Pele បានចាកចេញពីមន្ទីរពេទ្យវិញហើយ ក្រោយវះកាត់ដុំសាច់ពោះវៀនធំជោគជ័យ។ វីរបុរសប្រេស៊ីលរូបនេះ បានចូលសម្រាកនៅមន្ទីរពេទ្យ Albert Einstein ក្នុងទីក្រុង Sao Paulo តាំងពីចុងខែសីហាមក។

 

អតីតខ្សែប្រយុទ្ធវ័យ៨០ឆ្នាំរូបនេះ ត្រូវបានបញ្ជូនទៅសង្គ្រោះបន្ទាន់ ដោយទទួលបានការវះកាត់នាថ្ងៃទី៤ កញ្ញាមក។ ក្រោយវះកាត់ហើយជិត១ខែ ទើបគ្រូពេទ្យអនុញ្ញាតឱ្យ Pele ចេញពីមន្ទីរពេទ្យ ក្រោយឃើញស្ថានភាពជំងឺធូស្រាល។ ប៉ុន្តែក្រុមគ្រូពេទ្យរបស់Pele បាននិយាយថា Pele នឹងបន្តការព្យាបាលដោយប្រើគីមី។
 

Pele ដែលជួយឱ្យប្រេស៊ីលឈ្នះពានរង្វាន់បាល់ទាត់ពិភពលោក ៣ដងនោះ បានសរសេរលើហ្វេសប៊ុកយ៉ាងដូច្នេះថា៖«ខ្ញុំសប្បាយចិត្តណាស់ដែលបានត្រលប់មកផ្ទះវិញ ។ខ្ញុំចង់អរគុណដល់ក្រុមការងារមន្ទីរពេទ្យ Albert Einstein ទាំងមូល ដែលបានធ្វើឱ្យការស្នាក់នៅរបស់ខ្ញុំមានភាពរីករាយ ដោយមានមនុស្សធម៌និងស្វាគមន៍ដោយក្តីស្រឡាញ់។ សូមអរគុណផងដែរដល់អ្នកទាំងអស់គ្នាដែលមកពីចម្ងាយធ្វើឱ្យជីវិតខ្ញុំពោរពេញទៅដោយសារនៃក្តីស្រឡាញ់ជាច្រើន»។ 
 

សុខភាពរបស់Pele មានសភាពទ្រុឌទ្រោម នាប៉ុន្មានឆ្នាំចុងក្រោយនេះ។ វីរបុរសប្រេស៊ីលរូបនេះ ក៏ធ្លាប់បានវះកាត់ក្រពេញប្រូស្តាតនៅឆ្នាំ ២០១៥ និងមានករណីឆ្លងមេរោគទឹកនោមនៅឆ្នាំ ២០១៩ ទៀតផង។
 

Pele ជាកីឡាកររកគ្រាប់បាល់ឱ្យជម្រើសជាតិប្រេស៊ីលច្រើនជាងគេ ដោយស៊ុតបាន ៧៧ គ្រាប់ក្នុង ៩២ ប្រកួត និងជាកីឡាករម្នាក់ ក្នុងចំណោមកីឡាករតែ ៤ នាក់ប៉ុណ្ណោះ ដែលបានស៊ុតបញ្ចូលទីក្នុងការប្រកួតបាល់ទាត់ពិភពលោកចំនួន ៤ លើក។
 

បច្ចុប្បន្ន Lionel Messi បានបំបែកកំណត់ត្រា Pele ក្នុងនាមជាកីឡាកររកគ្រាប់បាល់បានច្រើនជាងគេនៅតំបន់អាមេរិកឡានទីន ក្នុងការប្រកួតអន្តរជាតិ ។ Messi ស៊ុតបាន៧៩គ្រាប់ ឱ្យអាហ្សង់ទីន ក្រោយធ្វើបាន hat-trick ដើម្បីជួយអាហ្សង់ទីនឈ្នះបូលីវី ៣-០ នៅវគ្គជម្រុះ World Cup កាលពីខែកញ្ញាកន្លងមក៕