«យើងនឹងផ្ដល់អាវុធដែលអ៊ុយក្រែនត្រូវការដើម្បីប្រយុទ្ធទ័ពរុស្ស៊ី កុំឱ្យកាន់កាប់ទីក្រុង ទីដែលពួកគេប្រព្រឹត្តអំពើឧក្រិដ្ឋ។» លោក ជេគ ស៊ូលីវ៉ាន់ ទីប្រឹក្សាសន្តិសុខប្រធានាធិបតីអាម៉េរិកនិយាយបែបនេះក្នុងប៉ុស្តិ៍ទូរទស្សន៍ ABC នៅថ្ងៃទី១០ ខែមេសា។ លោក ស៊ូលីវ៉ាន់ ចង់សំដៅការសម្លាប់រង្គាលនៅតំបន់ក្បែររដ្ឋធានីកៀវ ដែលអ៊ុយក្រែន និងលោកខាងលិចចោទថា រុស្ស៊ីជាអ្នកបង្ក។

 

ករណីសម្លាប់ជនស៊ីវិលនៅ Bucha ធ្វើឱ្យមូស្គូរងការថ្កោលទោសយ៉ាងខ្លាំង។ ប៉ុន្តែមូស្គូបានទាត់ចោលការចោទប្រកាន់ទាំងអម្បាលម៉ាន ហើយអះអាងថា រឿងរ៉ាវដែលកើតឡើង ជារឿងគ្មានមូលដ្ឋាន និងជាការៀបចំដើម្បីទម្លាក់កំហុស។

 

បើតាមលោក ស៊ូលីវ៉ាន់ អាម៉េរិក កំពុងធ្វើការញាប់ដៃញាប់ជើងក្នុងការដឹកអាវុធឱ្យអ៊ុយក្រែន ក៏ដូចជាសម្របសម្រួលការដឹកជញ្ជូនអាវុធរបស់ប្រទេសផ្សេងទៅកាន់អ៊ុយក្រែនផងដែរ។ 

 

បើតាមការប្រកាសកាលពីសប្ដាហ៍របស់សេតវិមាន អាម៉េរិកបានបញ្ជូនជំនួយយោធាតម្លៃ១,៧ពាន់លានដុល្លារហើយទៅអ៊ុយក្រែនតាំងពីរុស្ស៊ីឈ្លានពាននៅថ្ងៃទី២៤ ខែកុម្ភៈមក។ អាវុធដែលអាម៉េរិកបញ្ជូនទៅមានមីស៊ីលប្រឆាំងយន្តហោះ Stringer មីស៊ីលប្រឆាំងរថក្រោះ​ Javelin និងអាវុធផ្សេងៗជាច្រើនទៀត។

 

យ៉ាងណាមិញ ទីក្រុងកៀវ ចង់ឱ្យអាម៉េរិក និងលោកខាងលិចបញ្ជូនអាវុធធុនធ្ងន់បន្ថែមទៀត ជាជាងអាវុធដែលប្រើក្នុងគោលដៅការពារខ្លួន ស្របពេលអ៊ុយក្រែនត្រៀមតទល់ប្រតិបត្តិការយោធារុស្ស៊ីនៅភាគខាងកើតប្រទេសនោះ។ ក្នុងកិច្ចសម្ភាសជាមួយទូរទស្សន៍អាម៉េរិក CBS ដែលចេញផ្សាយនៅថ្ងៃទី១១ ខែមេសា ប្រធានាធិបតីអ៊ុយក្រែន វ៉ូឡូឌីមៀ ហ្សេលេនស្គី និយាយថា អ៊ុយក្រែនអាចទប់ទល់រុស្ស៊ីបានឬអត់ អាស្រ័យលើល្បឿននៃការផ្គត់ផ្គង់អាវុធ៕