បើតាមសេចក្ដីប្រកាសព័ត៌មានរបស់ក្រសួងការបរទេស នៅសប្ដាហ៍ក្រោយ លោក ប្រាក់ សុខុន រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ នឹងចូលរួមកិច្ចប្រជុំរដ្ឋមន្រ្តីការបរទេសអាស៊ាន និងកិច្ចប្រជុំពាក់ព័ន្ធជាច្រើនទៀត តាមប្រព័ន្ធវីដេអូ។  កិច្ចប្រជុំទាំងនេះ ផ្ដោតលើការត្រៀមរៀបចំកិច្ចប្រជុំអាស៊ានលើកទី៣៨ និងលើកទី៣៩ និងកិច្ចប្រជុំកំពូលពាក់ព័ន្ធនាពេលខាងមុខនេះ ។ 

 

កិច្ចប្រជុំខាងលើ ក៏ជំរុញលើអាទិភាពនានារបស់អាស៊ានឆ្នាំ២០២១ សមិទ្ធផលសំខាន់ៗ ដែលសម្រេចបាន និងគំនិតផ្ដួចផ្ដើមសំខាន់ៗ របស់អាស៊ានសម្រាប់ឆ្លើយតបនឹងជំងឺកូវីដ-១៩ ។ បើសេចក្ដីប្រកាសដដែល កិច្ចប្រជុំនេះ ក៏នឹងពិនិត្យឡើងវិញលើការអនុវត្តផែនការលម្អិតស្ដីពីការកសាងសហគមន៍អាស៊ាន និងតាមដានបច្ចុប្បន្នភាពនៃការអនុវត្តការព្រមព្រៀងជាឯកច្ឆន្ទ៥ចំណុច ជាពិសេសការផ្ដល់ជំនួយមនុស្សធម៌របស់អាស៊ាន និងថែរក្សាមជ្ឈភាពអាស៊ាន។

 

ជាមួយគ្នានេះ រដ្ឋមន្រ្តីការបរទេសអាស៊ាន ក៏នឹងពិភាក្សាគ្នា ពីការបង្កើនទំនាក់ទំនាក់បន្ថែមទៀតជាមួយដៃគូសន្ទនាខាងក្រៅ តាមរយៈយន្តការដែលដឹកនាំដោយអាស៊ានផងដែរ៕