ជាតិ
ព័ត៍មានសុខភាព
×![]()
ដោយ: ឈួន ឈីវអុីង
បើតាមរបាយការណ៍របស់សហព័ន្ធបង្ការជំងឺទឹកនោមផ្អែមអន្តរជាតិ នៅឆ្នាំ២០៤៥ អត្រាអ្នកកើតជំងឺទឹកនោមផ្អែមនៅទូទាំងពិភពលោកនឹងអាចកើនឡើងដល់៧០០លាននាក់។ បើធៀបនឹងរបាយការណ៍ឆ្នាំ២០១៩ ពិភពលោកមានអ្នកជំងឺទឹកនោមផ្អែម ៤៦៣លាននាក់ប៉ុណ្ណោះក្នុងចន្លោះអាយុ២០ទៅ៧៩ឆ្នាំ។ នេះជាកំណើនដ៏ធំមួយ ដែលសឹងតែកើនឡើងទ្វេដងក្នុងរយៈពេល ២៦ឆ្នាំទៅមុខ។
សហព័ន្ធទប់ស្កាត់ជំងឺទឹកនោមផ្អែមអន្តរជាតិបានរាយការណ៍ថា មនុស្ស៤៦៣លាននាក់ មានអាយុចន្លោះពី២០ទៅ៧៩ឆ្នាំ មានជំងឺទឹកនោមផ្អែមនៅទូទាំងពិភពលោកគិតត្រឹមឆ្នាំ២០១៩ ។ នៅឆ្នាំ ២០៤៥ ចំនួនអ្នកកើតជំងឺទឹកនោមផ្អែមត្រូវបានព្យាករណ៍ថា នឹងកើនឡើងដល់ ៧០០លាននាក់ ស្មើនឹង១០,៩ភាគរយនៃចំនួនប្រជាជនពិភពលោក។
តំបន់ដែលមានអ្នកកើតជំងឺទឹកនោមផ្អែមច្រើនបំផុតគឺនៅអាមេរិកខាងជើង និងមជ្ឈិមបូព៌ា។ ចំណែកតំបន់អាស៊ីខាងត្បូង ត្រូវបានគេកំណត់ថា ជាតំបន់ដែលមានអត្រាអ្នកកើតជំងឺទឹកនោមផ្អែមកើនឡើងលឿនបំផុតមួយ ប្រហាក់ប្រហែលនឹងតំបន់អាស៊ីខាងលិច និងអាម៉េរិកឡាទីន។ នៅឆ្នាំ២០៤៥ តំបន់នេះនឹងអាចមានតួលេខអ្នកកើតជំងឺស្មើនឹង១១,៣ភាគរយនៃចំនួនប្រជាជនក្នុងតំបន់។
តាមការសិក្សា ចំនួនករណីអ្នកជំងឺទឹកនោមផ្អែមដែលបានធ្វើរោគវិនិច្ឆ័យក្នុងពេលថ្មីៗនេះនៅក្នុងប្រទេសអភិវឌ្ឍមួយចំនួន កំពុងមានអត្រាធ្លាក់ចុះ។ យ៉ាងណាមិញ នៅក្នុងប្រទេសកំពុងអភិវឌ្ឍ មនុស្សជាច្រើននៅតែបន្តកើតជំងឺទឹកនោមផ្អែម។ នេះក៏ដោយសារតែប្រជាជនរស់នៅប្រទេសកំពុងអភិវឌ្ឍមានរបៀបរស់នៅដែលត្រូវបានផ្សារភ្ជាប់ជាមួយនឹងស្ថានភាពសេដ្ឋកិច្ច។ ពួកគេភាគច្រើនអាចមានរបបអាហារមិនល្អចំពោះដូចជារបបអាហារដែលមានជាតិស្ករ និងខ្លាញ់ខ្ពស់ ក៏ដូចជាមិនធ្វើលំហាត់ប្រាណជាដើមដែលជាកត្តាបណ្តាលឱ្យកើតជំងឺទឹកនោមផ្អែម។
គួរបញ្ជាក់ថា ជំងឺទឹកនោមផ្អែមមាន២ប្រភេទ គឺប្រភេទទី១ និងទី២ ហើយភាគច្រើនមនុស្សនៅជុំវិញពិភពលោកកើតជំងឺទឹកនោមផ្អែមប្រភេទទី២។ ក្រៅពីកត្តាចំណីអាហារ និងលំហាត់ប្រាណ មូលហេតុនៃការកើនឡើងអត្រាអ្នកកើតជំងឺទឹកនោមផ្អែមក៏ត្រូវបានចូលរួមដោយ កង្វះការយកចិត្តទុកដាក់តាមដានសុខភាពផងដែរ។ តាមរបាយការណ៍ ក្នុងឆ្នាំ២០១៩ អ្នកមានជំងឺទឹកនោមផ្អែមដែលមិនបានធ្វើរោគវិនិច្ឆ័យត្រូវបានប៉ាន់ប្រមាណថាមានចំនួន ជាង ២៣១,៩លាននាក់នៅទូទាំងពិភពលោក ដែលស្ទើរតែពាក់កណ្តាលនៃករណីសរុប៕
© រក្សាសិទ្ធិដោយ thmeythmey.com
«ស្មើរនេះ», «ថ្មើរនេះ» និង«ថ្មារនេះ» មួយណាត្រូវ?
ភ្នំពេញ 3 ថ្ងៃ
