ជាតិ
CATA និងអង្គការ NGO2 បង្កើតគម្រោងកម្មវិធីទេសចរណ៍បរិស្ថាននៅសហគមន៍មេជ្រៃ សហគមន៍មេជ្រៃ ក្នុងកម្មវិធីសម្អាតសំណល់ប្លាស្ទិកនាពេលកន្លងមក។ អង្គការ NGO2
×
សៀមរាប៖ សមាគមទេសចរណ៍កម្ពុជា (CATA) និងអង្គការមូលនិធិទំពាំងស្នងឫស្សី (NGO2) សហការបង្កើតកម្មវិធីទេសចរណ៍បរិស្ថាន នៅសហគមន៍មេជ្រៃ ស្ថិតនៅភូមិពាមតាអ៊ួរ ស្រុកពួក ខេត្តសៀមរាប។
ប្រធានអង្គការមូលនិធិទំពាំងស្នងឫស្សី លោក ស៊ា សុផល មានប្រសាសន៍ថា កម្មវិធីទេសចរណ៍បរិស្ថាន នេះ ជាគំនិតផ្តួចផ្តើមសហការរវាងអង្គការ NGO2 និងសមាគម CATA ក្នុងបំណងលើកកម្ពស់ជីវភាពសហគមន៍មេជ្រៃតាមរយៈការបង្កើតចំណូលដោយផ្ទាល់ពីទេសចរ។ លោក សុផល បន្តទៀថា សហគមន៍នឹងបង្កើតជាទូកអុំ ដឹកទេសចរណ៍ទស្សនាព្រៃលិចទឹក ជីវៈចម្រុះ ហើយទេសចរជួយសម្អាតសំរាមប្លាស្ទិកដែលទើរតាមដើមឈើនារដូវទឹកសម្រកនេះ ដែលជាផ្នែកមួយលើកកម្ពស់បរិស្ថានក្នុងសហគមន៍បានផងដែរ។
សម្រាប់កាកសំណល់ប្លាស្ទិកដែលបានពីការសម្អាតនោះ សហគមន៍អាចយកច្រកក្នុងដបដើម្បីដូរយកអង្ករ ក្នុងនោះដបប្លាស្ទិកចំនួន១០០ ដូរបានអង្ករ៥គីឡូក្រាម។ លោក សុផល បញ្ជាក់ថា កម្មវិធីនេះនឹងមាននិរន្តរភាពដល់សេដ្ឋកិច្ចសហគមន៍ ព្រោះពួកគេលែងពឹងផ្អែកតែលើកម្មវិធីរបស់អង្គការដែលចូលទៅជួយទៀតហើយ គឺពួកគាត់នឹងអនុវត្តន៍ជារៀងរាល់ថ្ងៃដោយខ្លួនឯង។
កម្មវិធីនេះ គ្រោងរៀបចំប្រកាសជាផ្លូវការនៅថ្ងៃទី៣០ ខែ មករា ឆ្នាំ២០២២។ អ្នករៀបចំកម្មវិធីមានសុទិដ្ឋិនិយមថា សហគមន៍នឹងមានចំណូលពីកម្មវិធីនេះបានមួយផ្នែក នៅពេលដែលរបរនេសាទនៅក្នុងបឹងទន្លេសាប កាន់តែខ្សត់ខ្សោយពីមួយឆ្នាំទៅមួយឆ្នាំ។
សូមបញ្ជាក់ថា កន្លងមក អង្គការ NGO2 បានបង្កើតកម្មវិធីបរិស្ថានច្រើនលើកមកហើយនៅសហគមន៍ពាមតាអ៊ួរ ដូចជាកម្មវិធីជង្រុកប្លាស្ទិកដូរយកអង្ករ ដោយកៀងគរសហគមន៍ឱ្យយល់ដឹងពីផលប៉ះពាល់នៃការចោលសំរាមក្នុងទឹកទន្លេសាបជាដើម។ គាំទ្រនេះ ទទួលបានការកោតសរសើរ និងគាំទ្រពីក្រសួងបរិស្ថាន ក៏ដូចជាក្រសួងទេសចរណ៍ផងដែរ៕
Tag:
ទេសចរណ៍បរិស្ថាន
សហគមន៍មេជ្រៃ
ភូមិពាមតាអ៊ួរ
© រក្សាសិទ្ធិដោយ thmeythmey.com