ធនាគារ កាណាឌីយ៉ា សហការជាមួយក្រុមហ៊ុន ទ្រូម៉ាន់នី ដើម្បីពង្រីកសេវាកម្មដកប្រាក់កាន់តែទូលំទូលាយ

អត្ថបទពាណិជ្ជកម្ម

ធនាគារ កាណាឌីយ៉ា សហការជាមួយក្រុមហ៊ុន ទ្រូម៉ាន់នី ដើម្បីពង្រីកសេវាកម្មដកប្រាក់កាន់តែទូលំទូលាយ

12, May 2022 , 11:49 am

រូបភាព

ដោយ: សារព័ត៌មានថ្មីៗ

ភ្នំពេញ កាលពីថ្ងៃទី១១ ខែឧសភា ឆ្នាំ២០២២៖ ធនាគារ កាណាឌីយ៉ា កំពុងសហការគ្នាជាមួយក្រុមហ៊ុន ទ្រូម៉ាន់នី (ខេមបូឌា) ដែលជាក្រុមហ៊ុនបច្ចេកវិទ្យាហិរញ្ញវត្ថុដ៏ល្បីឈ្មោះមួយនៅកម្ពុជា ដើម្បីផ្តល់សេវាដកប្រាក់ សម្រាប់អតិថិជននៅទូទាំងប្រទេស។

កិច្ចសហការថ្មីនេះ ធ្វើឡើងក្នុងបំណងធ្វើឱ្យការដកប្រាក់ កាន់តែងាយស្រួលសម្រាប់អតិថិជនរបស់ធនាគារ កាណាឌីយ៉ា។ ឥឡូវនេះ អតិថិជនរបស់ធនាគារ កាណាឌីយ៉ា អាចផ្ទេរប្រាក់ដោយផ្ទាល់ ពីកម្មវិធីធនាគារចល័តរបស់ខ្លួន ទៅកាន់បងប្អូនក្រុមគ្រួសារ និងមិត្តភក្តិ ក្រោយមក ពួកគេអាចដកសាច់ប្រាក់ តាមភ្នាក់ងារទ្រូម៉ាន់នីនៅទូទាំងប្រទេស។ ដើម្បីដកប្រាក់ នៅតាមភ្នាក់ងារទ្រូម៉ាន់នី អតិថិជនត្រូវប្រើប្រាស់លេខកូដដកប្រាក់ (Cash Pickup Code)។

កិច្ចព្រមព្រៀងចុងក្រោយបំផុត រវាងធនាគារ កាណាឌីយ៉ា និងក្រុមហ៊ុន ទ្រូម៉ាន់នី ចូលជាធរមាន នៅថ្ងៃទី១១ ខែឧសភា ឆ្នាំ២០២២ បន្ទាប់ពីចុះហត្ថលេខាលើអនុស្សរណៈនៃការយោគយល់គ្នា រវាងភាគីទាំងពីរ នៅការិយាល័យកណ្តាលរបស់ធនាគារ កាណាឌីយ៉ា។

លោក Raymond Sia Say Guan នាយកប្រតិបត្តិធនាគារ កាណាឌីយ៉ា មានប្រសាសន៍ថា៖ «វាជាកិត្តិយសដ៏ធំមួយ ដែលយើងអាចពង្រីកវិសាលភាព និងសេវាកម្មរបស់យើង ជាមួយស្ថាប័នហិរញ្ញវត្ថុដ៏ល្បីឈ្មោះដូចជា ក្រុមហ៊ុន ទ្រូម៉ាន់នី។ កិច្ចព្រមព្រៀងនេះ នឹងផ្តល់អត្ថប្រយោជន៍យ៉ាងច្រើន ដល់អតិថិជនរបស់ធនាគារ កាណាឌីយ៉ា និងអតិថិជនរបស់ក្រុមហ៊ុន ទ្រូម៉ាន់នី តាមរយៈការបង្កើនលទ្ធភាព និងពង្រឹងសេវាកម្មហិរញ្ញវត្ថុឲ្យកាន់តែប្រសើរ»។

លោកស្រី ឃួន ហ្រ្វង់ដារា អគ្គនាយិកាគ្រប់គ្រងផ្នែកយុទ្ឋសាស្រ្ត នៃក្រុមហ៊ុន ទ្រូម៉ាន់នី (ខេមបូឌា) មានប្រសាសន៍ថា៖«យើងតែងតែស្វែងរកមធ្យោបាយនានា ដើម្បីបង្កើតទំនាក់ទំនងដ៏ស្អិតល្មួត ជាមួយធនាគារដែលគួរឱ្យទុកចិត្តឈានមុខគេបែបនេះ ដើម្បីផ្តល់សេវាកម្មបន្ថែមទៀត ដល់អតិថិជនរបស់ ទ្រូម៉ាន់នី។ កិច្ចព្រមព្រៀងនេះ ជាឧទាហរណ៍មួយទៀតដែលបង្ហាញពីរបៀបដែលធនាគារ និងស្ថាប័នហិរញ្ញវត្ថុ អាចទទួលបានអត្ថប្រយោជន៍ពីការចងសម្ព័ន្ធភាព ជាមួយក្រុមហ៊ុនបច្ចេកវិទ្យាហិរញ្ញវត្ថុ ប្រកបដោយភាពច្នៃប្រឌិត»។

សេវាកម្មថ្មីនេះ នឹងត្រូវបានដាក់ឲ្យប្រើប្រាស់ក្នុងពេលឆាប់ៗនេះ។ ភាពជាដៃគូនេះ នឹងអនុញ្ញាតឱ្យអ្នកប្រើប្រាស់ ទូទាត់យ៉ាងលឿន និងរហ័ស ដោយប្រើប្រាស់ប្រព័ន្ធបាគង របស់ធនាគារជាតិនៃកម្ពុជា។

លើសពីនេះទៀត ភា្នក់ងារទ្រូម៉ាន់នី ដែលជាអតិថិជនរបស់ធនាគារ កាណាឌីយ៉ា ឬចង់ក្លាយជាអតិថិជនថ្មី របស់ធនាគារ កាណាឌីយ៉ា អាចទទួលបានអត្ថប្រយោជន៍ពីសេវាគ្រប់គ្រងសាច់ប្រាក់ (ដាក់ប្រាក់ ឬដកប្រាក់)។ ពួកគេ អាចដាក់ប្រាក់ ឬដកប្រាក់ និងគ្រប់គ្រងលំហូរសាច់ប្រាក់ យ៉ាងងាយស្រួលផងដែរ៕

សម្រាប់ព័ត៌មានបន្ថែម សូមចូលទៅកាន់គេហទំព័ររបស់យើង៖ https://www.canadiabank.com.kh/ ឬទំព័រហ្វេសប៊ុក៖ https://web.facebook.com/CanadiaBankCambodia

(អត្ថបទពាណិជ្ជកម្ម)