ជាតិ
ទឹកជំនន់ស្រក៖ អាជ្ញាធរបន្ទាយមានជ័យ ឱ្យរថយន្តធុនធំបើកលើកំណាត់ផ្លូវលេខ ២៦៨A ឡើងវិញ
រូបភាពទឹកហូរកាត់កំណាត់ផ្លូវខេត្ត ២៦៨អា ភូមិសាស្ត្រព្រៃមាន់ ដល់អាងត្រពាំងថ្ម។ រូបភាពពីមន្ទីរសាធារណការនិងដឹកជញ្ជូនខេត្ត បន្ទាយមានជ័យ
×![]()
ភ្នំពេញ៖ មន្ទីរសាធារណការ និងដឹកជញ្ជូនខេត្តបន្ទាយមានជ័យ សម្រេចបើកឱ្យចរាចរណ៍យានយន្តដឹកជញ្ជូនធុនធំប្រភេទ ដែលធ្វើដំណើរឆ្លងកាត់តាមកំណាត់ផ្លូវខេត្តលេខ ២៦៨អា ចំណុចព្រៃមាន់ ដល់អាងត្រពាំងថ្ម ស្រុកភ្នំស្រុក។ បើតាមមន្ទីរសាធារណការ ការបើកឱ្យចរាចរណ៍ឡើងវិញនៅព្រឹកថ្ងៃទី៤ តុលានេះ បន្ទាប់ពីស្ថានភាពជំនន់ទឹកភ្លៀងក្នុងភូមិសាស្រ្តខាងលើ មានការស្រកចុះ។
កាលពីថ្ងៃទី២៦ កញ្ញា មន្ទីរសាធារណការ និងដឹកជញ្ជូនខេត្តបន្ទាយមានជ័យ បានផ្អាកចរាចរណ៍បណ្ដោះអាសន្នលើយានយន្តដឹកជញ្ជូនធុនធំ ដែលធ្វើដំណើរឆ្លងកាត់កំណាត់ផ្លូវ២៦៨អា ចំណុចព្រៃមាន់ ដល់អាងត្រពាំងថ្ម ស្រុកភ្នំស្រុក ដោយសារទឹកជំនន់ហូរកាត់ផ្លូវ។
ក្រោយស្ថានភាពជំនន់ទឹកភ្លៀងស្រកចុះ និងទឹកឈប់ហូរកាត់ផ្លូវខេត្តខាងលើ មន្ទីរសាធារណការ សម្រេចបើកឱ្យធ្វើចរាចរណ៍ឡើងវិញ។បើតាមមន្ទីរសាធារណការ និងដឹកជញ្ជូនខេត្តបន្ទាយមានជ័យ អ្នកធ្វើដំណើរដែលឆ្លងកាត់កំណាត់ផ្លូវខាងលើត្រូវប្រុងប្រយ័ត្នខ្ពស់ ជាពិសេសការដឹកជញ្ជូនគ្រប់ប្រភេទ ត្រូវស្របទៅតាមទម្ងន់ដែលកម្រិតដោយច្បាប់។
សូមបញ្ជាក់ថា ជំនន់ទឹកភ្លៀង ដែលកើតឡើងនៅខេត្តបន្ទាយមានជ័យ បានប៉ះពាល់ដល់ពលរដ្ឋចំនួន ១៩,៦២៥គ្រួសារ ក្នុងក្រុង-ស្រុកចំនួន ៩ និងមានទឹកហូរកាត់ផ្លូវចំនួន ២២៧,៣៣៤ម៉ែត្រ។ នេះបើតាមរបាយការណ៍សរុបផលប៉ះពាល់ និងខូតខាតដោយគ្រោះជំនន់ទឹកភ្លៀង គិតត្រឹមថ្ងៃទី៣០ កញ្ញា។
Tag:
ទឹកជំនន់
ផ្លូវ
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 2 ថ្ងៃ
