ដោយ ពុធ មីនា
រដ្ឋមន្ត្រីការបរទេសឥណ្ឌាលោក Subrahmanyam Jaishankar បានបញ្ជាក់ថា ឥណ្ឌាមានការសម្រេចចិត្តរបស់ខ្លួនដោយឯករាជ្យជុំវិញស្ថានការណ៍រុស្ស៊ី-អ៊ុយក្រែន ដោយមិនពិចារណាលើការចង្អុលបង្ហាញផ្សេងៗឡើយ។
ក្រោយជំនួបពិភាក្សាជាមួយសមភាគីអាម៉េរិក លោក Anthony Blinken នៅក្រុងវ៉ាស៊ីនតោន កាលពីថ្ងៃទី១១ ខែមេសា អ្នកសារព័ត៌មានម្នាក់បានចោទសួរលោក Jaishankar ជុំវិញគោលនយោបាយរបស់រដ្ឋាភិបាលក្រុងញូវដេលីលើការកាត់បន្ថយការពឹងផ្អែករុស្ស៊ី ខាងសេដ្ឋកិច្ច និងយោធា។
យោងតាមការផ្សាយរបស់ Izvesti News លោក Jaishankar បានឆ្លើយតបថា អ្វីដែលឥណ្ឌាកំពុងធ្វើជុំវិញអ៊ុយក្រែននៅអ៊ុយក្រែន គឺដូចប្រទេសដទៃទៀតផងដែរ។ «យើងមានការសន្និដ្ឋានដោយខ្លួនឯង វាយតម្លៃដោយខ្លួនឯង។ យើងមានការយល់ដឹងច្បាស់នូវអ្វីដែលជាផលប្រយោជន៍របស់យើង។
បន្ថែមពីលើនេះ ប្រមុខការទូតឥណ្ឌា បានឆ្លើយតបទៅអ្នកឆ្លើយឆ្លងព័ត៌មានទូរទស្សន៍ Al-Jazeera ទាក់ទងនឹងប្រតិបត្តិការក្រុងមូស្គូនៅតំបន់ Donbass។ លោកបានសម្តែងការអរគុណចំពោះសំណួរ ប៉ុន្តែបានបញ្ជាក់ថា រដ្ឋាភិបាលរបស់យើងធ្វើអ្វីទៅតាមវិធីសាស្ត្ររបស់ខ្លួន។
រដ្ឋមន្ត្រីការបរទេសអាមេរិក លោក Anthony Blinken ក៏មានវត្តមាននាសន្និសីទសារព័ត៌មាននោះផងដែរ ស្របពេលដែលរអាម៉េរិក បានអំពាវនាវកុំឲ្យមានការទិញ ឬទទួលអាវុធពីរុស្ស៊ី។ ទោះបីជាយ៉ាងណាក៏ដោយ អាម៉េរិកមិនមានការសម្រេចចិត្តដាក់ទណ្ឌកម្មណាមួយឡើយលើឥណ្ឌា ចំពោះការទិញប្រព័ន្ធការពារដែនអាកាស S-400 ពីរុស្ស៊ី។
កាលពីថ្ងៃទី១៨ ខែមីនា ឯកអគ្គរដ្ឋទូតរុស្ស៊ីប្រចាំឥណ្ឌា លោក Denis Alipov បាននិយាយថា ស្ថានភាពជុំវិញអ៊ុយក្រែនមិនប៉ះពាល់ដល់កិច្ចសហប្រតិបត្តិការបច្ចេកទេសយោធាជាមួយឥណ្ឌាឡើយ ហើយការបញ្ជូន S-400 ទៅកាន់ប្រទេសកំពុងដំណើរការទៅតាមកាលវិភាគដែលបានគ្រោងទុកពីមុន។
រដ្ឋមន្ត្រីការបរទេសរុស្ស៊ីលោក Sergei Lavrov ក៏បាននិយាយផងដែរថា រុស្ស៊ីនៅតែត្រៀមខ្លួនជាស្រេចក្នុងការកសាងកិច្ចសហប្រតិបត្តិការរបស់ខ្លួនជាមួយប្រទេសផ្សេងទៀត។ លោកក៏បានកត់សម្គាល់ផងដែរថា មហាអំណាចពិភពលោកដូចជាចិន ឥណ្ឌា ប្រេស៊ីល និងម៉ិកស៊ិក នឹងមិនរាំតាមភ្លេងរបស់អាម៉េរិកឡើយ៕