កីឡាអន្តរជាតិ
អន្តរជាតិ
Keller ម្ចាស់មេដាយមាសអូឡាំពិក ប្រឈមជាប់ទោស២០ឆ្នាំ ដោយសារចូលអុកឡុកសភាអាមេរិក
× Klete Keller ម្ចាស់មេដាយមាសកីឡាហែលទឹកអូឡាំពិកអាមេរិក បានសារភាពទោសកំហុសជុំវិញការចូលរួមអុកឡុកវិមានសភាអាមេរិកកាលពីខែមករា។ Keller ស្ថិតក្នុងចំណោមអ្នកគាំទ្រលោក ដូណាល់ ត្រាំក្នុងបាតុកម្មប្រឆាំងលោក ចូ បៃឌិន ក្រោយជាប់ឆ្នោតជាប្រធានាធិបតីអាមេរិក។
អត្តពលិកល្បីឈ្មោះ វ័យ៣៩ឆ្នាំរូបនេះ ប្រឈមមុខនឹងការជាប់ពន្ធនាគារដល់ទៅ២០ឆ្នាំ ប៉ុន្តែដោយសារ Keller បានសារភាពទោសកំហុសរបស់ខ្លួន និងការអង្វរករផង ការចោទប្រកាន់ដូចគ្នានេះត្រូវបានបន្ថយទោសមកត្រឹម៨ខែវិញ។
Keller ដែលធ្លាប់ឈ្នះមេដាយមាសអូឡាំពិកឆ្នាំ២០០៤នៅអាតែន ប៉េកាំងឆ្នាំ២០០៨ និងមេដាយប្រាក់នៅស៊ីដនីឆ្នាំ២០០០ លើវិញ្ញាសាហែលបណ្តាក់២០០ម៉ែត្រ បានសារភាពទោសកំហុសកាលនៅថ្ងៃទី៣០ ខែកញ្ញា ក្រោយមានការចោទប្រកាន់ឧក្រិដ្ឋកម្មទាក់ទងនឹងការចូលរួមរបស់ខ្លួន ក្នុងការអុកឡុកវិមានសភាអាមេរិកនៅថ្ងៃទី៦ ខែមករា។
យោងតាមការផ្សាយរបស់កាសែត CNN លោក Keller ត្រូវបានគេឃើញក្នុងហ្វូងបាតុករតាមរយៈការពិនិត្យខ្សែវីដេអូឡើងវិញ។
Keller ត្រូវបានចោទក្រោមបទចោទចំនួន៧ ក្រោយរកឃើញថារូបគេស្ថិតក្នុងចំណោមអ្នកគាំទ្រលោក ត្រាំ រាប់ពាន់នាក់ដែលបានទម្លុះរនាំងការពារក្នុងវិមានកាពីតូល រួចក៏បានប៉ះទង្គិចជាមួយក្រុមប៉ូលិសដែលការពារវិមាន។ កាលនោះ ក្រុមបាតុករបានចូលដល់ក្នុងអាគារសភា ដោយអុកឡុកនៅតាមបន្ទប់នានា ហើយប៉ុនប៉ងសម្រុកចូលសាលប្រជុំសភាទៀតផង៕
© រក្សាសិទ្ធិដោយ thmeythmey.com