ក្រោយចោទប្រកាន់រួច អយ្យការ ក៏បានបញ្ជូនសំណុំរឿងរបស់បុរសជនជាតិទាំង៣ ទៅចៅក្រមស៊ើបសួរ ដើម្បីបន្តការស៊ើបសួរ។ ក្នុងចំណោមបុរសជនជាតិទាំង៣នាក់នោះ គឺម្នាក់អាយុ៥៨ឆ្នាំ ជាចិនដីគោកមានសញ្ជតិខ្មែរ ម្នាក់អាយុ៤៨ឆ្នាំ ជាចិនដីគោក និង ម្នាក់ទៀតអាយុ៣១ ជាចិនតៃវ៉ាន់។ 
 

នៅពាក់កណ្តាលខែធ្នូ ឆ្នាំ២០២១ កម្លាំងសមត្ថកិច្ចកម្ពុជាជាច្រើនផ្នែក បានធ្វើប្រតិបត្តិការបង្ក្រាបបទល្មើសគ្រឿងញៀនទ្រង់ទ្រាយធំមួយ នៅរោងចក្រ ក្នុងខេត្តកំពង់ស្ពឺ។ រោងចក្រនោះ ត្រូវបានឧក្រិដ្ឋជនជនជាតិចិន បង្កើតឡើង ហើយក៏លួចផលិតគ្រឿងញៀន។ សមត្ថកិច្ចកម្ពុជា បានប្រើពេលជាង២ខែក្នុងការស៊ើបអង្កេត មុននឹងឈានដល់ចេញធ្វើប្រតិបត្តិការបង្ក្រាបបទល្មើសគ្រឿងញៀនទ្រង់ទ្រាយធំនេះ។ មានបុរសចិនតៃវ៉ាន់ម្នាក់អាយុ៣២ឆ្នាំ ត្រូវបានបាញ់សម្លាប់ ដោយសាររូបគេបានបាញ់ប្រហារទៅលើសមត្ថកិច្ចមុន នៅពេលសមត្ថកិច្ច ចុះស្ទាក់ចាប់រូបគេ និងបក្សពួក ដែលកំពុងដឹកគ្រឿងញៀនតាមរថយន្ត ឆ្ពោះទៅខេត្តកំពង់សោម។
 

ក្រៅពីគ្រឿងញៀនជាង២តោន សមត្ថកិច្ច បានរកឃើញសារធាតុគីមីផ្សំសម្រាប់ផលិតគ្រឿងញៀនដល់ទៅ៨៤តោន។ លោក ម៉ក់ ជីតូ អគ្គស្នងការរងនគរបាលជាតិទទួលបន្ទុកកិច្ចការបង្ក្រាបគ្រឿងញៀន ប្រាប់អ្នកកាសែតថា ឧក្រិដ្ឋជន លួចផលិតគ្រឿងញៀននៅកម្ពុជា ក្នុងគោលបំណងលួចនាំចេញក្រៅប្រទេស៕