ភ្នំពេញ៖ មៀនប៉ៃលិន និងត្រីប្រារបស់កម្ពុជា នឹងនាំចូលទីផ្សារប្រទេសចិនបាន ក្នុងអំឡុងឆ្នាំ២០២២។ លោក វ៉ាង វិនធាន បានថ្លែងដូច្នេះ នៅចំពោះមុខសម្តេច ហ៊ុន សែន ក្នុងពិធីសម្ពោធដាក់ឱ្យប្រើប្រាស់ជាផ្លូវការផ្លូវជាតិលេខ១១ និងផ្លូវក្នុងក្រុងព្រៃវែង នាព្រឹកថ្ងៃទី៦ធ្នូ។
បើតាមលោក វ៉ាង វិនធាន ភាគីចិនបានសម្រេចចិត្តក្នុងសិក្សា និងវិភាគហានិភ័យលើផ្លែមៀន និងត្រីប្រារបស់កម្ពុជា តាមរយៈវីដេអូពីចម្ងាយដែលជាវិធានការសំខាន់មួយ ដើម្បីអនុវត្តកុងសង់ស៊ីស ក្នុងការប្រជុំតាមរយៈប្រព័ន្ធវីដេអូ រវាងលោក លី ខឺឈាង នាយករដ្ឋមន្ត្រីសាធារណប្រជាមានិតចិន ជាមួយសម្តេច ហ៊ុន សែន នាពេលកន្លងមក។ ឯកអគ្គរដ្ឋទូតចិនប្រចាំកម្ពុជារូបនេះ បាននិយាយដូច្នេះ៖ «ប្រសិនបើរលូនផ្លែមៀនកម្ពុជា នឹងអាចនាំចេញទៅកាន់ទីផ្សារប្រទេសចិននាពេលរដូវប្រមូលផលលើកក្រោយ។ រីឯត្រីប្រាវិញ នឹងនាំចេញទៅកាន់ប្រទេសចិនក្នុងពេលដ៏ខ្លីខាងមុខ»។
លោក វ៉ាង វិនធាន អគ្គឯករដ្ឋទូតចិនប្រចាំកម្ពុជា កំពុងថ្លែងក្នុងពិធីដាក់ឱ្យប្រើប្រាស់ផ្លូវជាតិលេខ១១ នាថ្ងៃទី៦ធ្នូ។ រូបថត៖ MPWT
ជាមួយគ្នានេះ សម្តេច ហ៊ុន សែន បានលើកឡើងថា អ្នកចិញ្ចឹមត្រីប្រា និងអ្នកដាំដុះមៀនប៉ៃលិន គឺនឹងមានទីផ្សារប្រទេសចិនដ៏ធំសម្រាប់នាំចេញ ប៉ុន្តែការនាំចេញទាំងនេះត្រូវធានាពីគុណភាព។ បើតាមសម្តេច ប្រសិនបើដូចផែនការមែននោះ ទីផ្សារចិនដ៏ធំមួយនេះ នឹងជំរុញឱ្យមានការលើកទឹកចិត្តចិញ្ចឹមត្រីប្រា កាន់តែច្រើនក្នុងប្រទេសកម្ពុជា និងជំរុញការដាំដុះ ឬថែទាំផ្លែមៀនប៉ៃលិនបន្ថែម សម្រាប់នាំទៅប្រទេសចិន ដោយត្រង់។
សម្តេច ហ៊ុន សែន និយាយដូច្នេះ៖ «ត្រីប្រា[របស់កម្ពុជា]នឹងអាចបង្ហាញវត្តមាននៅលើតុទទួលទានអាហាររបស់ប្រជាជនចិន ដ៏ខ្លីខាងមុខ។ នេះជាការសង្ឃឹមរបស់យើង»។
បើតាមលោក ពុំ សុថា ប្រធានរដ្ឋភិបាលជលផលនៃក្រសួងកសិកម្ម រុក្ខាប្រមាញ់ និងនេសាទ ខាងរដ្ឋបាលគយនៃប្រទេសចិន គឺបានអនុញ្ញាតឱ្យចូលនាំត្រីពីកម្ពុជាហើយ ប៉ុន្តែការនាំចូលនោះ គឺត្រូវគោរពតាមលក្ខខណ្ឌតម្រូវមួយចំនួន។ លក្ខខណ្ឌតម្រូវទាំងនោះ គឺភាគីចិនផ្តោតលើគុណភាពស្រះក្នុងការចិញ្ចឹមត្រី និងទីកន្លែងកែច្នៃ រួមទាំងកន្លែងវេចខ្ចប់ត្រី។ នេះជាការលើកឡើងរបស់លោក សុថា ដោយបាននិយាយប្រាប់សារព័ត៌មានThmeyThmey តាមទូរសព្ទ នារសៀលថ្ងៃទី៦ធ្នូ ថា ៖ « ខែក្រោយនេះ[ខែមករាឆ្នាំ២០២២] ខាងគយចិននឹងប្រជុំជាមួយយើងតាមប្រព័ន្ធអនឡាញតែម្តង។ ការប្រជុំនោះខាងចិននឹងពិនិត្យមើលរោងចក្រកែច្នៃត្រីយើង , កន្លែងឡើងផលនេសាទយើង និងកន្លែងដែលយើងចិញ្ចឹមត្រីប្រា ឬកន្លែងវារីវប្បកម្មតែម្តង»។
ប្រធានរដ្ឋបាលជលផលរូបនេះបានអះអាង ដូច្នេះ៖ «បើខាងគយចិនទទួលយក[លក្ខខណ្ឌតម្រូវ]បានហើយ នោះបានយើងក្នុងនាមរដ្ឋបាលជលផល បានផ្សព្វផ្សាយឱ្យពលរដ្ឋចិញ្ចឹមត្រីប្រាបន្ថែមដើម្បីទៅទីផ្សារប្រទេសចិន»។
សូមរម្លឹកថា វារីប្បករនៅកម្ពុជា ពិសេសក្រុមអ្នកចិញ្ចឹមត្រីប្រា បានជួបវិបត្តិទីផ្សារតាំងចុងឆ្នាំ២០២០មក ដែលមកពីការរាលដាលនៃជំងឺកូវីដ-១៩ខណៈត្រីប្រាក្នុងស្រុកក៏មិនប្រកួតប្រជែងតម្លៃជាមួយត្រីដែលនាំចូលពីប្រទេសវៀតណាម បានផងដែរ។ រីឯដំណាំមៀនប៉ៃលិនវិញ ជាង៨ឆ្នាំមកហើយ ដែលប្រជាកសិករ និងសហគមន៍ ដាំមៀនប៉ៃលិន (ឬ តាងែន) នាំទៅទីផ្សារប្រទេសចិន តាមរយៈថៃដោយជ្រកក្រោមនិមិ្មតសញ្ញាឬពាក្យProduced in Thailand។
ជារៀងរាល់ឆ្នាំ មៀនប៉ៃលិន ត្រូវបានប្រជាសហគមន៍ដឹកជញ្ជូនទៅប្រទេសថៃតាមច្រករបៀងក្នុងខេត្តបាត់ដំបង បានត្រឹមតែ៨ពាន់តោនប៉ុណ្ណោះនាំទៅចិន ខណៈលទ្ធភាពក្នុងការផលិតបានរហូត២,៥ម៉ឺនតោន។ ប៉ុន្តែសម្រាប់រដូវប្រមូលផលមៀនប៉ៃលិននាឆ្នាំ២០២១ ត្រូវបានជួបបញ្ហាទីផ្សារព្រោះតែភាគីប្រទេសថៃមិនអនុញ្ញាតឱ្យនាំចូលដូចសព្វដង។ បញ្ហទីផ្សារ សម្តេច ហ៊ុន សែន ក៏បានអន្តរាគមន៍ទីផ្សារខ្លី(ក្នុងរយៈពេលមួយខែ)ជូនដល់កសិករ ផងដែរ។
បច្ចុប្បន្ន កម្ពុជាមានផ្ទៃដីដាំដុះតាង៉ែនទូទាំងប្រទេស សរុប ១៣,៦០៨ហិកតា នៅក្នុងខេត្តចំនួន១៤ ។ ដោយឡែក ខេត្តដែលមានកសិករដាំដុះប្រភេទនេះច្រើនជាងគេ គឺខេត្តប៉ៃលិន បាត់ដំបង រតនៈគិរី និងបន្ទាយមានជ័យ។ ក្នុងចំណោមផ្ទៃដីដាំដុះមៀនប៉ៃលិនឬតាង៉ែនជាង១,៣ម៉ឺនហិកតានេះ គឺមាន៦,៩២៧ហិកតា ដែលកសិករត្រូវទទួលបានទិន្នផលនៅក្នុងឆ្នាំ២០២១។ បើតាមលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដែលបានបន្ថែមថា ទិន្នផលនៃផ្លែតាង៉ែន បើគិតជាមធ្យមមានចំនួន១៦តោន ក្នុងផ្ទៃដីមួយហិកតា៕