ព័ត៍មានសុខភាព
អន្តរជាតិ
វេជ្ជបណ្ឌិតអង់គ្លេស៖ កុំលេងទូរសព្ទពេលកំពុងបន្ទោបង់ ប្រយ័ត្នកើតជំងឺឫសដូងបាត!
× ក្រុមវេជ្ជបណ្ឌិតអង់គ្លេស ព្រមានអំពីការកើនឡើងហានីភ័យនៃជំងឺឫសដូងបាត សម្រាប់អ្នកដែលចូលចិត្តប្រើទូរសព្ទនៅក្នុងបង្គន់។ នេះបើតាមការផ្សាយរបស់សារព័ត៌មាន The Sun ដោយផ្អែកតាមលទ្ធផលសិក្សារបស់អ្នកជំនាញនានា។
ការឆ្លៀតពេលមើលវីដេអូ មើលបណ្តាញសង្គម ឬលេងហ្គេម នៅពេលកំពុងបន្ទោបង់ក្នុងបង្គន់ គឺជារឿងល្អមួយដែលបង្ហាញថាមនុស្សចេះប្រើប្រាស់ស្មាតហ្វូនគ្រប់ពេលវេលា ប៉ុន្តែក្រុមវេជ្ជបណ្ឌិតជំនាញបានព្រមានឲ្យប្រយ័ត្នសុខភាពខ្លួន ជាពិសេសរន្ធគូទ។
The Sun បានដកស្រង់ការពន្យល់របស់វេជ្ជបណ្ឌិតជំនាញពីករណីកើតជំងឺឫសដូងបាត ដែលថា៖ «ប្រសិនបើអ្នកប្រើទូរសព្ទ អ្នកច្បាស់ជាបន្តអង្គុយយ៉ាងយូរនៅលើចានបង្គន់ ដូច្នេះសម្ពាធកើនឡើងលើសរសៃវ៉ែន ហើយបន្តចូលរន្ធគូទ»។
ក្រុមវេជ្ជបណ្ឌិត បានក្រើនរំលឹកឲ្យដាក់ឧបករណ៍អេឡិចត្រូនិកផ្សេងៗនៅក្រៅបន្ទប់ទឹក ពីព្រោះបង្គន់ដែលប្រើប្រាស់ក៏មានមេរោគដ៏ច្រើនសន្ធឹកសន្ធាប់ផងដែរ។ វេជ្ជបណ្ឌិតឯកទេសផ្នែកអនាម័យលោក Lisa Ackerley បានគូសបញ្ជាក់ថា មេរោគមានគ្រប់ទីកន្លែង ទាំងលើចានបង្គន់ ប៊ូតុងកាច់ទឹក ប្រដាប់ក្រឡុកបង្គន់ ក្រដាស ហើយមេរោគក៏ឆ្លងបន្ថែមចូលតាមទូរសព្ទដៃ ពីព្រោះគ្មានអ្នកណាអាចយកទូរសព្ទទៅលាងសម្អាតកើតនោះឡើយ។
ក្រោយចុចទូរសព្ទអស់ចិត្ត មនុស្សជាច្រើនបានយកដៃទៅកាន់ផ្សេងៗទៀត ជាពិសេសនៅពេលជូត ឬលាងជម្រះលាមក ដែលជាហេតុនាំឲ្យមេរោគ ឬបាក់តេរី បន្តឆ្លងយ៉ាងងាយទៅលើរន្ធគូទ ហើយឈានដល់ការចេញរោគសញ្ញាឫសដូងបាត ដូចជារមាស់រន្ធគូទ ចេញដុំពក និងរងឈាមជាដើម។
វេជ្ជបណ្ឌិត Ackerley បានបញ្ជាក់ថា៖ «ខ្ញុំមិនបានព្យាយាមហាមឃាត់ការប្រើប្រាស់ទូរសព្ទពេលកំពុងបន្ទោបង់នោះឡើយ ប៉ុន្តែគ្រាន់តែបង្ហាញពីបញ្ហាដែលត្រូវប្រឈម។ អ្នកអាចប្រើប្រាស់ទូរសព្ទនៅដៃឆ្វេង ហើយដៃឆ្វេងនោះកុំកាន់របស់អ្វីផ្សេងទៀតឲ្យសោះ។ តែបើអ្នកជំនាញដៃឆ្វេង ចូរកាន់ទូរសព្ទនៅដៃស្តាំ ហើយកុំប៉ះពាល់អ្វីផ្សេងទៀតនៅដៃស្តាំ នោះវាប្រហែលជាកាត់បន្ថយហានីភ័យច្រើន»។
លទ្ធផលនៃការសិក្សាមួយបានបង្ហាញថា ពលរដ្ឋអង់គ្លេស៥៧ភាគរយ បានអះអាងថា ធ្លាប់លេងស្មាតហ្វូនពេលចូលបង្គន់ ហើយក្នុងចំណោមនោះ ៨ភាគរយបានបញ្ជាក់ថា ជាទម្លាប់ប្រចាំរបស់ខ្លួន៕
© រក្សាសិទ្ធិដោយ thmeythmey.com