សុខភាព
អន្តរជាតិ
រោគសញ្ញាសំខាន់ៗដែលកើតឡើង ១០ឆ្នាំមុនវិវដ្តទៅជាជំងឺវង្វេង រូបភាព៖ Xinhua
× កន្លងមក ជំងឺវង្វេងមិនមានការព្យាបាលប្រកបដោយប្រសិទ្ធភាពនោះទេ ប៉ុន្តែអ្នកវិទ្យាសាស្ត្របានខិតខំកំណត់រោគសញ្ញាបឋមមួយចំនួន ដើម្បីការពារ ឬបន្ថយល្បឿននៃការវិវដ្ដរបស់វាបានទាន់ពេល។ កត្តាហានិភ័យដែលជាសញ្ញានៃជំងឺវង្វេងដែលគេកំណត់បានមានដូចជាជំងឺបាក់ទឹកចិត្ត ខ្សោយត្រចៀកស្ដាប់មិនសូវឮ និងសញ្ញាជាច្រើនទៀត។
អង្គការសុខភាពពិភពលោក (WHO) បានបង្ហាញថា មនុស្ស ៥៥លាននាក់នៅទូទាំងពិភពលោកមានអាការភ្លេចភ្លាំង។ ក្នុងនោះ មនុស្សប្រមាណ ៦០ ទៅ ៧០ភាគរយមានជំងឺវង្វេង។ ជំងឺវង្វេងមានសភាពធ្ងន់ធ្ងរជាងជំងឺភ្លេចភ្លាំង ហើយវាវិវដ្ដមកពីការភ្លេចភ្លាំងច្រើន។ ជំងឺវង្វេងមិនមែនកើនឡើងភ្លាមៗនោះទេ ខួរក្បាលដែលទទួលខុសត្រូវចំពោះជំងឺវង្វេង អាចចាប់ផ្តើមប៉ះពាល់ជាច្រើនឆ្នាំមុនពេលវាជះឥទ្ធិពលទៅលើសមត្ថភាពយល់ដឹង និងអាកប្បកិរិយា។
ដំបូងវាអាចមានរោគសញ្ញាមួយចំនួនដែលអាចសម្គាល់បាន។ អ្នកស្រាវជ្រាវនៅវិទ្យាស្ថាន Paris Brain របស់បារាំងបានរកឃើញស្ថានភាពសុខភាព ឬរោគសញ្ញាមួយចំនួនដែលអាចនឹងកើតឡើង ១០ឆ្នាំមុនវិវដ្ដទៅជាជំងឺវង្វេង។
ជំងឺបាក់ទឹកចិត្ត គឺជាស្ថានភាពដំបូងបំផុតដែលត្រូវបានផ្សារភ្ជាប់ជាមួយនឹងជំងឺវង្វេង ហើយវាលេចឡើងយ៉ាងហោចណាស់ ៩ឆ្នាំមុនពេលវិវដ្តទៅមានជំងឺង្វេង។ លើសពីនេះ វាមានរោគសញ្ញាផ្សេងទៀតដែលការសិក្សាបានរកឃើញថាបានផ្សារភ្ជាប់ទៅនឹងការកើតជំងឺវង្វេង។ រោគសញ្ញាទាំងនោះរួមមាន ការធុញថប់អារម្មណ៍ ស្ត្រេសខ្លាំង ការទល់លាមក ការស្រកទម្ងន់ខុសធម្មតា មានជំងឺរលាកសន្លាក់ឆ្អឹងក ខ្សោយការស្ដាប់ និងគេងមិនសូវលក់ជាដើម។ ការសិក្សាក៏បានបង្ហាញថា ការដួល សន្លប់ និងអស់កម្លាំងញឹកញាប់ក៏ទាក់ទងទៅនឹងហានិភ័យនៃជំងឺវង្វេងដែរ។
នៅឆ្នាំ ២០២០ ទិនានុប្បវត្តិ Lancet ស្តីពីជំងឺវង្វេង បានបង្ហាញពីកត្តាហានិភ័យបង្កជំងឺ វង្វេង ដែលមានដូចជាការប្រើប្រាស់គ្រឿងស្រវឹងច្រើនពេក ការរងរបួសក្បាល រងការបំពុលខ្យល់ មានជំងឺលើសឈាម ជំងឺទឹកនោមផ្អែម ជក់បារី មានជំងឺធាត់ និងមិនហាត់ប្រាណជាដើម។ ដូច្នេះការចៀសវាងមិនឱ្យមានកត្តាហានិភ័យទាំងអស់នេះនឹងអាចការពារ ឬពន្យារជំងឺវង្វេងក្នុងមនុស្សរហូតដល់ ៤០ភាគរយ។
គួរបញ្ជាក់ថា រោគសញ្ញា ក៏ដូចជាកត្តាហានិភ័យបង្កជំងឺដែលបានរៀបរាប់ខាងលើគឺជាលទ្ធផលនៃការសិក្សាលើអ្នកមានជំងឺវង្វេងដែលធ្លាប់ជួបប្រទះ។ វាជាកត្តាហានិភ័យដែលធ្វើឱ្យមនុស្សងាយប្រឈមនឹងជំងឺវង្វេង ប្រសិនបើមានអាការៈ និងជំងឺទាំងនោះ ប៉ុន្តែវាមិនមែនមានន័យថា គ្រប់គ្នាដែលមានអាការៈក្នុងចំណោមនោះសុទ្ធតែត្រូវកើតជំងឺវង្វេងឡើយ៕
© រក្សាសិទ្ធិដោយ thmeythmey.com