ព្រះសីហនុ៖ ចំណតកុងតឺន័រថ្មី នៅខេត្តព្រះសីហនុ ដែលមានប្រវែង ៣៥០ម៉ែត្រ និងជម្រៅទឹក១៤,៥ ម៉ែត្រ នឹងត្រូវសាងសង់ឡើងក្នុងឆ្នាំ២០២២ ហើយនឹងដាក់ដំណើរការ រយៈពេល៣ឆ្នាំបន្ទាប់។ លោក គួច ចំរើន ដែលជាអភិបាលខេត្តព្រះសីហនុ បានអះអាងថា ក្រោយកំពង់ផែទឹកជ្រៅនេះ ដាក់ឱ្យដំណើរការ សេវាដឹកជញ្ជូនទំនិញនឹងចុះថ្លៃ បាន២០០ដុល្លារក្នុងមួយកុងតឺន័រ។
គម្រោងសាងសង់ផែកុងតឺន័រថ្មី របស់កំពង់ផែស្វយ័តក្រុងព្រះសីហនុ នឹងត្រូវអនុវត្តឡើងនៅដើម ឆ្នាំ២០២២ ដោយនឹងអាចប្រតិបត្តិការនៅឆ្នាំ២០២៥។ កម្ពុជា ទទួលបានកម្ចីជាង២០០លានដុល្លារ ពីរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តជាតិជប៉ុន(JACA) សម្រាប់អភិវឌ្ឍ ចំណតផែកុងតឺន័រថ្មីនេះ នូវដំណាក់កាលទីមួយ ដែលប្រវែង៣៥០ម៉ែត្រ។
លោក គួច ចំរើន អភិបាលខេត្តព្រះសីហនុ ក្នុងសន្នីសិទកាសែត កាលពីថ្ងៃទី២៩វិច្ឆិកា ឆ្នាំ២០២១។
បើតាមលោក គួច ចំរើន កម្ចីពីរដ្ឋាភិបាលជប៉ុននេះ នឹងប្រែក្លាយកំពង់ផែព្រះសីហនុឱ្យមានសមត្ថភាពទទួលនាវា ចូលចតដែលមាន ជម្រៅទឹករហូតដល់១៤,៥ម៉ែត្រ។ កំពង់ផែថ្មីនេះ មានសមត្ថភាពផ្ទុកកុងតឺន័រចំនួន ៦ម៉ឺន DWT (៥០០០ TEUs) ចូលចត និងអាចអនុញ្ញាតឱ្យនាវាដឹកកុងតឺន័រឆ្លងកាត់តំបន់អាស៊ី ចំនួន៩៣ភាគរយ ចូលមកកាន់កំពង់ផែក្រុងព្រះសីហនុ។
«ចំណុចនេះ គឺធ្វើឱ្យសក្កានុពលកំពង់ផែយើង បានផ្តល់ឱកាសឱ្យនាវានៅក្នុងតំបន់អាស៊ីប៉ាស៊ីហ្វិករបស់យើងប្រមាណ៩០ភាគរយអាចចូលចតបាន និងធ្វើឱ្យតម្លៃទំនិញតាមផ្លូវទឹករបស់យើងអាចប្រកួតប្រជែងជាមួយប្រទេសជិតខាងបាន»។ នេះជាការលើកឡើងរបស់អភិបាលខេត្តព្រះសីហនុ ដោយបានបញ្ជាក់ថា កំពង់ផែដែលកំពុងដំណើរនាបច្ចុប្បន្ន មានសមត្ថភាពអាចឱ្យនាវាចូលចត់បានត្រឹមជម្រៅទឹកតែ៩,៥ម៉ែត្រប៉ុណ្ណោះ ។
ថ្លែងក្នុងសន្នីសិទសារព័ត៌មាន កាលពីថ្ងៃទី២៩ វិច្ឆិកា ឆ្នាំ២០២១ អភិបាលខេត្តព្រះសីហនុ បានបន្ថែមថា ៖ «បន្ទាប់ពីកំពង់ផែទឹកជ្រៅខេត្តព្រះសីហនុដាក់ឱ្យដំណើរការនៅក្នុងឆ្នាំ២០២៥ តម្លៃដឹកជញ្ជូនទំនិញតាមផ្លូវទឹកយើង អាចនឹងចុះបាន២០០ដុល្លារក្នុងមួយកុងតឺន័រ បើប្រៀបធៀបដឹកជញ្ជូន នាបច្ចុប្បន្ន»។
សូមជម្រាបថា ស្វយ័តក្រុងព្រះសីហនុ សព្វថ្ងៃ អាចស្រូបយកនូវចំណែកទីផ្សារបានជាង៧០ភាគរយ នៃចរាចរណ៍ទំនិញចេញ-ចូលសរុបរបស់កម្ពុជា ដែលបានបម្រើនូវសេវាកម្មចំនួនបួនប្រភេទ។ ក្នុងនោះ មានកំពង់ផែជាទីកន្លែងប្រើប្រាស់សម្រាប់ជាចំណតនាវាដឹកអ្នកធ្វើដំណើរទេសចរណ៍, សម្រាប់ដឹកជញ្ជូនទំនិញរាយ, សម្រាប់ដឹកជញ្ជូនកុងត័រនឺឆ្លងកាត់ និងសម្រាប់ជួយគាំទ្រជាមូលដ្ឋានភស្តុភារផ្គត់ផ្គង់ការរុករកប្រេង និងការធ្វើអាជីវកម្មប្រេងក្នុងដែនសមុទ្រកម្ពុជា ដែលនឹងជំរុញដល់ការអភិវឌ្ឍផែ្នកសេដ្ឋកិច្ចជាតិ។
៥ឆ្នាំមុនពេលមានវិបត្តិកូវីដ-១៩ ទំនិញឆ្លងកាត់កំពង់ផែស្វយ័តក្រុងព្រះសីហនុមានកំណើនជាមធ្យម ១៤ ភាគរយជារៀងរាល់ឆ្នាំ។ ប៉ុន្តែសម្រាប់ឆ្នាំ២០២០ មានកំណើនត្រឹម៤ភាគរយប៉ុណ្ណោះ ធៀបនឹងឆ្នាំ២០១៩។ ដោយឡែក ក្នុងត្រីមាសទីមួយឆ្នាំ២០២១ គឺមានកំណើន៦ភាគរយ ធៀបនឹងរយៈពេលដូចគ្នាឆ្នាំ២០២០។ នេះបើតាមរបាយការណ៍របស់កំពង់ផែស្វយ័តក្រុងព្រះសីហនុ៕