គណៈកម្មការទន្លេមេគង្គ(MRC) នឹងជួយកម្ពុជា ឡាវ ថៃ និងវៀតណាម ក្នុងការរក្សាឱ្យបាននូវមុខងារអេកូឡូស៊ីនៃទន្លេមេគង្គ ក្រោមជំនួយជាង១,១លានដុល្លារពីប្រទេសលុចសំបួ។ បើតាមសេចក្តីក្រសួងព័ត៌មានរបស់MRC កាលពីថ្ងៃទី២០មករា ឆ្នាំ២០២២ ការរួមចំណែករបស់ប្រទេសលុចសំបួនេះ គឺធ្វើឡើងបន្ទាប់ពីរលកថ្មីនៃការផ្តល់មូលនិធិដៃគូអភិវឌ្ឍន៍ដល់MRC នៅពេលដែលគណៈកម្មការចាប់ផ្តើមអនុវត្តផែនការយុទ្ធសាស្រ្តរបស់ខ្លួន២០២១-២០២៥ ក្រោមទិសដៅថ្មីដើម្បីជម្នះការគំរាមកំហែងជាច្រើនដែលអាងទន្លេមេគង្គកំពុងប្រឈម។

 

លោក Anoulak Kittikhoun នាយកប្រតិបត្តិនៃលេខាធិការដ្ឋានMRC បានលើកឡើងថា ជំនួយថវិកាពីប្រទេសប្រទេសលុចសំបួ គឺបានកើតឡើងចំពេលវេលាដ៏សំខាន់សម្រាប់អាងទន្លេមេគង្គក្រោម ខណៈបញ្ហាប្រឈមដែលបង្កឡើងដោយការប្រែប្រួលអាកាសធាតុ។ ជាពិសេសគ្រោះរាំងស្ងួត និងទឹកជំនន់បានបង្កើនសម្ពាធដ៏រសើបលើប្រព័ន្ធអេកូឡូស៊ីរបស់អាងទន្លេមេគង្គ។  លោកបានបន្តនិយាយដូច្នេះ៖«បើគ្មានការអន្តរាគន៍ទេ ការចុះខ្សោយនៃប្រព័ន្ធអេកូឡូស៊ីរបស់អាងអាចប៉ះពាល់យ៉ាងធ្ងន់ធ្ងរដល់ប្រជាជន និងសេដ្ឋកិច្ច ដែលពឹងផ្អែកលើទន្លេមេគង្គ»។ 

 

បើតាមនាយកប្រតិបត្តិនៃលេខាធិការដ្ឋានរូបនេះ  ក្រោមទិសដៅយុទ្ធសាស្ត្រថ្មី MRC នឹងធានាថាទឹក និងវិស័យពាក់ព័ន្ធនានាត្រូវបានផ្តល់នូវព័ត៌មាន និងឧបករណ៍ដែលត្រូវការ ដើម្បីសម្រេចបាននូវការអភិវឌ្ឍដ៏ប្រសើរបំផុត និងមាននិរន្តរភាព ខណៈផែនការផលិតថាមពលជាតិថ្មីធ្វើការគិតគូរអំពីប្រភពថាមពលដែលអាចផលិតបានពេញលេញ និងបំពេញគោលបំណងជាច្រើន ក៏ដូចជាការប្រើប្រាស់បន្ថែមនៃថាមពលខ្យល់ និងពន្លឺព្រះអាទិត្យ។

 

លោក Anoulak Kittikhoun បានអះអាង ថា៖« MRC នឹងស្វែងរកវិធីសម្របសម្រួលចំពោះប្រតិបត្តិការនៃហេដ្ឋារចនាសម្ព័ន្ធទឹកនៅទូទាំងអាងដើម្បីបង្កើនអត្ថប្រយោជន៍ និងកម្រិតផលប៉ះពាល់បរិស្ថានអវិជ្ជមានលើចរន្តទឹកទន្លេមេគង្គ និងប្រជាជន»។

 

ជាមួយគ្នានេះ លោក Sam Schreiner ដែលជាភារធារីនៃស្ថានទូតលុចសំបួ ប្រចាំប្រទេសឡាវ បានថ្លែង ថា ការប្តេជ្ញាចិត្តរបស់ប្រទេសលុចសំបួ ចំពោះអាងទន្លេមេគង្គគឺនៅតែរឹងមាំ ហើយរដ្ឋាភិបាលរបស់ប្រទេសលុវសំបួ ចង់ឃើញការអភិវឌ្ឍប្រកបដោយវិបុលភាព និងការទទួលខុសត្រូវ នៅក្នុងតំបន់មេគង្គ។ លោក បាននិយាយដូច្នេះ៖ «យើងជឿជាក់ថា កិច្ចព្រមព្រៀងនេះនឹងទៅជាមធ្យោបាយមួយ ដើម្បីជួយ MRC និងប្រទេសជាសមាជិកក្នុងការដោះស្រាយហានិភ័យដែលពាក់ព័ន្ធដែលកើតឡើងពីការប្រែប្រួលអាកាសធាតុ និងការផ្លាស់ប្តូរលក្ខណៈលំហូរនៃអាងទន្លេមេគង្គក្រោម»។ នេះ

 

បើយោងតាមសេចក្តីប្រកាសព័ត៌មានខាងលើ ជំនួយនេះនឹងគាំទ្រដល់សកម្មភាពជាច្រើនរបស់MRC រួមទាំងការគ្រប់គ្រងអាងទន្លេស្នូល ការប្រមូលទិន្នន័យ និងធ្វើឱ្យប្រសើរឡើងនូវមុខងារត្រួតពិនិត្យ គំរូ និងការវាយតម្លៃ។ លើសពីនេះ ជំនួយនឹងជួយដល់ការធ្វើផែនការ និងការព្យាករណ៍ និងរួមចំណែកដល់ប្រព័ន្ធព្រមាន និងឆ្លើយតបបន្ទាន់របស់ MRC ផងដែរ។ ។

 

ក្នុងរយៈពេល១០ឆ្នាំចុងក្រោយនេះ ប្រទេសលុចសំបួបានរួមចំណែកជិត៤លានដុល្លារ ដល់ផែនការយុទ្ធសាស្រ្តMRC កាលពីឆ្នាំ២០១៦-២០២០  ហើយបានគាំទ្រដល់គំនិតផ្តួចផ្តើមការផ្លាស់ប្តូរអាកាសធាតុ និងការសម្របខ្លួនរបស់MRC ក្នុងអំឡុងឆ្នាំ២០១០-២០១៥៕