លោក ចម ប្រសិទ្ធ៖ ភូមិប្រមាណ៥០ភាគរយនៅកម្ពុជា មិនទាន់មានការផ្គត់ផ្គង់ទឹកស្អាត

ជាតិ

សង្គមជាតិ

លោក ចម ប្រសិទ្ធ៖ ភូមិប្រមាណ៥០ភាគរយនៅកម្ពុជា មិនទាន់មានការផ្គត់ផ្គង់ទឹកស្អាត

08, Dec 2021 , 11:03 am

រូបភាព

លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។ រូបថត៖ ក្រសួងឧស្សាហកម្ម

ដោយ: អ៊ូ សុខមាន (OU Sokmean)

ភ្នំពេញ៖ ភូមិប្រមាណ៥០ភាគរយទៀតនៅកម្ពុជា មិនទាន់មានការផ្គត់ផ្គង់ទឹកស្អាតសម្រាប់ប្រើប្រាស់នៅឡើយ។ នេះជាការលើកឡើងរបស់ លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

ការសិក្សាថ្មីបានបង្ហាញថា កម្ពុជានៅមានភូមិប្រមាណ៥០ភាគរយនៅទូទាំងប្រទេស មិនទាន់មានការផ្គត់ផ្គង់ទឹកស្អាតប្រើប្រាស់។ លោក ចម ប្រសិទ្ធ បានលើកឡើងដូច្នេះក្នុងជំនួបពិភាក្សាការងារជាមួយលោក Srinivasan Palle Venkata ប្រធានប្រតិភូរបស់ធនាគារអភិវឌ្ឍន៍អាស៊ី(ADB) កាលពីថ្ងៃទី២ធ្នូ ឆ្នាំ២០២១។ លោក បានបញ្ជាក់ថា ដើម្បីអាចសម្រេចបានគោលនយោបាយផ្គត់ផ្គង់ទឹកស្អាតរបស់រាជរដ្ឋាភិបាលនៅត្រឹម២០២៥ គឺចាំបាច់ត្រូវមានហិរញ្ញប្បទានបន្ថែមទៀត សម្រាប់គាំទ្រដល់ប្រតិបត្តិករទឹកស្អាត ក្នុងការពង្រីកសមត្ថភាពផ្គត់ផ្គង់ទឹកស្អាតក្នុងតំបន់របស់ខ្លួន។

បើតាម លោក ចម ប្រសិទ្ធ បច្ចុប្បន្នក្រសួងឧស្សាហកម្ម កំពុងរៀបចំសេចក្តីព្រាងច្បាប់គ្រប់គ្រងការផ្គត់ផ្គង់ទឹកស្អាតដែលនឹងរួមចំណែកយ៉ាងសំខាន់ ក្នុងការអភិវឌ្ឍវិស័យទឹកស្អាតព្រមទាំងបង្កើតនូវយន្តការសម្របសម្រួលរវាងស្ថាប័នដែលមានការពាក់ព័ន្ធដើម្បីពង្រីកវិសាលភាពនៃការផ្គត់ផ្គង់ទឹកស្អាត ជូនប្រជាពលរដ្ឋឲ្យបានគ្រប់រូប។

ជាមួយគ្នានេះ លោក Srinivasan Palle Venkata ប្រធានប្រតិភូរបស់ធនាគារអភិវឌ្ឍន៍អាស៊ី (ADB) បានលើកឡើងថាគោលបំណងរបស់បេសកកម្ម ADB គឺដើម្បីស្វែងយល់ថាតើការជួយគាំទ្ររបស់ADB នៅក្នុងវិស័យទឹកស្អាតនៅកម្ពុជាយ៉ាងណាដែរ? ហើយតើយើងអាចរៀនសូត្របានអ្វីខ្លះពីការគាំទ្រនេះ, (ចំណុចល្អ និងចំណុចខ្វះខាត)? តើបញ្ហាអ្វីខ្លះ ដែលក្រសួងមានបំណងស្នើសុំឱ្យ ADB បន្តជួយគាំទ្រ ក៏ដូចជាបញ្ហាដែលជួបប្រទះក្នុងការអនុវត្តគម្រោងនាពេលកន្លងមក។

ពាក់ព័ន្ធនឹងការលើកឡើងរបស់លោក Srinivasan Palle Venkata លោក ចម ប្រសិទ្ធ បានថ្លែងថា គោលនយោបាយទឹករបស់ ADB គឺស្របជាមួយនឹងគោលនយោបាយរបស់រាជរដ្ឋាភិបាលក្នុងការផ្គត់ផ្គង់ទឹកស្អាតជូនប្រជាពលរដ្ឋនៅទីប្រជុំជនឱ្យបាន ១០០ភាគរយ នៅត្រឹមឆ្នាំ ២០២៥។ ដើម្បីអាចសម្រេចបានគោលនយោបាយនេះក្រសួងត្រូវការជាចាំបាច់នូវការជួយគាំទ្រពីដៃគូអភិវឌ្ឍន៍នានា។ ក្នុងនោះក៏មាន ADBផងដែរ។

លោកបានបន្ថែម ថា បច្ចុប្បន្នក្រសួងកំពុងអនុវត្តគម្រោងចំនួន២ដែលគាំទ្រដោយ ADB ។ ក្នុងនោះរួមមាន គម្រោងផ្គត់ផ្គង់ទឹកស្អាតទីប្រជុំជន (Urban Water Supply Project)និងគម្រោងផ្គត់ផ្គង់ទឹកស្អាតនិងអនាម័យខេត្ត (Provincial Water Supply and Sanitation Project)។ លោកបានបញ្ជាក់ថា គម្រោងទាំង២នេះ កំពុងដំណើរការបានល្អទៅតាមផែនការ ដែលបានគ្រោងទុកទោះបីកន្លងមកមានការយឺតយ៉ាវខ្លះដោយមូលហេតុនៃការកែសម្រួលរចនាសម្ព័ន្ធគ្រប់គ្រងរបស់អគ្គនាយកដ្ឋានទឹកស្អាតនិងការរីករាលដាលជំងឺកូវីដ-១៩ ក៏ដូចជា មន្ត្រីរបស់គម្រោងមិនទាន់មានបទពិសោធគ្រប់គ្រាន់ក្តី។

បើតាមការចុះផ្សាយរបស់ក្រសួងឧស្សាហកម្ម ADB បានផ្តល់ហិរញ្ញប្បទានក្នុងការអភិវឌ្ឍវិស័យទឹកស្អាតនៅកម្ពុជា ចាប់តាំងពីឆ្នាំ២០១១មក៕