ជាធម្មតា ការលេងទឹកគឺជាចំណង់ចំណូលចិត្តរបស់កុមារទូទៅ។ វាជាការកំសាន្តផង និងជាកីឡាដ៏ល្អមួយសម្រាប់សុខភាព។ ប៉ុន្តែ ក្នុងមួយឆ្នាំៗកុមារជាច្រើនបានស្លាប់ ដោយសារឧបទ្ទវហេតុលង់ទឹក។ ការចេះហែលទឹកកាន់តែឆាប់ គឺជារឿងសំខាន់មួយសម្រាប់កុមារដើម្បីការពារជីវិតពួកគេ។ 

 

តាមការសិក្សាចុះផ្សាយរបស់សារព័ត៌មាន The Conversation កុមារគួរតែចាប់ផ្តើមរៀនហែលទឹកនៅអាយុ ៤ឆ្នាំ ព្រោះវាជាពេលដែលកុមារចាប់ផ្តើមមានសមត្ថភាពគ្រប់គ្រងខ្លួនឯង ពេលមានអាសន្ន និងមានទំនុកចិត្តនៅក្នុងទឹក ក្នុងការរៀនក្បាច់ហែលទឹកមូលដ្ឋាន។ 

 

តាមពិតទៅ កុមារអាចរៀនហែលទឹកបានតាំងពីនៅជាទារក ត្រឹម៦ខែម្លេះ ដោយមានម្តាយនៅថែទាំជាមួយក្នុងទឹក។ ប៉ុន្តែកុមារដែលមានអាយុតិចជាង៤ឆ្នាំ ត្រូវបានអ្នកនិពន្ធការសិក្សាអះអាងថា ពួកគេមិនអាចរៀនចេះវិធីសាស្ត្រហែលទឹកបានត្រឹមត្រូវ ឬមិនអាចគ្រប់គ្រងខ្លួន ពេលមានគ្រោះអាសន្នក្នុងទឹកឡើយ។ 

 

អាយុកុមារពិតជាមានទំនាក់ទំនងនឹងសមត្ថភាពចេះហែលទឹករបស់ពួកគេ។ កុមារដែលមានអាយុតិច អាចមានការអភិវឌ្ឍសមត្ថភាពយឺត ដែលអាចធ្វើខាតលុយបង់ថ្លៃសិក្សា។ ការពិចារណាពីពេលដែលកុមារគួរតែចាប់ផ្ដើមរៀនហែលទឹក គឺជារឿងសំខាន់របស់ឪពុកម្តាយដើម្បីចំណាយលុយឱ្យមានប្រសិទ្ធភាពបំផុត។ 

 

គួរបញ្ជាក់ថា បើទោះជាកុមារមានអាយុ៤ឆ្នាំហើយក្តី ការហ្វឹកហាត់ការហែលទឹកឱ្យបានច្រើនបន្ថែមក្រៅពីម៉ោងរៀនគឺជាចំនុចសំខាន់ដើម្បីពន្លឿនការអភិវឌ្ឍសមត្ថភាព និងធ្វើបានល្អ។ សហអ្នកនិពន្ធការស្រាវជ្រាវបានណែនាំឱ្យកុមារហែលទឹកឱ្យបានយ៉ាងតិច៤ថ្ងៃ ម្ដង ដើម្បីពង្រឹងសមត្ថភាព និងទទួលបានសុខភាពរាងកាយមាំមួនល្អ៕