ជាតិ
សៀមរាប ជា«តារារះនៅទិសឧត្តរ»
× ភ្នំពេញ៖ សម្ដេច ហ៊ុន សែន បានហៅខេត្តសៀមរាប ជា «តារារះនៅទិសឧត្តរ» ក្រោយហេដ្ឋារចនាសម្ព័ន្ធ ផ្លូវថ្នល់ និងអាកាសយានដ្ឋានថ្មី លេចរូបរាងនៅខេត្តសៀមរាប។ សម្ដេច លើកឡើងបែបនេះ នាពិធីសម្ពោធ ដាក់ឱ្យប្រើប្រាស់ផ្លូវ៣៨ខ្សែ និងហេដ្ឋារចនាសម្ព័ន្ធមួយចំនួនក្នុងក្រុងសៀមរាប នៅព្រឹកថ្ងៃទី៤ មេសា។
ផ្លូវទាំង៣៨ខ្សែ ដែលស្ថាបនារួចរាល់នាពេលនេះ នឹងចូលរួមចំណែកលើកស្ទួយវិស័យទេសចរណ៍នៅខេត្តសៀមរាបឡើងវិញ ក្រោយស្ងប់ស្ងាត់ដោយសារជំងឺកូវីដ-១៩។ តាមរយៈសមិទ្ធផលនេះ សម្ដេច ហ៊ុន សែន ថាល្មមដល់ពេលហៅខេត្តទិសខាងឧត្តរនេះ ជាតារារះនៅទិសឧត្តរ។
សម្ដេច ហ៊ុន សែន លើកឡើងដូច្នេះ៖ «ខ្ញុំសូមប្រកាសសារជាថ្មីម្ដងទៀត ហៅខេត្តសៀមរាបថា តារារះនៅទិសឧត្តររបស់យើង។ ព្រោះហេដ្ឋារចនាសម្ព័ន្ធ បូកបន្ថែមនឹងផ្លូវ យើងបានរៀបចំប្រព័ន្ធដងស្ទឹងសៀមរាបដ៏ស្មុគស្មាញ រួមទាំងវត្តមានព្រលានយន្តថ្មី ដែលនឹងត្រូវដាក់ឱ្យប្រើប្រាស់នៅឆ្នាំ២០២៣ខាងមុខ។ វាល្មមដល់ពេលយើងហៅទិសខាងឧត្តរនេះ ជាតារារះនៅទិសឧត្តរ»។
ប្រមុខរដ្ឋាភិបាលរូបនេះ រំពឹងថាបន្ទាប់ពីកូវីដ-១៩ធូរស្រាល ភ្ញៀវទេសចរមកកាន់ទីនេះ នឹងបង្កើតបានជាស្ថានភាពអំណោយផលដល់ក្រុងសៀមរាប និងវិស័យទេសចរណ៍សម្រាប់ប្រទេសជាតិ។ ជាមួយគ្នានេះ ក្នុងឱកាសពិធីបុណ្យចូលឆ្នាំខ្មែរ ប្រពៃណីជាតិខាងមុខ សម្ដេច ហ៊ុន សែន ផ្ដល់ឱកាសដល់ប្រជាពលរដ្ឋអាចដើរកម្សាន្តនៅតាមតំបន់ទេសចរណ៍នានា ទោះស្ថិតក្នុងបរិបទកូវីដ-១៩ក៏ដោយ៕
© រក្សាសិទ្ធិដោយ thmeythmey.com