ការប្រកួតវគ្គផ្តាច់ព្រ័ត្រ នឹងប្រព្រឹត្តទៅនាវេលាម៉ោង ១ និង​៤៥នាទី (ម៉ោងនៅកម្ពុជា)។ កាលពី​វគ្គពាក់កណ្តាលផ្តាច់ព្រ័ត្រ អេស្ប៉ាញ ក្រោមការដឹកនាំ​របស់​លោក Luis Enrique បាន​យកឈ្នះម្ចាស់ជើងឯក Euro អ៊ីតាលី ក្នុងលទ្ធផល ២-១ ដែលសម្រេចបាន​ដោយ Ferran Torres ទាំងពីរគ្រាប់ ខណៈ១គ្រាប់​របស់អ៊ីតាលី រកបានដោយ Lorenzo Pellegrini។

 

រីឯបារាំងរបស់​លោក Didier Deschamps ឯណោះវិញ បានយកឈ្នះ បែលហ្ស៊ិក ៣-២។ បែលហ្ស៊ិកនាមុខ២គ្រាប់នៅតង់ទីមួយ ពីសំណាក់​ Yannick Carrasco និង Romelu Lukaku ប៉ុន្តែបារាំងបានវាយបក​វិញ៣គ្រាប់ក្នុងតង់ទីពីរ ដោយ Karim Benzema, Kylian Mbappe និងចុងក្រោយ Theo Hernandez នៅនាទី​៩០។

 

នៅមុនជំនួបផ្តាច់ព្រ័ត្រ អ៊ីតាលី ត្រូវប្រជែងយកចំណាត់ថ្នាក់លេខ​៣ជាមួយបែលហ្ស៊ិក នា​វេលាម៉ោង​៨យប់នេះ។

 

កាលពីឆ្នាំ​២០១៩ ព័រទុយហ្គាល់ បាន​ក្លាយជាម្ចាស់ពានបើកឆាក ដោយឈ្នះហូឡង់ ១-០ នៅវគ្គផ្តាច់ព្រ័ត្រ ខណៈអង់គ្លេស ឈ្នះស្វីស ដោយការទាត់បាល់ប៉េណាល់ទីកាត់សេចក្តីសម្រាប់ចំណាត់ថ្នាក់​លេខ​៣៕