ក្រោយចាកចេញពីអង្គការអ្នកច្បាប់ការពារសិទ្ធិកម្ពុជា លោកបានចូលធ្វើការនៅស្ថានទូតសហរដ្ឋអាម៉េរិកប្រចាំកម្ពុជា ដោយកាន់គម្រោងអ្នកស្ម័គ្រចិត្តសហរដ្ឋអាម៉េរិក ដែលការងារនេះផ្តោតសំខាន់លើការអប់រំ និងអភិវឌ្ឍន៍សហគមន៍។ កាន់ការងារនេះរយៈពេល៨ឆ្នាំ លោក ដារារដ្ឋ ទទួលបានបទពិសោធន៍ជាច្រើនទាំងភាសា ការទំនាក់ទំនង ពិសេសនោះគឺផ្នត់គំនិតការអភិវឌ្ឍសហគមន៍ដោយការភ្ជាប់ខ្លួនជាមួយសហគមន៍ធម្មជាតិ និងការអភិវឌ្ឍរយៈពេលយូរអង្វែង ដែលជាអ្វីដែលលោករៀនបានពីអ្នកស្ម័គ្រចិត្តជនជាតិអាម៉េរិក។

 

នៅឆ្នាំ២០១០ លោកបានចេញពីការងារមួយនេះ ទៅស្ថាប័នអន្ដរជាតិមួយទៀត ដោយផ្តោតលើការងារច្បាប់។ ក្រោយមកក៏បានវិលទៅស្រុកកំណើតវិញ បន្ទាប់ពីបានសិក្សានិងស្វែងយល់ពីបញ្ហាវិបត្តិទីក្រុង និងការបំពុលទីក្រុងជាដើម។ មកដល់ទឹកដីកំណើត លោក ដារារដ្ឋ ផ្តោតគោលដៅសំខាន់ៗ៣ ទី១ ធ្វើការសម្រាប់ខ្លួនឯង ដោយមានការវិនិយោគជាលក្ខណៈគ្រួសារ ទី២ ជាអ្នកស្ម័គ្រចិត្ត និងជួយរៀបចំយុទ្ធសាស្រ្ដដឹកនាំសាលារៀនមួយនៅកំពត និងទី៣ ការអប់រំផ្នែកបរិស្ថាន ដែលបច្ចុប្បន្ននេះ ឈានចូលដល់ការចូលរួមជាមួយសួនលំហែភូមិក្រាំង ដែលជួយរៀបចំតាមបែបធម្មជាតិ។ 

 

មានវ័យ៤៧ឆ្នាំ លោក ដារារដ្ឋ ក្នុងនាមអ្នកគិតគូរពីបញ្ហាបរិស្ថានមួយរូប ចង់ឃើញយុវជនបង្ហាញទង្វើជាជាងគ្រាន់តែបានសិក្សាត្រឹមទ្រឹស្ដី។ លោកថា យុវជនគួរហ៊ានចាប់ផ្តើមបង្ហាញដល់សង្គម តាមរយៈទង្វើត្រង់ៗដូចជា បដិសេដចំពោះការប្រើប្រាស់បំពង់បឺត ឬទុយោ ព្រោះថាទង្វើនេះមិនមែនជាការអន់នោះទេ ផ្ទុយទៅវិញវាបញ្ជាក់ថា យើងពិតជាបុគ្គលមួយដែលស្រឡាញ់ និងខ្វល់ខ្វាយបញ្ហាបរិស្ថានពិតប្រាកដមែន៕