គោលបំណងនៃការចេញប្រកាសរួមគ្នារបស់លោករដ្ឋមន្រ្តីទាំង២រូប គឺដើម្បីធ្វើឲ្យប្រសើរឡើងលើការគ្រប់គ្រង ការអភិវឌ្ឍហេដ្ឋារចនាសម្ព័ន្ធផ្លូវថ្នល់ និងការធានាសុវត្ថិភាពចរាចរណ៍នៅកម្ពុជា។ រដ្ឋមន្រ្តីទាំង២រូប និងអភិបាលរាជធានី-ខេត្ត ត្រូវកំណត់ជាសមត្ថកិច្ចគ្រប់គ្រងផ្លូវថ្នល់។ សមត្ថកិច្ចគ្រប់គ្រងផ្លូវថ្នល់ អាចជាអ្នកផ្សេងទៀត ដែលកំណត់ដោយរដ្ឋាភិបាល។ 
 

ក្រុមមន្រ្តីជំនាញ ដែលចុះទៅត្រួតពិនិត្យផ្លូវថ្នល់ថ្នាក់ជាតិ ហៅថា មន្រ្តីអធិការកិច្ចផ្លូវថ្នល់ថ្នាក់ជាតិ ហើយទទួលបញ្ជាពីរដ្ឋមន្រ្តីទាំង២រូប។ ក្រុមមន្រ្តីជំនាញ ដែលចុះទៅត្រួតពិនិត្យផ្លូវថ្នល់ថ្នាក់ក្រោមជាតិ ហៅថា មន្រ្តីអធិការកិច្ចផ្លូវថ្នល់ថ្នាក់ក្រោមជាតិ ហើយទទួលបញ្ជាពីអភិបាលរាជធានី-ខេត្ត។  
 

មន្រ្តីអធិការកិច្ច អាច​ចុះទៅត្រួតពិនិត្យផ្លូវថ្នល់ញឹកញាប់ ដែលលើសពី២ដងក្នុង១ឆ្នាំ ដោយយោងទៅលើករណីចាំបាច់ ដូចជា ការអភិវឌ្ឍហេដ្ឋារចនាសម្ព័ន្ធផ្លូវថ្នល់ណាមួយ មិនអនុលោមតាមស្តង់ដារបច្ចេកទេស ឬមិនអនុលោមតាមនីតិវិធីនៃការវាយតម្លៃ។ ការមានហានិភ័យខ្លាំងដល់គុណភាព សុវត្ថិភាព សណ្តាប់ធ្នាប់ និង បរិស្ថាននៃហេដ្ឋារចនាសម្ព័ន្ធផ្លូវថ្នល់ ក៏មន្រ្តីអធិការកិច្ច ត្រូវចុះទៅពិនិត្យញឹកញាប់ដែរ។
 

បើដំណើរការអភិវឌ្ឍហេដ្ឋារចនាសម្ព័ន្ធផ្លូវថ្នល់ណាមួយ ដែលមិនអនុលោមតាមច្បាប់ស្តីពីផ្លូវថ្នល់ មិនអនុលោមតាមបទបញ្ញត្តិបច្ចេកទេស មន្រ្តីអធិការរកិច្ច អាចចាត់វិធានការដកហូតភស្តុតាងផ្សេងៗ ដែលត្រូវបានប្រើប្រាស់ក្នុងការអភិវឌ្ឍហេដ្ឋារចនាសម្ព័ន្ធផ្លូវថ្នល់នោះ។ ជាងនេះទៀត មន្រ្តីអធិការកិច្ចផ្លូវថ្នល់ នឹងលើកសំណើទៅសមត្ថកិច្ចគ្រប់គ្រងផ្លូវថ្នល់ ដើម្បីសុំឲ្យពិចារណាចាត់វិធានការ ដូចជា ព្រមានជាលាយលក្ខណ៍អក្សរ ពិន័យជាប្រាក់ ផ្អាកការអភិវឌ្ឍផ្លូវថ្នល់ជាបណ្តោះអាសន្ន ឬឈានទៅដកហូតអាជ្ញាបណ្ណពីម្ចាស់ក្រុមហ៊ុន ដែលទទួលសិទ្ធិក្នុងការអភិវឌ្ឍផ្លូវថ្នល់នោះតែម្តង៕