កញ្ញា គ្រី លីតា បានសម្រេចចូលធ្វើការងារស្ម័គ្រចិត្តតាំងពីឆ្នាំ២០១៨មក។ ការងារស្ម័គ្រ ដែលនាងបានធ្វើជិត៥ឆ្នាំមកនេះ គឺបានជួយដល់នាងក្នុងការបង្កើនសមត្ថភាព ចំណេះជំនាញ ព្រមទាំងមានទំនាក់ទំនងល្អក្នុងសង្គមថែមទៀត។

 

«ខ្ញុំរៀនសូត្របានច្រើនមែនទែន [ពីការងារស្ម័គ្រចិត្តនានា]»។ លីតា បាននិយាយដូច្នេះ ដោយបានបញ្ជាក់ថា៖ «ការងារស្ម័គ្រចិត្តគឺមានផលប្រយោជន៍ច្រើនមែនទែនសម្រាប់យុវជន ព្រោះពេលចូលធ្វើការងារស្ម័គ្រចិត្ត យើងបានស្គាល់មនុស្សថ្មីៗ និងអាចបើកឱកាសឱ្យខ្លួនឯងថ្មីៗ មិនថាទាក់ទងជាមួយអ្នកធ្វើគម្រោងផ្ទាល់ឬអ្នកស្ម័គ្រចិត្តទេ។ ខ្ញុំយល់ថាការស្ម័គ្រចិត្ត​ មិនត្រឹមជួយសង្គមទេ ថែមទាំងជួយអភិវឌ្ឍខ្លួនឯង បានដែរ»។

 

 

ជានិស្សិតដែលកំពុងសិក្សាថ្នាក់បរិញ្ញបត្រអក្សរសាស្ត្រអង់គ្លេស និង បរិញ្ញបត្រសេដ្ឋកិច្ចអភិវឌ្ឍន៍ លីតា បានចូលរួលរួមការងារស្ម័គ្រចិត្តនានា គឺមិនតិចនោះឡើយ។  បើតាមលីតា ការងារស្ម័គ្រចិត្តដែលនាងបានធ្វើកន្លងមកនេះ មាន​ការងារក្នុងវិស័យអប់រំ, ការរៀបចំកម្មវិធីទូទៅ, ការរៀបចំកម្មវិធីជជែកដេញដោលស្ដីពីស្ត្រី, កម្មវិធីសេដ្ឋកិច្ចឌីជីថល, ក្នុងការបកប្រែសៀវភៅដើម្បីឱ្យកុមារអាន,  ចូលរួមបកប្រែមេរៀនសរសេរកូដពីភាសាបរទេសទៅជាភាសាខ្មែរ សម្រាប់ឱ្យកុមាររៀនសូត្រ និងកម្មវិធីផ្សេងច្រើនទៀត។ 

 

យុវតី ជាអ្នកភ្នំពេញរូបនេះ បានប្រាប់សារព័ត៌មានថ្មីៗដូច្នេះ៖ «ការងារស្ម័គ្រចិត្ត គឺជាការងារមួយ ដែលយើងត្រូវចេះអត់ធ្មត់និងចំណាយពេលវេលា លុយកាត់ផ្ទាល់ខ្លួន ប៉ុន្តែ [ខ្ញុំ] សប្បាយចិត្តក្នុងការចូលរួមធ្វើការស្ម័គ្រចិត្តគ្រប់សកម្មភាព ដោយយល់ថាការងារទាំងនេះ ជាមេរៀនដែលផ្តល់ឱ្យខ្លួនថែមទៀតផង»។ 

 

ជាមួយគ្នានេះ កញ្ញា គ្រី លីតា បានលើកទឹកចិត្តដល់យុវជនដទៃ ឱ្យចូលរួមធ្វើការងារស្ម័គ្រនានាដែលខ្លួនស្រលាញ់ ពេញចិត្ត ដើម្បីអភិវឌ្ឍខ្លួនឯង ក៏ដូចជាការចូលរួមអភិវឌ្ឍសង្គមជាតិរបស់ខ្លួនផងដែរ  ព្រោះគ្មានអ្វីដែលយើងធ្វើមិនបានទេ។ កញ្ញា និយាយថា ៖«គ្មានអ្វីដែលយើងធ្វើមិនបាននោះទេ ឱ្យតែស្រលាញ់ ចូលចិត្ត និងតាំងចិត្ត គឺច្បាស់ជាធ្វើបានហើយ»៕