ភ្នំពេញ៖ នៅឆ្នាំ២០២២ ក្រុមហ៊ុន OCIC នឹងចំណាយថវិកាប្រមាណ៤៧៦លានដុល្លារបន្ថែម លើការសាងសង់អាកាសយានដ្ឋានអន្តរជាតិភ្នំពេញថ្មី ដែលមានទីតាំងនៅក្នុងខេត្តកណ្តាល ដែលគ្រោងនឹងបញ្ចប់ការសាងសង់នៅឆ្នាំ២០២៣។ នេះបើការលើកឡើងលោក ពុង ឃាវសែ អគ្គនាយកក្រុមហ៊ុន OCIC ដោយបានបញ្ជាក់ថា គម្រោងថវិកានេះបើគិតជាចំណាយប្រចាំថ្ងៃ ជាមធ្យមមានប្រមាណ១,២៨លានដុល្លារ។
បច្ចុប្បន្នក្រុមហ៊ុន OCIC សម្រេចការសាងសង់អាកាសយានដ្ឋានអន្តរជាតិភ្នំពេញថ្មី ដែលមានទីតាំងក្នុងទឹកដីខេត្តកណ្តាល បាន២៧ភាគរយ ក្រោយបើកការដ្ឋានសាងសង់ ចាប់តាំងពីឆ្នាំ២០១៨មក។ បើតាម អគ្គនាយកក្រុមហ៊ុនOCIC លោក ពុង ឃាវសែ សមិទ្ធផលដែលក្រុមហ៊ុនសម្រេចបាននេះ គឺបានប្រើប្រាស់ថវិកាអស់ប្រមាណ ៣៧៥លានដុល្លារហើយ។
រូបគំរូនៃអាកាសយានដ្ឋានអន្តរជាតិភ្នំពេញថ្មី។ រូបថត៖ ហ្វេសប៊ុក សម្តេច ហ៊ុន សែន
លោក ពុង ឃាវសែ បានបន្តលើកឡើងថា ដូច្នេះ៖ «ឆ្នាំ២០២២[ក្រុមហ៊ុន] គ្រោងចំណាយថវិកាបន្ថែមប្រមាណ៤៧៦លានដុល្លារទៀត។ [បើ]គិតជាមធ្យមចំណាយប្រមាណ១,២៨លានដុល្លារ ក្នុងមួយថ្ងៃ»។ អគ្គនាយកក្រុមហ៊ុនOCICរូបនេះ បានរម្លឹកថា គម្រោងសាងសង់អាកាសយានដ្ឋានអន្តរជាតិភ្នំពេញថ្មីនៅលើផ្ទៃដីទំហំ ២,៦០០ហិកតា ដែលស្ថិតស្រុកកណ្តាលស្ទឹង ខេត្តកណ្តាលនេះ មានទំហំវិនិយោគសរុប ១ ៥០០ដុល្លារ។
អាកាសយានដ្ឋានអន្តរជាតិភ្នំពេញថ្មីដ៏សម្បើមមួយនេះ អាចផ្ទុកយន្តហោះប្រភេទ4F ដោយទទួលបានការហោះហើរពីឆ្ងាយឆ្លងទ្វីប ដែលអាចឲ្យប្រភេទយន្ត ហោះ ធុនយក្ស រហូតដល់ Airbus A380-800 និង យន្តហោះ Boeing 747-800 ឱ្យចុះចតបាន។ អាកាសយានដ្ឋានអន្តរជាតិមួយនេះ អាចនឹងទទួលអ្នកដំណើរបានប្រមាណ ១៣លាននាក់នៅក្នុងឆ្នាំ២០២៣, ៣០លាននាក់នៅក្នុងឆ្នាំ២០៣០ និង ៥០លាននាក់នៅក្នុងឆ្នាំ២០៥០។
ការដ្ឋានសាងសង់អាកាសយានដ្ឋានអន្តរជាតិភ្នំពេញថ្មី។ រូបថត៖ ផេកហ្វេសប៊ុក សម្តេច ហ៊ុន សែន
បើតាម លោក ពុង ឃាវសែ សមិទ្ធផលនៃការសាងសង់អាកាសយានដ្ឋានអន្តរជាតិភ្នំពេញថ្មីដែលក្រុមហ៊ុនOCIC សម្រេចនាពេលកន្លងមករួមមាន ៖ ស្ថានីយអ្នកដំណើរមានផ្ទៃក្រឡា២៤៣ពាន់ម៉ែត្រក្រឡា, មជ្ឈមណ្ឌលផ្គត់ផ្គង់ថាមពល, ទីលានចំណតយន្តហោះទំហំ១៨៩ហិកតា, ស្ថានីយត្រួតពិនិត្យចរាចរណ៍ផ្លូវអាកាសកម្ពស់១១៨ម៉ែត្រ។ ការងារតភ្ជាប់ផ្លូវពីអាកាសយានដ្ឋានអន្តរជាតិភ្នំពេញថ្មី ទៅមហាវិថីសម្តេចតេជោ ហ៊ុន សែន ដោយមានផ្លូវប្រវែងជាង ១១គីឡូម៉ែត្រ និងស្ពានបេតុងឆ្លងកាត់ស្ទឹងព្រែកត្នោតចំនួន២, ជីកប្រឡាយព័ទ្ធទំនប់ជុំវិញអាកាសយានដ្ឋានប្រវែង ២០គីឡូម៉ែត្រ និងសម្រេចបានសាងសង់អគារផ្សេងៗជាដើម។
លោក បានបញ្ជាក់ថា បច្ចុប្បន្នការដ្ឋានសំណង់អាកាសយានដ្ឋានអន្តរជាតិថ្មីនេះ កំពុងប្រើប្រាស់កម្លាំងបុគ្គលិក និងកម្មករសរុប ៣,៧៤០នាក់។ ក្នុងនោះកម្លាំងបុគ្គលិក និងកម្មករក្នុងស្រុកមានជាង ៣ ១០០នាក់ និងបុគ្គលិក កម្មករមកពីបរទេសមកពីប្រទេសចំនួន៩ នៅអឺរ៉ុប និងអាស៊ីជាង៦០០នាក់៕