គណៈកម្មាធិការជាតិគ្រប់គ្រងគ្រោះមហន្ដរាយខេត្តព្រះវិហារ នៅថ្ងៃទី៣០ ខែកញ្ញា បានជូនដំណឹងដល់ប្រជាពលរដ្ឋដែលរស់នៅតាមដងស្ទឹងសែន ក្នុងខេត្តព្រះវិហារ ឱ្យយកចិត្តទុកដាក់រក្សាសុវត្ថិភាព ខណៈពេលកម្ពស់ទឹក នៅតែបន្តហក់ឡើងរហូតហួសកម្ពស់ប្រកាសអាសន្ន។


រូបភាពដោយ លោក ចាប កុយ ប្រធានមន្ទីរធនធានទឹក និងឧតុនិយម ខេត្តព្រះវិហារ
 

សារសំឡេងរបស់គណៈកម្មាធិការជាតិ​គ្រប់គ្រងគ្រោះមហន្ដរាយខេត្តព្រះវិហារ បានបញ្ជាក់ថា៖ «គិតត្រឹមព្រឹកថ្ងៃទី៣០ ខែកញ្ញា ឆ្នាំ២០២១ កម្ពស់ទឹកស្ទឹងសែន បន្តហក់ឡើងកម្ពស់ ១៣,៣០ ម៉ែត្រ ដែលកម្រិតប្រកាសអាសន្ន​ត្រឹម១១,៥០ ម៉ែត្រតែប៉ុណ្ណោះ។ ដូច្នេះសូមប្រជាពលរដ្ឋបង្កើនការប្រុងប្រយ័ត្ន និងស្វែងរកទីទួលមានសុវត្ថិភាពឱ្យបានត្រឹមត្រូវ។ ពិសេសមនុស្សចាសជរា និងកុមារតូចៗ ​ព្រមជាមួយជនងាយរងគ្រោះ»។


រូបភាពដោយ លោក ចាប កុយ ប្រធានមន្ទីរធនធានទឹក និងឧតុនិយម ខេត្តព្រះវិហារ
 

កន្លងមកនៅថ្ងៃទី២៤ ខែកញ្ញាឆ្នាំ២០២១​ រដ្ឋបាលខេត្តព្រះវិហារ ក៏បានជូនដំណឹងឱ្យប្រជាពលរដ្ឋ ដែលរស់នៅតាមបណ្ដាយស្ទឹងសែន និងនៅតាមមាត់ទន្លេមេគង្គ ឱ្យត្រៀមខ្លួនទុកជាមុន ដើម្បីការពារសុវត្ថិភាព ខណៈទឹកនៅកម្ពស់១១,២០សងទីម៉ែត្រ  ត្រៀមឈានទៅដល់កម្ពស់ប្រកាសអាសន្ន៕