លោក ហ៊ុន ម៉ានី បានបង្ហាញពីមោទនភាពដែលប្រជាជនកម្ពុជា ជាពិសេសយុវជននៅតំបន់អាស៊ី និងអឺរ៉ុប អាចចូលរួមជាមួយគំនិតផ្តួចផ្ដើមលើការងាររៀបចំកិច្ចប្រជុំកំពូលថ្នាក់ដឹកនាំវ័យក្មេងនៃមូលនិធិអាស៊ី-អឺរ៉ុប និងរួមគ្នាទទួលខុសត្រូវជាមួយមហិច្ឆតាក្នុងការសម្រេចឱ្យបាននូវការអភិវឌ្ឍន៍ប្រកបដោយនិរន្តរភាព ដែលជាដំណោះស្រាយឆ្លើយតបទៅនឹងបញ្ហាបរិស្ថានពិភពលោក។ 

 

ក្នុងកម្មវិធីដាំកូនឈើនាព្រឹកថ្ងៃទី១៨ វិច្ឆិកា ប្រធានក្រុមប្រឹក្សាយុវជនអាស៊ី លោក ហ៊ុន ម៉ានី បន្ថែមថា៖«ខណៈសកលលោកកំពុងតែប្រយុទ្ធប្រឆាំងនឹងជំងឺកូវីដ១៩  យើងក៏កំពុងប្រឈមមុខផងដែរនឹងបញ្ហាបម្រែបម្រួលអាកាសធាតុបង្កឱ្យមានការកើនកម្ដៅពិភពលោក គ្រោះធម្មជាតិដូចជាទឹកជំនន់ គ្រោះរាំងស្ងួត ខ្យល់ព្យុះជាដើម ដែលនេះជាបញ្ហាសកលមួយដោយយើងមិនអាចមើលរំលងបានឡើយ»។

 

ជាប្រធានសហភាពសហព័ន្ធយុវជនកម្ពុជា លោក ហ៊ុន ម៉ានី បន្ថែមថា ការដាំកូនឈើនៅពេលនេះមិនត្រឹមឆ្លុះបញ្ចាំងពីការគោរពចំពោះបរិស្ថានធម្មជាតិ និងការយល់ដឹងអំពីបរិស្ថានប៉ុណ្ណោះទេ ប៉ុន្តែវាក៏ជានិមិត្តរូបនៃភាពជឿជាក់លើពហុភាគីនិយម និងការរីកចម្រើនរួមគ្នាក្រោមការប្ដេជ្ញាចិត្តមុតមាំរបស់យុវជនទូទាំងពិភពលោក លើការងារទាំងនេះ។

 

ពិធីដាំកូនឈើសាមគ្គីភាពរវាងយុវជនអាស៊ី-អឺរ៉ុប ក៏មានការចូលរួមពីរដ្ឋមន្រ្តីក្រសួងបរិស្ថាន អភិបាលខេត្តសៀមរាប លោក សុខ សូកេន រដ្ឋលេខាធិការក្រសួងការបរទេស និងសហប្រតិបត្តិការអន្ដរជាតិ ព្រមទាំងតំណាងស្ថានភាពនានាក្នុងប្រទេសកម្ពុជា។ល។ កូនឈើសរុប ៥៣ដើម ត្រូវបានដាំក្នុងបរិវេណមុខអង្គរវត្ត តំណាងឱ្យស្ថាប័នចំនួន២ គឺលេខាធិការដ្ឋានអាស៊ានសហភាពអឺរ៉ុប និងតំណាងបណ្ដាប្រទេសទាំង៥១ ជាសមាជិកនៃកិច្ចប្រជុំកំពូលអាស៊ី-អឺរ៉ុបលើកទី១៣ ដែលកម្ពុជានឹងធ្វើជាម្ចាស់ផ្ទះ ចាប់ពីថ្ងៃទី២៥ ដល់ថ្ងៃទី២៦ ខែ វិច្ឆិកា តាមរយៈប្រព័ន្ធអនឡាញ។

 

សូមជម្រាបដែរថា ព្រឹត្តិការណ៍ដាំដើមឈើនៅពេលនេះ ជាផ្នែកមួយនៃកិច្ចប្រជុំកំពូលថ្នាក់ដឹកនាំវ័យក្មេងនៃមូលនិធិអាស៊ី-អឺរ៉ុបលើកទី៤ ដែលកិច្ចប្រជុំនេះ គឺជាវេទិកាអមមួយនៃវេទិកាអមទាំង៦ របស់កិច្ចប្រជុំកំពូលអាស៊ី-អឺរ៉ុបលើកទី១៣។ វេទិកាអមទាំង៦ រួមមាន ទី១វេទិកាអាស៊ី-អឺរ៉ុប ស្ដីពីស្រ្ដី សន្ដិភាព និងសន្ដិសុខ ទី២ កិច្ចប្រជុំភាពជាដៃគូសភាអាស៊ី-អឺរ៉ុប លើកទី១១ ទី៣ ទិវាវប្បធម៌អាស៊ី-អឺរ៉ុប ទី៤ កិច្ចប្រជុំកំពូលថ្នាក់ដឹកនាំវ័យក្មេងនៃមូលនិធិអាស៊ី-អឺរ៉ុប ទី៥ កិច្ចពិភាក្សាតុមូលក្រុមនិពន្ធនាយកសារព័ត៌មាន នៃមូលនិធិអាស៊ី-អឺរ៉ុប លើកទី១០ និងទី៦ វេទិកាធុរកិច្ច និងសេដ្ឋកិច្ចអាស៊ី-អឺរ៉ុបលើកទី១៕