លោក Takahashi Fumaiki ប្រធានសមាគមជប៉ុន-កម្ពុជា បានស្នើសុំសម្តេច  ហ៊ុន សែនឱ្យផ្តល់លទ្ធភាពដល់ខ្លួន សិក្សារកដំណោះស្រាយនានា ពីបញ្ហាទឹកជំនន់ស្ទឹងព្រែកត្នោត ខណៈលោកសិក្សាពីបញ្ហានេះបានខ្លះហើយ។ 

 

ពាក់ព័ន្ធនឹងសំណើរនេះ សម្តេច ហ៊ុន សែន បានចាត់តាំងលោក សុខ ចិន្តាសោភា ដែលជារដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា(CDC) ឱ្យជាអ្នកសម្របសម្រួលជាមួយលោកលឹម គានហោ  រដ្ឋមន្ត្រីក្រសួងធនធានទឹកនិងឧតុនិយម និងស្ថាប័នពាក់ព័ន្ធផ្សេងទៀត ក្នុងការអនុញ្ញាតឱ្យក្រុមការងារជំនាញរបស់លោកTakahashi Fumaiki ដើម្បីធ្វើបទបង្ហាញពីដំណោះស្រាយបញ្ហាទឹកជំនន់ស្ទឹងព្រែកត្នោតនេះ។ 

 

សូមរម្លឹកថា កាលឆ្នាំ២០២០ និង២០២១ ប្រជាពលរដ្ឋដែលរស់នៅរាជធានីភ្នំពេញ ជាពិសេសអ្នករស់នៅតាមខណ្ឌដង្កោ និងខណ្ឌកំបូល រួមទាំងនៅតាមស្រុកនិងក្រុងមួយចំនួន នៃខេត្តកណ្តាលនិងខេត្តកំពង់ស្ពឺ បានរងគ្រោះយ៉ាងខ្លាំងពីទឹកជំនន់ស្ទឹងព្រែកត្នោតនេះ ដោយមានពលរដ្ឋជាច្រើនពាន់គ្រួសារ ត្រូវបង្ខំចិត្តចាកចេញពីលំនៅដ្ឋានទៅកាន់ទីទួលសុវត្ថិភាព៕