ថៃ ដែលមានករណីឆ្លងប្រចាំថ្ងៃជាច្រើនម៉ឺនករណី កន្លងមក បានដាក់ចេញវិធានការមួយចំនួន ដូចជាហាមឃាត់ការជះទឹកដាក់គ្នា ដើម្បីទប់ស្កាត់ជំងឺកូវីដ-១៩ ក្នុងអំឡុងពិធីចូលឆ្នាំថ្មី។ តាមការចុះផ្សាយរបស់កាសែតបាងកកប៉ុស្តិ៍ ក្នុងពេលចូលឆ្នាំនេះ ប្រជាជនថៃ និងភ្ញៀវទេសចរមួយចំនួន បានជះទឹកដាក់គ្នា និងបំពានវិធានមួយចំនួន ដែលដាក់ចេញដោយមជ្ឈមណ្ឌលគ្រប់គ្រងជំងឺកូវីដ-១៩ ។ 

 

ទាក់ទិននឹងបញ្ហានេះ អ្នកនាំពាក្យរដ្ឋាភិបាលថៃ លោក Thanakorn Wangboonkongchana បានជំរុញឱ្យប្រជាជន និងភ្ញៀវទេសចរសហការជាមួយរដ្ឋាភិបាល និងគោរពវិធានទប់ស្កាត់ជំងឺឆ្លង ស្របពេលជំងឺកូវីដ-១៩ កំពុងផ្ទុះខ្លាំងនៅក្នុងប្រទេស។ 

 

«យើងសង្ឃឹមថា នឹងមិនឃើញនរណាម្នាក់ជះទឹកដាក់គ្នានៅវិថី Khao San និងកន្លែងសាធារណៈដ៏ទៃទៀត»។ លោក Thanakorn បានសង្កត់ធ្ងន់បែបនេះ ដោយបន្ថែមថា រដ្ឋាភិបាលថៃ មិនចង់ចាប់បង្ខំឱ្យមានការអនុវត្តវិធានតឹងរ៉ឹងឡើយ។ បើតាមអ្នកនាំពាក្យរូបនេះ លោកនាយករដ្ឋមន្រ្តី បា្រយុទ្ធ ចន្ទអូចា បានបង្ហាញក្តីបារម្ភមួយចំនួន ជុំវិញការឆ្លងជាចង្កោម ដែលបង្កដោយការបំពានវិធានទប់ស្កាត់ជំងឺកូវីដ-១៩ ។

 

ក្រៅពីជំរុញឱ្យប្រជាជន និងភ្ញៀវបរទេសអនុវត្ត នាយករដ្ឋមន្រ្តីថៃ ក៏បានបញ្ជាក្រសួងមហាផ្ទៃ និងរដ្ឋបាលក្រុងបាងកក ពង្រឹងកិច្ចខិតខំរបស់ខ្លួន ដើម្បីជំរុញឱ្យប្រជាជន និងភ្ញៀវបរទេសគោរពវិធានខាងលើផង។ មិនតែប៉ុណ្ណោះ ម្ចាស់អាជីវកម្ម នៅវិថី Khao San ត្រូវណែនាំដល់ភ្ញៀវទេសចរ កុំឱ្យជះទឹកដាក់គ្នាដែរ។ 

 

សូមបញ្ជាក់ថា ក្នុងពិធីចូលឆ្នាំ ថៃបានអនុញ្ញាតឱ្យវត្តចំនួន ១០ប៉ុណ្ណោះ ធ្វើជាទីតាំងប្រារព្ធពិធីចូលឆ្នាំ។ មិនតែប៉ុណ្ណោះ​ តៀមស្រា និងកន្លែងកម្សាន្តផ្សេងៗ អាចបើកត្រឹមម៉ោង ៥ល្ងាច ដល់ម៉ោង ១០យប់ប៉ុណ្ណោះ៕