ជាតិ
សម្តេច ហ៊ុន សែន៖ បើចិត្តសឿងផ្តាច់ទូតពីមីយ៉ាន់ម៉ាទៅ ចាំមករិះគន់ខ្ញុំ
× សម្តេចនាយករដ្ឋមន្ត្រី ហ៊ុន សែន បានប្រតិកម្មចំពោះការលើកឡើងរបស់អតីតរដ្ឋមន្ត្រីការបរទេសថៃ និងអ្នកនយោបាយម៉ាឡេស៊ី ដែលបានរិះគន់លើគម្រោងរបស់សម្តេចទៅកាន់ប្រទេសមីយ៉ាន់ម៉ា។
សម្តេចបានអះអាងថា សម្តេចប្រឹងធ្វើឲ្យអាស៊ានទៅជា១០ មិនមែន៩នោះឡើយ។ « បើចិត្តសឿងផ្តាច់ទូតពីមីយ៉ាន់ម៉ាទៅ ចាំមករិះគន់ខ្ញុំ [....] បើអ្នកឯងមិនទាន់ផ្តាច់ទូតពីមីយ៉ាន់ម៉ា ទេ កុំមកបន្ទោសខ្ញុំ»។ នេះជាការវាយបករបស់សម្តេច ហ៊ុន សែន ដែលបានអះអាងថា ដំណើររបស់ខ្លួនទៅកាន់មីយ៉ាន់ម៉ា គឺក្នុងនាមនាយករដ្ឋមន្ត្រីកម្ពុជាផង និងជាប្រធានអាស៊ានផងដែរ។
លោក Kasit Piromya និងអ្នកនយោបាយផ្សេងទៀតក្នុងតំបន់ បានលើកឡើងថា ទស្សនកិច្ចរបស់មេដឹកនាំខ្មែរ ជាការបំផ្លាញការខិតខំការជិតឈានដល់គោលដៅ។ សម្តេចចោទសួរវិញថា តើអ្វីជាគោលដៅ? សម្តេចបានលើកឡើងថា បច្ចុប្បន្នគ្មានប្រទេសណាមួយឡើយដែលផ្តាច់ទូតពីមីយ៉ាន់ម៉ា។
«ពីអាស៊ានទៅ១០ មកអាស៊ាន៩ តើនេះជាការខិតខំមែនទេ? អ្នកឯងកំពុងខិតខំជំរុញឲ្យមីយ៉ាន់ម៉ា មានសង្គ្រាមស៊ីវិល»។ សម្តេចបានប្រតិកម្មចំពោះការលើកឡើងរបស់អ្នកដែលប្រឆាំងគម្រោងទស្សនកិច្ចរបស់សម្តេច។
ជាមួយគ្នានេះ សម្តេច ហ៊ុន សែន ក៏សម្តែងការហួសចិត្តផងដែរ ចំពោះការលើកឡើងថា សម្តេចទៅមីយ៉ាន់ម៉ា មិនមែនតំណាងឲ្យកម្ពុជា៕
© រក្សាសិទ្ធិដោយ thmeythmey.com