃុំ-សង្កាត់ចំនួន ៣៨ នៃក្រុង-ស្រុកចំនួន៦។ ក្រៅពីប៉ះពាល់ដល់ពលរដ្ឋ ជំនន់ទឹកភ្លៀងនេះ ក៏បានប៉ះពាល់ដល់ផលដំណាំជាង ២ម៉ឺនហិកតាផងដែរ។
តួលេខបឋមរបស់គណៈកម្មាធិការជាតិគ្រប់គ្រងគ្រោះមហន្តរាយ បង្ហាញថា ទឹកជំនន់នៅខេត្តបន្ទាយមានជ័យ បានបង្កផលប៉ះពាល់ដល់ប្រជាពលរដ្ឋចំនួន ១៨,៧១៥គ្រួសារ ក្នុងនោះពលរដ្ឋចំនួន ១,១៥០គ្រួសារ ត្រូវបានជម្លៀសទៅកាន់ទីទួលសុវត្ថិភាព។ ជំនន់ទឹកភ្លៀង រួមផ្សំនឹងចរន្តទឹកហូរចេញពីខេត្តបាត់ដំបង និងព្រំដែនកម្ពុជា-ថៃ បានធ្វើឱ្យប៉ះពាល់ដល់ ៦ក្រុង-ស្រុក ស្មើ ៣៨ឃុំ-សង្កាត់ នៃខេត្តបន្ទាយមានជ័យ។
បើតាមតួលេខខាងលើ ជំនន់ទឹកភ្លៀងនេះ បានប៉ះពាល់សាលារៀន ២៦កន្លែង, វត្ត ៩កន្លែង និងមណ្ឌលសុខភាព ២កន្លែង។ ជាមួយគ្នានេះ ដំណាំស្រូវរបស់ប្រជាពលរដ្ឋចំនួន ២៥,២២៣ហិកតា និងដំណាំរួមផ្សំ ប្រមាណ ៣០១ហិកតា ត្រូវបានជន់លិច។
ជុំវិញការវិវត្តនៃទឹកជំនន់នៅខេត្តបន្ទាយមានជ័យ សារព័ត៌មានថ្មីៗ២៥ មិនអាចសុំការបញ្ជាក់ពីលោក អ៊ុំ រាត្រី អភិបាលខេត្តបន្ទាយមានជ័យបានឡើយ ដោយលោកអះអាងថា ជាប់ប្រជុំ។
រូបភាពពីហ្វេសប៊ុកលោក អ៊ុំ រាត្រី អភិបាលខេត្តបន្ទាយមានជ័យ
គួរបញ្ជាក់ថា ក្រសួងធនធានទឹក និងឧតុនិយម នៅថ្ងៃទី២៨ កញ្ញា បានព្យាករថា កម្ពុជា នឹងបន្តធ្លាក់រយៈពេលមួយសប្ដាហ៍ទៀត។ ក្រសួងធនធានទឹក អំពាវនាវដល់ប្រជាពលរដ្ឋទាំងអស់ ត្រូវប្រុងប្រយ័ត្នចំពោះគ្រោះថ្នាក់ដែលអាចកើតឡើងជាយថាហេតុ៕
Tag:
ទឹកជំនន់
បន្ទាយមានជ័យ
© រក្សាសិទ្ធិដោយ thmeythmey.com