ក្នុងដំណើរការពារកៅអីប្រធានាធិបតីសម្រាប់អាណត្តិទី២ លោក អេម៉ានុយអែល ម៉ាក្រុង ទទួលសំឡេងគាំទ្រ២៧,៦ភាគរយក្នុងការបោះឆ្នោតជុំទីមួយថ្ងៃទី១០ ខែមេសា។ លោក ម៉ាក្រុង នាំមុខបេក្ខជនស្ដាំនិយមជ្រុលលោកស្រី ម៉ារីន ឡឺ ប៉ែន ដែលទទួលបានសំឡេងប្រកៀកប្រកិត២៣,៤ភាគរយ។ បេក្ខជនទាំងពីរ នឹងត្រូវតទល់គ្នានៅជុំទីពីរថ្ងៃទី២៤ ខែមេសា ព្រោះមិនមានបេក្ខជនណាដែលអាចទទួលបានសំឡេងលើស៥០ភាគរយ។

 

៥ឆ្នាំមុន ក្នុងការបោះឆ្នោតជុំទី២​ លោក ម៉ាក្រុង ផ្ដួលលោកស្រី ឡឺ ប៉ែន ដោយគម្លាត៦៦,១០ភាគរយ ទល់នឹង៣៣,៩០ភាគរយ។ យ៉ាងណាមិញ នៅឆ្នាំ២០២២នេះ គម្លាតដ៏ធំនេះមិនមានទៀតឡើយ។ ក្នុងការស្ទង់មតិ លោក ម៉ាក្រុង ដែលនៅតែឈរលេខរៀងទី១ មានសំឡេងគាំទ្រ៥១ភាគរយ ទល់នឹង៤៩ភាគរយរបស់លោកស្រី ឡឺ ប៉ែន ។​

 

«អ្វីៗមិនទាន់សម្រេចនៅឡើយទេ។» លោក ម៉ាក្រុង ថ្លែងទៅកាន់អ្នកគាំទ្របែបនេះ ជាមួយនឹងការអំពាវនាវឱ្យពួកគេបន្តគាំទ្រលោកដើម្បីទប់ស្កាត់ក្រុមស្ដាំនិយមជ្រុលឡើងដឹកនាំបារាំងដែលមានសេដ្ឋកិច្ចធំទី២ នៅប្លុកអឺរ៉ុប។ ប្រធានាធិបតីបារាំងរូបនេះ ក៏ស្នើឱ្យអ្នកគាំទ្រលោកស្រី ឡឺ ប៉ែន បោះឆ្នោតឱ្យលោកផងដែរ។

 

ចំណែកលោកស្រី ឡឺ ប៉ែន វិញ ប្រាប់អ្នកគាំទ្រថា លោកស្រីជាអ្នកគាំទ្រអ្នកទន់ខ្សោយ និងជាអ្នកបង្រួបបង្រួមប្រទេស។ លោកស្រីអះអាងថា លោកស្រីនឹងនាំយកសណ្ដាប់ធ្នាប់មកឱ្យបារាំងវិញ។

 

អំឡុងពេល២សប្ដាហ៍ទៅមុខ បេក្ខជនទាំងពីរ សុទ្ធតែប្ដេជ្ញាទាក់ទាញការគាំទ្រពីប្រជាជនបារាំងដើម្បីដឹកនាំប្រទេស ព្រោះការស្ទង់មតិបង្ហាញថា គម្លាតមិនមានធំឡើយរវាងអ្នកទាំងពីរ៕